Eyɔɔ 1
1
1Ene eklada ese èga wɛ à shi dye mwɔ̀. Èga wɛ à ne mwɔ nè Ngwe. Èga wɛ ma Ngwe. 2Engɔ à ne mwɔ nè Ngwe nyɛrɛ ene eklada. 3Ngwe à ndeere ela gimkpaʼ nyɛrɛ zeʼ achim engɔ. Tsɛ̀ʼ ala deʼ aŋwaʼ yɛ â shi dye mwɔ, yɛ â ndèerè tɔrɔ engɔ ngɛ bo. 4Etyê à zeʼ achim engɔ. Etyê wunɔ mwɔ ekɛʼ ebe bɔ. 5Ekɛʼ wunɔ na pɛ akwâ di, adi̧iri zɔnɔ ne me né nyiimi ekɛʼ wunɔ bo. 6Ngwe à saa ghontɔm mɔ ekumu ngɔ mwɔ Eyɔɔ. 7Engɔ à zeʼ é ga ebe bɔ mbɔʼ engɔ wɛ à mwɔ ngɛ mbɔʼtye bɔ zo ekɔn wɛ gɛ̀rɛ̀ bɛ̀rɛ. 8Eyɔɔ mɔmbwo à ke me ekɛʼ wɛ bo. Engɔ à zeʼ é gà ebe bɔ mbɔʼ egho wɛ à mwɔ ne ekɛʼ wunɔ ngɛ. 9Ekɛʼ éŋwaʼa wunɔ wɛ Eyɔɔ à ma ga ngɛ â zeʼ efwɔ ese é pɛ ebe bɔ gimkpaʼ 10Ega Ngwe wunɔ à ne efwɔ ese ka Ngwe à de me ndeere ese achim engɔ. Bɛʼngɛ bɔ efwɔ ese à ke nɛɛ engɔ bo. 11Engɔ à zeʼ abɛ mɔ bɔ ngɔ ne nu engɔ bo. 12Bɛʼngɛ abɔ deʼ à nu engɔ gɛ̀rɛ̀ bɛ̀rɛ ene ekumu ngɔ. Éngɛ engɔ ndɛ̀ʼ ekama ebe angɔ é mwɔ bwɔ Ngwe. 13Angɔ à ke mwɔ bwɔ Ngwe na bɔ ma bê bwɔ nɔ bo. Na Ngwe à le kpe angɔ mwɔ bwɔ mbe. 14Ega Ngwe wunɔ à firi shi gho, gɛ̀rɛ̀ sa mwɔ abwaʼ bɔ, ntsɔ shi zɔ enɛŋɛrɛkɛ ngɔ, enɛŋɛrɛkɛ yɛ engɔ à le na ŋwɔ Ngwe ŋwaʼ wɛ è me shwe ene enarataa gɛ̀rɛ̀ shi tee ebe bɔ éŋwaʼaŋwâʼ aŋu Ngwe mwɔ ngɛ. 15À na mbɔʼ engɔ wɛ Eyɔɔ à ma gà ebe bɔ ma flaba akwâ kpe, “Ewùnɔ ne engɔ wɛ mmɛ à ga mbɔʼ engɔ kpe ‘Egho wɛ ma zeʼe achim ndza ngɛ we fɔɔ angu mbɔʼnga â sa be angu engɔ shi dye mwɔ’ ” 16Enyɛrɛ zeʼ ene enarataa yɛ e me shwe ebe ngɔ ngɛ, ntsɔ shi le m̀bɔ̀nɔ Ngwe, a dama ngɔ̀ɔ ngɔɔ embè embè. 17Ngwe à ndɛʼ etsɛrɛ ebe bɔ zeʼ achim Mose. Enarataa Ngwe mane abwa gimkpaʼ yɛ mwɔ éŋwaʼaŋwâʼ ngɛ â fɔɔ eblabwo Yeso Kristo 18Tsɛ̀ʼ gho deʼ shi zɔ Ngwe bo, à tye ŋwɔ Ngwe ŋwaʼ chwɛ̀ʼ, wɛ engɔ mɔmbwo ma Ngwe gɛ̀rɛ̀ me tini ebara àtɛ wɛ à shi le bɔ nɛɛ egho wɛ Ngwe mwɔ ngɛ.
