YOHAANNISI 8
8
FOORTANNA AMANDOONNI MANCHO
1[Yesuusi kayinni Ejedhete Ilaala ha'ri. 2Layinki soodo gute galagale Qullaawu Minira dayi. Mannu baaluno isiwa dayenna ofolle rosiisinsa. 3Muse Seeri rosiisaanonna Farisootu foortanna amaddino mancho haadhe abbite mannu mereero uurrissu. 4Yesuusira, «Rosiisaancho, tenne mancho foortanna amandoonni. 5Seerinke giddo Muse togoo mancho kinnatenni ganne shinanni gede hajajino. Ati ma yaattoyya?» yite xa'mitusi. 6Tenne xa'mo xa'mitinosihu, aanasi mite so'ro anfeemmo yiteeti. Yesuusi kayinni uulla heeshshi yee baattote aana qubbichunni borreessi. 7Marro marro higge xa'mituta heeshshi yiinowiinni gotti yee, «Ki'ne giddo cubbu nookkihu hee'riro, balaxe kinchunni ole gano!» yii. 8Xaano galagale heeshshi yee baattote aana borreessi. 9Insano konne coye macciishshite, geerrunni kayisse mittu mittunni fulte hakkiinni hadhu. Kunnira mereeroho uurrite noo mancho ledo Yesuusi callu gati. 10Yesuusino heeshshi yiinowiinni gotti yee, «Tee mancho, insa hiikkitu? Yoo yiihehu mittuno dinoni?» yee xa'mise. 11Iseno, «Mooticha'ya, mittuno dino» yitu.
Yesuusi qole, «Anino busha yoo diyeemmohena ha'ri; kunni ka'a cubbo loossooti!» yiise.]#8:11 Qoqqowu giddo noohu mite mite keeshshitinotera angatenni borreessinoonni borro giddo dino.
YESUUSI BAATTOTE AANA NOO MANNIRA XAWAABBAHO
12Qoleno Yesuusi, «Ani baattote aana noo mannira xawaabbaho; ane hoode ha'rannohu heeshshote xawaabba afi'ranno ikkinnina tunsichoho diha'ramanno» yii.
13Farisootu, «Ati umikki daafira farci'rootto; farci'rakki leddannori dinoote» yitu.
14Yesuusi qole, «Umi'ya daafirano farci'rummoro, hiikkiinni dayommoronna hiikka ha'reemmoro afoommo daafira, yoommori halaaleho. Ki'ne kayinni hiikkiinni dayommoronna hiikka ha'reemmoro diaffinoonni. 15Ki'ne mannu hedo garinni yoo yitinanni; ani ayerano busha yoo diyeemmo. 16Yoo yeemmohano ikkiro, ani calla'ya ikkoommokki daafira yoo'ya halaaleho; soyinoehu anni'ya ledo'ya no. 17Lamu manchi farci'riro ku'linoonni coyi halaale ikkannota seeri'ne giddo borreessineenna no. 18Kunnira, anere ani farci'reemmo; soyinoehu Anni'yano anere farci'ranno» yii.
19Insa qolte, «Annikki hiikko no?» yitu.
Yesuusi, «Aneno anna'yano diegentinoonni. Ane egentinoommero Anna'yano egentinanni» yee qolinsa. 20Yesuusi konne coye coyi'rinohu Qullaawa Mine woxe tunganni ogori mule rosiisanni hee'reeti. Yannasi iillitinokki daafira, mittuno angatenni dikisinosi.
ANI HA'REEMMOWA KI'NE DAGGINE DIAFFINANNI
21Xaano Yesuusi, «Ani ha'reemmo; ki'ne ane hasidhinanni; qoltineno cubbi'nenni reyitinanni; ani ha'reemmowano daggine diaffinanni» yiinsa.
22Ayihudete gashshaano kayinni, «‹Ani ha'reemmowa ki'ne daggine diaffinanni› yaannohu isonoo shaa hasi'reeti ikka?» yitu.
23Yesuusi lede, «Ki'ne uullanniiti; ani kayinni iiminniiti. Ki'ne tenne gobbareeti; ani kayinni tenne gobbaha di"ikkoommo. 24Cubbi'nenni reyitinanni yoommohu kunniraati. Ane ewelumma affine ammana hoogginiro cubbi'nenni reyitinanni» yii. 25Insano, «Ati ayeti?» yite xa'mitusi.
Yesuusino, «Xaa geeshsha kulummo'ne aneeti. 26Coyi'reemmorinna yeemmori ki'neri lowori nooe. Ikkollana soyinoehu halaalaanchoho. Ani tenne gobba mannira coyi'reemmorino isiwiinni macciishshoommoho» yee qolinsa.
27Insa kayinni Annisire kulanni noonsata diaffino. 28Kunnira Yesuusi, «Manchi Beetto suttinanni woyite Ani Ane ikkoommota affinanni. Anni'ya rosiisinoere ikkinnina, ani umi'ya wolqanni mittoreno asseemmokkita hatte yannara buuxxinanni. 29Soyinoehu ane ledo no. Wo'manka woyite iso hagiirsiisannore asseemmo daafira calla'ya diagurannoe» yiinsa. 30Yesuusi konne coye coyi'rita lowo manni ammani.
