Yuhana 18
18
Magəsa Yesuw ana ta gəs a
Mata 26:47-56; Markus 14:43-50; Luka 22:47-53
1Yesuw a ndəv à meheme ŋgar ata tsara ka, ta mah ba nda gà ɓəzla mazazama ŋgat, tə da aka lìdè meriyew duwa, tə zalar Kidirun. Tə daha ka, tə da a dzèrnè duwa a riŋ i fata. 2Yudas ana a ta ge a ɗaf aà Yesuw a tekeɗe, a sər təv ata mbaŋa. Aɗaba gà Yesuw nda gà ɓəzla mazazama ŋgat tə dawa aɗəm kəla pat tserdze. 3Aɗaba taŋa, gà Yudas tə daha nda gà asiŋ gà sliwdze gà Ruma duwa nda gà asiŋ gà ɓəzla makàslà ga Mbulum batsah ŋana. Na a sləraha tar ka, gà Əbay gà ɓəzla mandəva kuɗa a Mbulum, nda gà *Farisa. Tə daha ka, nda gà dukw ahər aà tar. Tə ndzək dərraha gà lalampa, nda gà dukuməŋa a riŋ tàa dza ahər mal ka, à gìsiŋa. Yudas na a ndzəkaha tar, a ndza a taraha aka miɗ a. 4Tsaatsa Yesuw ka, aka mbər mesire dukw ana a ta ge a ba nda ŋgat a. I təv ana ti ndzeha tsara ya ka, pəzlàŋ Yesuw a daha a təv tar. A gwaɗa a tar: «Ki yehwim a weke?» 5Ta gwaɗar aaka: «Mìi yehe a Yesuw, gà Nazaret.» Yesuw a gwaɗa a tar: «Iye ŋa naha seyiŋ.»
Yudas ana a ge a aà ŋgat ɗaf a, mehìtsè ŋa dzèŋŋe i təv tar. 6Tə tsaraka mifefile Yesuw ana a gwaɗa a tar: «Iye ŋa naha» ya ka, dàrdàrdàr ta mbəɗara gər a dəba ya, ɓə̀ràmə̀mə̀mma tə dzawa aà mbulum a. 7Yesuw a gwaɗa a tar asa: «Ki yehwim a dze ana, weke kəla ya?» Ta mà aaka, ta gwaɗar: «Mìi yehe a ka, Yesuw, gà Nazaret.» 8Yesuw a gwaɗa a tar aaka: «Yàa gwaɗa a kurum ana, iye ŋa naha tsiye? Iye ka, wele ana ki yehwim a ya. Miyakum à gà asiŋ gà mburma aaha, tə da.» 9A tsik taŋa ka, aɗaba bazlam ana a tsik a Tsir ŋgar ndeɗiŋa, a ta ge a ba ndzer, a gwa ka: «Yàa dzeye à gà mburma ana kà dziŋ tar a ahər a ilik tsidze» ya.
10I fataya ka, Simun Piyer a riŋ nda gà màsalamà, fə̀hhàt a ndzahara i ga ya. A daha, pats a lak dər a mala meslire *batsah mala mandəva kuɗa a Mbulum, a sàs dər ihər zləm ahər mezime a bəɗ a. Mala meslire ata ka, tə zalar Malkus. 11Ama Yesuw a gwaɗa a Piyer: «Mà à màsalamà yak a ga ŋa. Wànà kà dzala i yak ana, i ti se a mesewere are ana Tsir gà a viliŋ a tsiye?»