Eyɔɔ gà kpe mbè ke ma Kristo wɛ bo
19Ebwa wɛ eto ebe bɔ Juu a Jerusalɛm â saa ètɛ zhiri mane bɔ ekla Lɛvi kpe angɔ ngɔɔ biiri ebe Eyɔɔ ngɛ ne ga kpe, “Ngwo na awɛ?” 20Aŋu angɔ à ngɔɔ ngɛ Eyɔɔ ga éŋwaʼa mɔ ebe angɔ kpe, “Mmɛ ke ma Ǹtɔmzhwaʼa bo.” 21Angɔ wu biiri ebe engɔ kpe, “Éngɛ ngwo shi na awɛ? Ngwo ne Elayja?” Engɔ gii kpe, “Mmɛ ke me Elayja bo.” Angɔ gɛrɛ wu biiri ebe engɔ kpe, “Ngwo na àmɛnɛkɔn Ngwe?” Engɔ gii kpe, “keʼ nɔ.” 22Angɔ ga ebe engɔ kpe, “Éngɛ ngwo na awɛ? Gii ega endyɛɛ mbɔʼtye mbyɛɛ dù gà ebe abɔ byɛ a me tɔmɔ angbɛɛ ngɛ. Ngwo ga kpe ayɛ mbɔʼ ngwo?” 23Éngɛ Eyɔɔ gii aŋu Àmɛnɛkɔn Ngwe Azaya à ga kpe, “Mmɛ na gho deʼ wɛ e ma zɔʼ ebɔrɔńked kpe ‘Todo aghɛʼnji ebe Masakɛ mbɔʼtye engɔ ma zhiri anyi.’ ” 24Na bɔ Farisii â tɔm abɔ byɛ â ma biiri abwa ebe Eyɔɔ ngɛ. 25Angɔ ngudu biiri kpe, “Ngwo ke ma Ǹtɔmzhwaʼa bo, kà Elayja bo kà àmɛnɛkɔn Ngwe bo, Ngwo shi na ndɛʼ ndim ebe bɔ ene ebwa yɛ?” 26Eyɔɔ gii kpe, “Mmɛ na ndɛʼ endɔn tye ndim, bɛʼngɛ gho deʼ we tama abwaʼ ndzɔn wɛ mbɔn ne me nɛɛ engɔ bo ngɛ. 27Engɔ wa zeʼ achim ndza, mmɛ ke koʼro é zɛ̀ɛ anduʼ ebla ngɔ bo.” 28Abwa zɔnɔ àgimkpaʼ â gli abɛ Bɛtani anjid eji Joodan ze, afwɔ yɛ Eyɔɔ à ma ndɛʼ ndim ngɛ. Eyɔɔ à bɛrɛ antsɛ ebe Yeso.
Yeso na ŋwɔ Ngwe
29À tam enchwe aŋu Eyɔɔ zɔ Yeso ma zhiri à zeʼe efàarà ngɔ, è ga kpe, “Mbɔn kɔʼɔ anɔ ŋwɔ ǹglɔ̀ Ngwe wɛ è ma bwɛ abwa bɔɔbɔɔ bɔ efwɔ ese ngɛ. 30Ne egho wɛ mmɛ à ga mbɔʼ engɔ èndzobo chɛ mmɛ à ga kpe ‘Egho wɛ e ma zeʼ achim ndza ngɛ we fɔɔ angu mbɔʼnga engɔ à shi dye mwɔ ka mmɛ sa zeʼ ngɛ.’ 31Mmɛ mɔmbwo à de ke nɛɛ engɔ bo. Mmɛ à zeʼ ma ndɛʼ tye ndim mbɔʼtye bɔ Israel nɛɛ engɔ.” 32Eyɔɔ à ga kpe, “Mmɛ zɔ azhwɛɛrɛ pɛ kla zèʼe ezob ne ḿblɔ̂m nɔ è bara ekwa ngɔ. 33Mmɛ mɔ de ne nɛɛ engɔ bo, bɛʼngɛ Ngwe yɛ à sàa angu é ndɛ̀ʼ ndim ngɛ kpe ena ‘Egho wɛ ngwo zɔ azhwɛɛrɛ kla è bara ekwa ngɔ ngɛ ngwo nɛɛ kpe ne engɔ wɛ è ma ngo ndɛʼ ndim ene azhwɛɛrɛ ngɛ.’ 34Mmɛ shi zɔ abwa gimkpaʼ mmɛ gà endɔn kpe engɔ na ŋwɔ Ngwe.”
