Malimo ga Vatume 1
1
UYesu aahuuviidze ukwadza kwa Mubepo uMwimike
1Ve mutambule Tyofilo, mu kitabu kyangu kya kutala,#1:1 Kitabu kyangu kya kutala Kwe kutigila, ikitabu kya Luka. ndaasimbile dzonda dze aalimaga nu kuwulanidza uYesu ukuvangila pa wutalilo, 2ukufikila ikigono kye iinuliilwe ukuhelela kukyanya. UYesu pe asinaa iinulwa ukuhelela kukyanya, avapeeliye avatume ve avahaaguwe, uwulagidze wa malimo ge vahadza viilimaga wugendela mwa Mubepo uMwimike. 3Umusika ugwa figono makyumi gatayi (40) ukuvangila ukudzulubuka kwakwe, avahumilaga nyakoloofu ukwiwoneesa ukutigila, muumi. Kangi avalongelaga imola idza wutwa wa Nguluvi.#1:3 Wutwa wa Nguluvi Lole Uwutwa wa Nguluvi ku Figanulo.
4Ikigono kimwinga, uYesu pe aali mu kuliya navo, avalagiye iitigilaga, “Mutane ukuhega mu Yelusalemu umu, nda haamu, mudzindilage ukufikila pe mulaavedza mwánukiye uluhuuvidzo lwa Daada, ngita kye mwapuliike ukwangu. 5UYohana aadzabikaga avaanu nu lulenga, neke kangi pe fídzumbile ifigono fikeefu, unyeenye muhadza mwidzabikwa mwa Mubepo uMwimike.”#1:5 Muhadza mwidzabikwa mwa Mubepo uMwimike Lole Ukudzabikwa mwa Mubepo uMwimike ku Figanulo.
UYesu iikwinuka ukuhelela kukyanya
6Avatume va Yesu pe vaalundiine pamwinga nave, vakumuwuudzaga viitigilaga, “Ongo Mutwa, ugu gwe musika gwe ukuvapiluhidza aVaisilaheli uwutwa waawo?” 7Akuvahigaga iitigilaga, “Si lwenyo ukudzeela ikivalilo, nambe misika gye aaviikile uDaada mu wutawulilwe waakwe. 8Neke kangi muhadza mwikwanukila ingufu pe iivedza ávaadziye uMubepo uMwimike, na yuunye muhadza mwivedzaga voolesi vangu mu Yelusalemu, mu mugoola gonda ugwa Yudeya, nu gwa Samalya, ukufikila ku wudugilo wa nyi.”
9UYesu pe aaviye álongile idzo, baaho na baaho iikwinukaga kukyanya aveene pe valola. Ilifunde likumugubikaga, vasamuweene kangi. 10Umusika guugo pe iihelela kukyanya, aveene pe vángʼanwike amiiho viilola kwe iihelela, viiwonaga baaho avamwadaada vavili, váfwalile imyenda mivalafu, víimile biihi navo. 11Viitigilaga, “Vamwadaada va mu Galilayaanye, kye kiki mwímile múngʼanukiye amiiho kukyanya? UYesu uyu ye áhumile ukwenyo nu kwinuka ukuhelela kukyanya, alaapiluka ndeeni ngita kye múmuweene pe iihelela.”
UMatya iihaagulwa ukuhomela pa Yuda
12Neke avatume vahegage apo pa kidunda ikiitambulwa kya Miseyituni, vapilukage ku wudzenge wa Yelusalemu, uwaali lugendo lwa kilometa yimwinga ukuhuma ku kidunda ikyo. 13Pe viingiye mu wudzenge, viihelelaga ku goloofwa ku kiyumba, kwe viikalaga. Avatume avo vaali uPetulo, uYohana, uYakobo, uAndeleya, uFilipo, Tomasi, uBatolomayo, Matayo, uYakobo muswamuve va Alufwayo, uSimoni Muselote,#1:13 Muselote AVaselote kyali kiwungu mugati mwa Vayahudi, avaagalwike ukuhuma ku wutemi wa Wuloma, pakuva vaasakaga uwutemi waawo. nu Yuda muswamuve va Yakobo. 14Vonda avo vuumiililaga mu kulapangila kwa Nguluvi mutima gumwinga, pamwinga nu Maliya ungʼina va Yesu, avamwayuuva avangi, na vanyalukolo va Yesu.
