Yohana 20
20
UYesu iidzulubuka
(Matayo 28:1-8; Maluko 16:1-8; Luka 24:1-12)
1Ikigono ikya Mulungu pe kwaviye kwitandaaluka, uMaliya Magadalena iihelelaga ku mombwe ya Yesu. Iiwonaga iliganga ilyo líhedziidzwe pa mulyango gwa mombwe. 2Iihegaga apo, iihelelaga iinyila kisaatu kwa Simoni Petulo nu kwa munyigendwa uyungi, ye eendiilwe hiilo nu Yesu. Akuvalongelaga iitigilaga, “Avaanu váhedziidze umufimba gwa Mutwa mu mombwe, tusiidzeela kwe váguviikile!” 3Neke uPetulo nu munyigendwa uyungi uyo vahegage, vahelelage ku mombwe. 4Vonda vavili vaanyilaga umusika pe viihelela, neke kangi umunyigendwa uyo anyilage hiilo ukumulutila uPetulo, atalage ukufika ku mombwe. 5Iigundamaga, iilolaga mugati mu mombwe, akugiwonaga imyenda gye vakamusiiliye uYesu, neke kangi atanage ukwingila mugati.
6USimoni Petulo akumuniniilaga, iifikaga apo, iikwingilaga mu mombwe, nave akuguwonaga umwenda muvalafu guli baaho. 7Kangi akuguwonaga umwenda ugwali gúpilingiidzwe ku mutuwe gwa Yesu guli baaho, neke kangi umwenda ugo gwaviliiswe nu kuviikwa gwene, pa lubali pa mwenda ugungi umuvalafu. 8Neke umunyigendwa uyungi uyo, ye aali átalile ukufika apo, nave iingilage mu mombwe. Iilolaga, umusika guugo iifuuwaga. 9Ukufikila umusika ugo, avanyigendwa va Yesu vaali vasinaa vagafika amadzwi agaasimbiilwe mu Wusimbe uWiimike ukutigila, uYesu munya kudzulubuka ukuhuma ku wulungu.#Yohana 2:22 10Neke avanyigendwa avo vawuyage ukwawo.
UYesu akumuhumila uMaliya Magadalena
(Matayo 28:9-10; Maluko 16:9-11)
11Neke kangi uMaliya Magadalena asigalage íimile baaho piivala pa mombwe, iivemba. Umusika apila avemba, iigundamaga, iilolaga mu mombwe, 12akuvawonaga avanyamwandza vavili váfwalile imyenda mivalafu, víikalile apoono apakali nu mufimba gwa Yesu, yumwinga ku mutuwe, uyungi ku magulu. 13Avanyamwandza avo vakumuwuudzaga viitigilaga, “Mwayuuvaave, kye kiki wiivemba?” Akuvahigaga iitigilaga, “Avaanu váhedziidze umufimba gwa Mutwa vangu, lino sindiidzeela kwe váguviikile!”
14UMaliya pe aaviye álongile amadzwi ago, iiseedukaga kumbele, akumuwonaga uYesu íimile baaho. Neke kangi asamukaguwe ukutigila, ye Yesu. 15UYesu akumuwuudzaga iitigilaga, “Mwayuuvaave, kye kiki wiivemba? Ukumutemula ani?” UMaliya aahoodzaga ukutigila, umuunu uyo ye mulima-malimo va mugunda, neke amuhigage atigilage, “Ve mutwave, ngana ye veeve ye úhedziidze umufimba gwakwe, uundongele kwe úviikile, uneene ndihadza ndiihelela ukunyamula.” 16UYesu akumukemeelaga ilitaawa lyakwe iitigilaga, “Maliya!” UMaliya iiseedukaga, akumuwonaga uYesu, iilongaga mu ndongele ya veeneka iitigilaga, “Laboni!” Kwe kutigila, “Muwulanidzi.” 17UYesu iihigaga iitigilaga, “Uundeke, utane ukuundzabaasa. Pakuva ndaave ndisinaa ndiinuka ukuhelela kukyanya kwa Daada. Neke kangi uhelelage ukavalongele avanyalukolo#20:17 Avanyalukolo Kwe kutigila, avanyigendwa va Yesu. vangu ukutigila, ndiihelela kukyanya kwa Daada ye ali Dadiinyo, kwa Nguluvi vangu ye ali Nguluvi veenyo.” 18UMaliya Magadalena iihelelaga ku vanyigendwa va Yesu, akuvalongelaga imola idzo, iitigilaga, “Uneene ndímuweene uMutwa!” Neke avalongelage dzonda dze ámulagiidze uYesu.