HALAALU BOROJJIMMATENNI FUSHSHANNO'NE
31Yesuusi iso ammantino Ayihudoota, «Rosiisoommo'ne coye agadhitiniro halaalenka rosaano'ya ikkitinanni. 32Halaale affinanni; halaaluno borojjimmatenni fushshanno'ne» yiinsa.
33Insa kayinni, «Ninke Abirihaami sirchooti; borojjimmate hiramme diegenninoommo; ati hiitto ‹Borojjimmatenni fultinanni› yaattonke?» yitu.
34Yesuusi qole, «Halaale kuleemmo'nena, cubbo loosannohu baalu cubbu borojjichooti. 35Borojjichu mini beetto di"ikkanno; illoonnihu kayinni geedote geeshsha minella hee'ranno. 36Kunni daafira Beettu borojjimmatenni fushshi'nero, addintanni borojjimmatenni fultinanni. 37Abirihaami sircho ikkitinoonnita afoommo; ikkollana, qaali'ya giddo'ne nookkihura, shitinaera hasidhinanni heedhinoonni. 38Ani, Anni'ya leellishinoere coyi'reemmo; ki'neno anni'ne kulino'nere assitinanni» yiinsa.
39Insa, «Anninke Abirihaamiiti» yituta, Yesuusi kayinni, «Abirihaami ooso ikkitinoommero Abirihaami assinore assitinanni. 40Ani anni'yawiinni macciishshoommo halaale kuloommo'ne; ki'ne kayinni, shitinaera hasidhinanni. Abirihaami hattoo looso diloosino. 41Ki'ne anni'ne loosanno looso loossinanni» yiinsa.
Insa qolte, «Ninke darchoho ilammoommore di"ikkinoommo. Noonke Anni Magano callaho» yitu.
DAAWULOOSI OOSO
42Yesuusi lede, «Maganu Anna'ne ikkoommero, ane baxxinannie; ani Maganuwiinni daye konne noommo. Soyinoehuno isooti ikkinnina, ani umi'ya roorrenni didayommo. 43Ani yeemmori mayira leella giwi'ne? Coyi'reemmore buuxa dandiitinannikki daafiraati. 44Ki'ne anni'ne Daawuloosi oosooti. Anni'ne hedinore wonshitinara hasidhinanni. Isi bi're hundanni manna shiinoho. Halaalu isiwa hoongohura, halaalu ledo horonta xaadu dinosi. Isi kaphaanchonna kaphu anna ikkinohura, kapho coyi'ranno woyite rosinorella assanno. 45Ani kayinni halaale coyi'reemmohura diammantinannie. 46Ki'ne giddo ane, ‹Cubbaataamoho› yaannohu ayeti? Halaale coyi'rummona, mayira ammana gibbinieyya? 47Maganunnihu Maganu yaannore macciishshanno. Ki'ne Maganu qaale macciishshitinannikkihu Maganunnire ikka hoogginoonnihuraati» yiinsa.
YESUUSI ABIRIHAAMIRA ALBAANNI NO
48Ayihudootu, «Ati Samaarichaho; durriisuno noohe yaankera ninke digaraho?» yitu. 49Yesuusino, «Anera durriisu dinoe. Ani Anna'ya ayirriseemmo; ki'ne kayinni ane shollishshinannie. 50Ani umi'ya ayirrinye dihasi'reemmo; ayirrinyu hasiisannosihunna yoo yaannohu kayinni mittu no. 51Halaale kuleemmo'nena, qaale'ya agadhannohu horonta direyanno» yiinsa. 52Ayihudootu, «Durriisu nooheta xa anfummo; Abirihaami reyino; himanaanono reyitino. Ati kayinni, ‹Qaale'ya agadhannohu horonta direyanno› yaatto. 53Ati reyiha annanke Abirihaami rooratto? Himanaanono reyitino! Ati atenee ayeti yite hedatto?» yitu. 54Yesuusi daware, «Ani umo'ya ayirrisummoro ledannori dino. Ane ayirrisannoehu Anna'yaati; isi ‹Maganonkeeti› yitinanniho. 55Ikkollana ki'ne iso diaffinoonni; ani kayinni iso egennoommo. Ani iso diegennoommo yuummoro ki'nente gede kaphaancho ikka'yaati. Iso egennoommo; qaalesino agadheemmo. 56Anni'ne Abirihaami ane barra lae hagiidhate halchino; afe kae hagiidhino» yiinsa. 57Ayihude, «Atera ilamittonkunni 50 diro nafa di"ikkinohena, ‹Abirihaami afoommo› yaattonso?» yitu. 58Yesuusino, «Halaale kuleemmo'nena, Abirihaami ilamara albaanni ani noommo» yii. 59Kunnira Ayihudootu kinnatenni gantasira ka'u. Yesuusi kayinni insara leellikkinni Qullaawu Mininni fule ha'ri.
Цяпер абрана:
YOHAANNISI 8: QulMax
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© The Bible Society of Ethiopia; Sidama Holy Bible BSE-UBS 262 P 2014