Tə da à Yesuw aka miɗ Hanas
12I dəba ŋa ya, Əbay gà sliwdze, nda gà mburma ŋgar, dite nda gà ɓəzla makàslà ga Mbulum batsah ŋa ata, tə daha, ta gəs Yesuw, tə dzaw tez. 13Tə lah mede dər ka, a bəra Hanas, aɗaba ŋgat ka, *batsah mala mandəva kuɗa a Mbulum ana piŋŋe ya. A dehe a, a ger a seriye. Hanas ka, malpa Kayafas ana ŋgat batsah mala mandəva kuɗa a Mbulum ana akahər ata ya. 14Kayafas ata asa mbaŋa na a gwaɗa a gà bàba gà Yahuda ka, ŋgulum mburma ilik mə̀ mət, na ndəna mburma tserdze ti dzeye a ya ya.*fa*
Piyer a ɗe bərakə̀zəm a Yesuw
Mata 26:69-70; Markus 14:66-68; Luka 22:55-57
15Gà Simun Piyer nda mala mazazama ŋgiɗ duwa, tə dəɗ aka Yesuw tsikw a bəra *batsah mala mandəva kuɗa a Mbulum ata. Mala mazazama Yesuw ŋgiɗ ata ka, wele ata a sər ŋgat. A daha, kwìlis a dəɗ aka Yesuw a huɗ zlagam. 16Ama Piyer ka, a ndza ɗa i bəra slip aà gùva biye hərmaga zlagam ata. Aɗaba taŋa mala mazazama Yesuw ŋgiɗ ata ka, batsah mala mandəva kuɗa a Mbulum aaha a sər ŋgat, a dara ndàra a bəra ya, a dara ka, a fàfəl a dəm duwa a riŋ a kesle a biye hərmaga zlagam ata, dite ka, Piyer ma da a ga te. I fataya ka, ta geba məma. 17I təv ana ti de a ya ka, dəm ata a gwaɗa a Piyer: «Kər tekeɗe ka, mala mazazama wele ata dìgiy.» Piyer a gwaɗar aaka: «Awaŋ, iye mala mazazama ŋgat tsa.»
18Ama ndaàvəɗ ata ka, mə̀tasl a riŋ hinne. Aɗaba taŋa, gà ɓəzla meslire batsah mala mandəva kuɗa a Mbulum ata nda gà ɓəzla makàslà ga Mbulum batsah ŋa ata ta vàt riŋ akwa i huɗ zlagam ata. Piyer tekeɗe ka, a daha a təv tar, a waya mandza aà akwa ata mbaŋa.
*Batsah mala mandəva kuɗa a Mbulum a wiz bazlam
aà Yesuw a
Mata 26:59-66; Markus 14:55-64; Luka 22:66-71
19I dəba ŋa ya, batsah mala mandəva kuɗa a Mbulum ata a wiz bazlam aà Yesuw a, nda təv gà ɓəzla mazazama ŋgat a, dite nda təv guma ŋgar ana a tsikewa ya. 20Yesuw a gwaɗar aaka: «I fàfəlawa ka, ndərzayya, ika miɗ mburma tserdze. I tsikewa guma gà i ga Mbulum batsah ŋana nda gà i gà ga mahàmà a Mbulum tserdze, kamala megweɗe ya ka, i təv ana gà Yahuda ti yahawaba aɗəm gər a. Yàa tsik duwa nda akəl ilik tsidze. 21Dite aàmala na ki wiz aà iye a bazlam kataya ya? Ŋgulum wiz ka, aà gà mburma ana tə tsaraka guma gà ya ivaɗ. Tar ka, tə sər dukw ana i tsikewa a tar a.»
22Yesuw a tsik kataya tsara ka, mala makàslà ga Mbulum ilik ika magər tar ata i fataya, pay a lak a Yesuw, dite i dəba ŋa ya, a gwaɗar: «Kataya ya, na ki fèfil a a batsah mala mandəva kuɗa a Mbulum a?» 23Yesuw a gwaɗar aaka: «Na Yàa tsik dukw ana ŋgwal ŋa tsiye ka, ɗifiŋ dər te. Ama na bəla Yàa tsik bazlam gà ka, nda ndzer ana, aàmala na kà lekiŋ a?»
24I fataya ka, Hanas a slər ŋgat a təv Kayafas, batsah mala mandəva kuɗa a Mbulum ata, tsàmbaɗùkkwa madzàwà ŋa hiywe.
Piyer a ɗe bərakə̀zəm a Yesuw asa
Mata 26:71-75; Markus 14:69-72; Luka 22:58-62
25Akahər ata ka, Piyer a riŋ mandza ŋa aà akwa ata hiywe. Gà asiŋ gà mburma ana i fataya, ta gwaɗar: «Kər ana, ilik aà gà ɓəzla mazazama wele aaha ya mbaŋa tsiye?» I fataya ka, Piyer a ɗe bərakə̀zəm a Yesuw asa, a gwaɗa a wele ata: «Iye ka, mala mazazama ŋgat tsa.» 26Ama mìsle ŋgiɗ ilik ika magər gà ɓəzla meslire mala mandəva kuɗa a Mbulum a, damər wele ana Piyer a sàs ihər zləm a, a gwaɗar: «Yàa ŋgat a kurum ilik nda ŋgat i dzèrnè tsiye, dite ki gweɗe a ka, i sər ŋgat tsa ana, meme?» 27Ama Piyer a gwaɗar aaka asa mbaŋa: «Gaa, iye tsa.» I dəba bazlam tar ata ya tsara ka, guŋgwazl a tuwa tsara.