UYesu akuvahumila avanyigendwa vaakwe
(Matayo 28:16-20; Maluko 16:14-18; Luka 24:36-49)
19Ikyamihe kya kigono kiikyo, avanyigendwa va Yesu vaalundiine mu nyumba yimwinga, ni ndzidzi dzaali dzídindiilwe, pakuva vavoogopaga avalongodzi va Vayahudi. Baaho na baaho uYesu akuvahumilaga, iikwimaga pagatinagati apaawo, akuvahungilaga iitigilaga, “Ulutengamaso luvedzage naanye!” 20Pe aaviye álongile amadzwi ago, akuvawoneesaga amawoko nu lubafu lwakwe. Avanyigendwa pe vamuweene uMutwa, viikeelaga mbandu. 21UYesu akuvahungilaga kangi iitigilaga, “Ulutengamaso luvedzage naanye! Ngita uDaada kye áanumile uneene, na yuune ndikuvatuma unyeenye.” 22Pe aaviye álongile amadzwi ago, akuvapuulilaga umuuya, akuvalongelaga iitigilaga, “Mwanukilage uMubepo uMwimike. 23Ngana mukuvapyanila avaanu indzanangifu dzaawo, uNguluvi nave akuvapyanila avo. Ngana musikuvapyanila, uNguluvi nave asikuvapyanila avo.”
UYesu akumuhumila uTomasi
24Umunyigendwa yumwinga mu vanyigendwa va Yesu vanyikyumi na vavili (12), ilitaawa lyakwe Tomasi, ye vamukemeelaga Munya wungungu, asaali pamwinga na vanyigendwa avangi, umusika uYesu pe akuvahumila. 25Neke avanyigendwa avangi avo vamulongelage vatigilage, “Uneefwe túmuweene uMutwa.” Neke kangi umwene avahigage atigilage, “Ngana sindigaweene amavamba ga misumale mu mawoko gaakwe, na pe sindiviikile ikyala kyangu mu mavamba ago, kangi pe sindiviikile iliwoko lyangu pa lubafu lwakwe, uneene sindiifuuwa idzo.”
26Umulungu pe gwaviye gúhelaniidze, avanyigendwa va Yesu viilundanaga kangi pamwinga mu nyumba. Ikigono ikyo uTomasi nave aali pamwinga navo. Nde luvedze indzidzi dzaali ndinde, uYesu aadzile, iikwimaga pagatinagati apaawo, akuvahungilaga iitigilaga, “Ulutengamaso luvedzage naanye!” 27Neke uYesu amulongelage uTomasi atigilage, “Uviike ikyala kyako apa, ulole amawoko gangu. Kangi uleete iliwoko lyako, upamye pa lubafu lwangu. Utane ukuvedza ye asiifuuwa, nda haamu, ye iifuuwa.” 28UTomasi akumuhigaga iitigilaga, “Mutwa vangu, Nguluvi vangu!” 29UYesu akumuhigaga iitigilaga, “Úfuuviilwe, pakuva úumbwene. Váfuunyiliilwe avo ávafuuviilwe kitaambona.”
Uwugulume wa kitabu iki
30UYesu aahuufiidze ifimanyilo ifingi fyoloofu, fye vafiweene avanyigendwa vaakwe, ifisinaa fisimbwa mu kitabu iki. 31Neke kangi ifimanyilo ifili mu kitabu iki físimbiilwe ukuta, mufuuwage ukutigila, uYesu ye Mesiya, Muswamuve va Nguluvi, kangi wugendela wa kumufuuwa, muvedzage nu wuumi mu litaawa lyakwe.
Цяпер абрана:
Yohana 20: BEZ
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© 2022 Wycliffe Bible Translators, Inc. All rights reserved.