15Mu figono ifyo, avaanu avamufuuviilwe uYesu, vaali ngita ligana limwinga na makyumi gavili (120). Neke uPetulo iimage pagati apaawo, 16avalongelage atigilage, “Vafuuwa vayangu, amadzwi wiimila wa Yuda ye aalongwidze avaanu avamwibiite uYesu, ge aalongile uMubepo uMwimike kataali kugendela umutwa Dawudi, lino gákwiliidzwe. 17UYuda aali yumwinga naafwe twe vatume, kangi aahangile naafwe mu malimo aga.”
18Uyu aanukiye amagoobeli wiimila wa wuhosi waakwe, iigulaga umugunda.#Matayo 27:6-8 Mu mugunda ugo, mwe mwene mwe aaguwe kinyalileme, ilileme liipwefukaga nu wutumbu wonda wiisevenukilaga kwivala. 19Imola iyo yiipulisaga ku vaanu vonda avakwikala ku Yelusalemu. Neke umugunda ugo, vagupeelage ilitaawa Akeludama mu ndongele yaawo, kwe kutigila Mugunda gwa Danda.
20UPetulo iiginaga ukulonga ukutigila, “Idzo dze dzeene idzaasimbiilwe mu kitabu kya Ndzimbililo ukutigila,
‘Uwiikalo waakwe wuvedzage lihaame,
kitasigala muunu ye avedzaga uva kwikala umo.’#Ndzimbililo 69:25
“Kangi ukutigila,
‘Mu malimo ga wimiilidzi waakwe, ahomelage uyungi.’#Ndzimbililo 109:8
21“Wiimila wa ulo, lwivagila tumuhaagule umwadaada uyungi mu avo avaali pamwinga naafwe umusika gonda uMutwa Yesu pe aali umwesu, 22ukuvangila umusika uYesu pe iidzabikwa nu Yohana, ukufikila ikigono kila uYesu pe iinyamulwa ukuhuma ukwesu kuhelela kukyanya. Umuunu uyo avedzage moolesi pamwinga naafwe ukutigila, uMutwa Yesu ádzulubwike ukuhuma ku wulungu.”
23Viitambulaga amataawa ga vamwadaada vavili. Yumwinga aali ye Yosefu, ye aatambulwaga Balisaba enewuli Yusito, uva kavili aali ye Matya. 24Neke valapangilage kwa Nguluvi vatigilage, “Mutwave, údzikaguwe dzonda idzili mugati mu numbula dza vaanu vonda. Lino utuwoneese uyo ye úmuhaaguwe mu vavili ava, 25ukuta ahomele ukulima amalimo ga wutume ge akagalekile uYuda, pe aafuwe nu kuhelela apakumuvagila umwene.” 26Viisoolanilaga ulusolo#1:26 Viisoolanilaga ulusolo AVayahudi vaasimbaga amataawa ga vaanu mu maganga madoodo nu kugaviika gonda mu likopo. Vaadzugunaga ukufikila iliganga limwinga pe liihuma nu kuguwa paanyi. Iliganga ilya kutala, ilinya litaawa lya muunu ílitalile ukuhuma, uyo ye mwene ye vaatigilaga áhaaguliilwe. Vaafuuwaga ukutigila, uNguluvi álongwidze imilamulile, Selengo 16:33. mu vaanu vavili avo, ulusolo lukumugwilaga uMatya, nave iikoongeledzwaga mu luvalilo ulwa vatume vanyikyumi na yumwinga (11).
Цяпер абрана:
Malimo ga Vatume 1: BEZ
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© 2022 Wycliffe Bible Translators, Inc. All rights reserved.