Zenez 3
3
Premie pese Limanite
1Serpan pli rize ki tou bann zanimo sovaz ki LESEGNER Bondie finn kre. Serpan dimann fam la: “Eski vremem Bondie finn dir zot pa manz okenn fri ki trouv dan zardin?” 2Fam la reponn li: “Non, nou kapav manz bann fri ki dan zardin. 3Me Bondie finn defann nou manz fri lor pie ki trouv omilie zardin. Li finn mem defann nou tous fri la, sinon nou pou mor.” 4Me serpan la dir li: “Manti sa, zot pa pou mor zot. 5Bondie kone ki si zot manz sa fri la, zot lizie pou ouver. Zot pou vinn kouma Bondie e zot pou gagn enn gran konesans.” 6Fam la trouv sa fri la bien atiran e bon pou manze. Fri la donn anvi manze pou gagn lasazes. Lerla, li kas enn fri e li manze. Li donn enn bout so mari ki avek li e li osi manze. 7Deswit, zot lizie ouver e zot realize ki zot touni. Zot atas bann fey fig ansam e zot kouver zot lekor.
8Ler pre pou aswar, enn ti labriz soufle. Zot tann LESEGNER Bondie pe mars-marse dan zardin. Zot al kasiet deyer bann pie pou li pa trouv zot. 9Me LESEGNER Bondie apel zom la e dimann li: “Kot twa?” 10Li reponn: “Mo finn tann twa pe marse dan zardin. Mo finn gagn per e mo finn al kasiet akoz mo touni.” 11LESEGNER Bondie dimann li: “Kouma to kone to touni? Eski to finn manz fri ki mo finn defann twa manze?” 12Zom la dir: “Sa fam ki to finn donn mwa la sa. Li finn kas fri lor pie la, li finn donn mwa e mo finn manze.” 13LESEGNER Bondie dir fam la: “Kifer to finn fer sa?” Fam la reponn: “Serpan la finn anbet mwa, akoz sa mo finn manze.”
Zizman Bondie
14LESEGNER Bondie dir ek serpan la:
“Akoz to finn fer sa, mo modi twa
parmi tou bann zanimo.
To pou ranp lor to vant,
e to pou manz lapousier
toulezour ki to viv lor later.
15Pou ena laenn ant twa ek fam la,
ant to desandan ek so desandan.
Zot pou rod kraz to latet,
e twa to pou rod mord zot talon.”
16Lerla, LESEGNER Bondie dir fam la:
“Mo pou ogmant douler to groses,
e to pou soufer kan to gagn zanfan.
Twa, to pou atire ar to mari,
me li, li pou dominn twa.”
17Lerla, LESEGNER Bondie dir zom#3:17 Adam la:
“To finn ekout to fam,
To finn manz sa fri la.
Pourtan, mo ti donn twa enn lord,
mo ti defann twa manz sa.
Asterla, akoz twa later pou modi.
Toulezour to pou bizin trime
pou gagn to bouse manze.
18Later pou prodwir pikan ek move-zerb pou twa,
e to pou bizin manz seki pouse dan karo.
19To pou transpire toulezour
pou to gagn to dipin
ziska ki to retourn dan later,
later kot to finn sorti.
Ek lapousier to finn pran nesans,
dan lapousier to pou retourne.”
20Adam apel so fam Ev, ki vedir vivan. Limem mama tou bann imin lor later. 21LESEGNER Bondie fer bann linz ar lapo zanimo e abiy zom la ek so fam.
22Lerla, LESEGNER Bondie dir: “Asterla zom la finn vinn kouma noumem. Li finn gagn enn gran konesans. Tansion li avoy lame, li kas fri dan pie ki donn lavi e li manze. Lerla li pou viv pou touzour.” 23Ala kifer LESEGNER Bondie pous zot depi dan zardin Eden. Zom la bizin al travay later kot finn tir li. 24Apre sa LESEGNER Bondie met enn bann anz pou gardien lantre zardin. Zot ena bann lepe ki kas dife e ki tourn dan tou direksion. Zot servi sa pou gardien sime ki al kot pie ki donn lavi.
Цяпер абрана:
Zenez 3: KMOTPOR
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Kreol Morisien OT Portions © Bible Society of Mauritius, 2020.