Bɔ bɛɛrɛ abwa mbèmbè Yeso
35Ese nɔ keʼ nɔ, Eyɔɔ gɛrɛ wu shi aŋu nè bɔ bɛɛrɛ abwa mɔ fyee. 36Èndzobo chɛ Eyɔɔ à zɔ Yeso sa fɔɔ ngɛ, engɔ gà ebe angɔ kpe, “Kɔʼɔ ŋwɔ ǹglɔ̀ Ngwe we è ma fɔɔ.” 37Aŋu abɔ bɛɛrɛ abwa byɛ à zo engɔ ga énde ngɛ, angɔ kiri Yeso. 38Yeso ghɛ̀ɛbɛ amɔ è zɔ angɔ ma kìrì engɔ, engɔ biiri ebe angɔ kpe, “Mbɔn ke ayɛ?” Angɔ ga kpe, “Rabbi,” éngɛ me ga kpe, “Àtee abwa, ngwo na tsɔmɔ awe?” 39Yeso gíì ebe angɔ kpe, “Mbɔn zeʼ zɔ.” Éngɛ angɔ ngɔɔ zɔ afwɔ yɛ engɔ à ma tsɔmɔ ngɛ. Angɔ à zhii anji yɛ nè engɔ bwɛn etiʼdi. 40Andere ghongwa Shimun Petoro, à ne egho bi abwaʼ abɔ fyee byɛ â zo ebwa wɛ Eyɔɔ à ga gɛ̀rɛ̀ kìrì Yeso ngɛ. 41Ebwa mbèmbè wɛ Andere à le ngɛ à ne é zɛʼ ghongwa mɔ Shimun é gà ebe engɔ kpe, “Mbyɛɛ shi zɔ Ǹtɔmzhwaʼa wɛ ma Kristo ngɛ” 42Éngɛ e nu engɔ zeʼe ebe Yeso, Yeso kede engɔ ga kpe, “Ngwo na Shimun ŋwɔ Eyɔɔ, e ba sa zɔʼrɔ awɛ kpe Sɛfas, éngɛ me ga kpe Petoro wɛ mwɔ ekob ngɛ.”
Yeso zɔʼ Firiboʼ mane Nathanɛɛl
43Ese nɔ keʼ nɔ Yeso ndeere amɔ ngɔɔ abɛ Galilii. Yeso zɔ Firiboʼ ga ebe engɔ kpe, “Kiri angu.” 44Firiboʼ, Andere mane Petoro à na bɔ Bɛtsayda. 45Firiboʼ zɔʼ Natanyɛ ga ebe engɔ kpe, “Mbyɛɛ shi zɔ egho wɛ Mose à ŋwɛʼrɛ mbɔʼ engɔ efwɔ aŋwɛʼrɛ ngɛ. Àmɛnɛkɔn Ngwe gɛ̀rɛ̀ ŋwɛ̀ʼrɛ̀ amɔ ngɛ, Yeso gho Nazarɛd ŋwɔ Yɔsɛf ngɛ.” 46Natanyɛ biiri kpe, “Ngwo de kpe Nazarɛd? Ebwa ǹchwɔ̀ deʼ we né gli a Nazarɛd?” Firiboʼ gii kpe, “Zeʼ zɔ eghɔɔ.” 47Aŋu Yeso à zɔ Natanyɛ ma zeʼe ngɛ, Yeso ga mbɔʼ engɔ kpe, “Kede gho Israel mɔmbwo wɛ è ma le abwa yɛ a me koʼro ngɛ.” 48Natanyɛ biiri ebe Yeso kpe, “Ngwo a da nɛ̀ɛ angu ene?” Yeso gíì kpe, “Mmɛ a zɔ awɛ endzobo ngwo à bli enji azɔd akla dye Firiboʼ sa zɔʼ awɛ ngɛ.” 49Éngɛ Natanyɛ ga apɛpɛ kpe, “Àtee abwa ngwo na ŋwɔ Ngwe, m̀fɔ̀ bɔ Israel” 50Éngɛ Yeso biiri kpe, “Ngwo bɛ̀rɛ mbɔʼnga mmɛ ga kpe mmɛ a zɔ awɛ enji azɔd akla. Ngwo wa ngo zɔ abwa kamakam fɔɔ ewunɔ.” 51Yeso fɔɔ embè zhiiri kpe, “Mmɛ ga engɛ̂ éŋwaʼaŋwâʼ kpe ngwo wa ngo zɔ ezob fuʼ engere Ngwe ma kwaʼa gɛ̀rɛ̀ ma kla edɔm Ŋwɔ Gho.”
Цяпер абрана:
Eyɔɔ 1: nbt
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© 2022, CABTAL