Yesuw i sida ika miɗ Pilatus
Mata 27:1-2,11-14; Markus 15:1-5; Luka 23:1-5
28Aləka aka mbulum ana a də̀v i mèkwède ya ka, ta mah ba i bəra Kayafas a, tə da à Yesuw a ga a bəra Pilatus, mala sik Əbay gà Ruma duwa. Aləka ti ndzeha a fata ka, gà Yahuda tàa pəts a ga a bəra wele ata tsa, aɗaba na tàa da aɗəm ka, tàa wisl aba tar i təv mazəma ɗaf Paska ana ti zim a dər akaba ya. 29Aɗaba taŋa na Pilatus a dara i ga ya, a təv tar a. A gwaɗa a tar: «Kə gə̀sumara wele aaha ya dze ana, a ge la?» 30Ta gwaɗar aaka: «Na ŋgat mala bakal tsəka, mìi gìsere a ŋgat a təv yak a tsa.» 31Pilatus a gwaɗa a tar: «Na kataya ka, dum à ŋgat, ka ta gwimer seriye, kamala ana məpala ahəm kurum a tsik a, dukw kurum.» Ta gwaɗar aaka: «Ama mər kəla ka, mìi sle a aà makə̀ɗà mburma tsa, ta pele a mər a ahəm.» 32Dukw ata a ge ba kataya ka, kamala ana Yesuw a tsik aba a mburma piŋŋe ya, a gwaɗa a tar, i ta mìt a ka, ta hitse a à iye aà dizl, dite i mìt ahər a ya kaɗəŋ.
33I fataya ka, Pilatus a mbəɗ gər a ga. A daha, a zalara a Yesuw a, dite ma daha a təv ŋgar. Aləka a daha ka, a gwaɗar: «Kər ana, Əbay gà Yahuda ya?» 34Yesuw a gwaɗar aaka: «Kà tsik kataya ana, kà dzala i gər yak a, tsəna, mburma a tsikik a?» 35Pilatus a gwaɗar: «Iye ana gà Yahuda ya? Na ti tsikiŋ a ya, gà gwala yak nda gà Əbay gà ɓəzla mandəva kuɗa a Mbulum kurum na ta gìsiŋara kər a tsəna, ahəm gà ya? Dze ana, wànà kàa ge duwa ya?» 36Yesuw a gwaɗar aaka: «Iye ka, Əbay ana ɗa ika gər ahəɗ a tsa. Na mege kataya ka, gà ɓəzla meslire gà ta ge a gùvəl hinne, aɗaba iye, wura à gis a iye a gà bàba gà Yahuda tsa. Ama iye ka, Əbay ana ɗa ika gər ahəɗ a tətsà.» 37Pilatus a gwaɗar aaka: «Tsaka kər ana Əbay dukw ŋgar a?» Yesuw a gwaɗar: «Kataya, iye ka, Əbay kaɗəŋ, kamala ana kà tsik a. I dara ka, aà metsìkè dukw ana ndzer ŋa ya, a gà mburma. Aɗaba taŋa na ta wa ɗa iye ika gər ahəɗ a. Wele ana a sasar ndzer ŋa ya ka, à dze a zləm a dukw ana i tsik a ya.» 38Pilatus a gwaɗar: «Ndzer dze ana, kamala dukùla ya?»
Ta ge seriye məməta aka gər Yesuw
Mata 27:15-31; Markus 15:6-20; Luka 23:13-25
I dəba bazlam ŋgar ata ya ka, Pilatus a dara a təv gà mburma ata ya asa. A dara, a gwaɗa a tar: «Iye ka, Yàa ŋgat bakal ana wele aaha a ge ya tsa. 39Ama kinehe i ge a dər ka, kamala ana kì gewakwa dər a, aɗaba kəla *megirive Paska ana aka ndzera ya ka, i pə̀lawa a kurumaha à mala daŋgay ilik, kərga biy na a sàs a kurum a. Dite a sàs a kurum, i pəl a kurumaha ana, à Əbay gà Yahuda aaha ya?» 40Tar ata tserdze ya, tə tsaraka kataya ka, tə dza akaba bazlam nda Mewideye hinne, ta gwa: «Awaŋ, ŋgat tsa, a sàs a mər ki pìl a ka, à Barabas.» Tsaatsa Barabas ka, mala məbatsa mburma ivaɗ.
Цяпер абрана:
Yuhana 18: gnd
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© Wycliffe Bible Translators, Inc. All rights reserved.