Yohana 8
8
Umwayuuva umudumuli-noolane
[1Neke vahegage, nayula apilukage ukwakwe, neke kangi uYesu ahelelage ku Kidunda kya Miseyituni. 2Pe kúkiye pamilaawo, iikwingilaga kangi mu lipaala lya tembeli. Avaanu vonda vakumulundanilaga, neke iikalage, avangage ukuvawulanidza. 3Avawulanidzi va milagililwe#8:3 Avawulanidzi va milagililwe Lole ku Figanulo. na Vafwalisayo, vakumusindikilaga umwayuuva yumwinga ye iibiitwe mu wudumuli-noolane. Neke vamuviikage pagatinagati pa lilugu lya vaanu. 4Vakumulongelaga uYesu viitigilaga, “Muwulanidzaave, umwayuuva uyu iibiitwe mu wudumuli-noolane. 5Mu milagililwe, uMose atulagiidze ukuvatova na maganga avamwayuuva ngita ava ukufikila pe viifuwa.#Valevi 20:10; Lwiwuko 22:22-24 Lino uveeve wiitigila kiki?” 6Aveene vamulongiye ewo pa kumugemya, ukuta vavedze nu lukaani lwa kumutaaha. Neke kangi uYesu agundamage, avangage ukusimba ni kyala pa muganga. 7Navo pe vaaginaga ukumuwuudza, umwene iikwimaga, akuvahigaga iitigilaga, “Ngana pwali umwenyo ye asinaa alimaga indzanangifu nambe nyakamwinga, avedze va kutala ukumutoodzehedza iliganga umwayuuva uyu.” 8UYesu iigundamaga kangi, iisimbaga pa muganga.
9Pe vaapuliike amadzwi ago, viivangaga ukuhega yumwinga yumwinga, ukuvangila avagogolo. UYesu iisigalaga mwene pamwinga nu mwayuuva uyo íimile pawutalo apaakwe. 10Neke uYesu iinamukage, amuwuudzage atigilage, “Mwayuuvaave, vali kwiya avanya kukutaaha? Sikwali nambe ye avedzaga ye ákuhigile?” 11Akumuhigaga iitigilaga, “Mutwave, sikwali nambe ye avedzaga.” UYesu akumulongelaga iitigilaga, “Na yuune sindikukuhiga. Uhelelage, ukuvangila ineengʼuli, kitalima kangi indzanangifu.”]#8:1-11 Amadzwi aga simoogali mu wusimbe uwungi uwa kataali.
UYesu ye lumuli lwa pe naanyi
12Neke uYesu avalongelage kangi avaanu atigilage, “Uneene ndili lumuli lwa pe naanyi. Umuunu ye avedzaga ye akuuniniila, asiigenda mu kiisi nambi, nda haamu, iivedza nu lumuli ulukumupeela uwuumi.” 13AVafwalisayo vakumulongelaga uYesu viitigilaga, “Uveeve ukwiyoolela wimwene, dze wiikoolela si dza ndakyene.” 14UYesu akuvahigaga iitigilaga, “Nde luvedze ndikwiyoolela ndimwene, uwoolesi wangu wa ndakyene, pakuva ndiidzeela kwe ndíhumile, kangi ndiidzeela kwe ndiihelela. Neke kangi unyeenye musiidzeela kwe ndíhumile, nambe kwe ndiihelela. 15Unyeenye mukuunyiga wugendela wa miiho ga vaanu, neke kangi uneene sindikumuhiga umuunu ye avedzaga. 16Neke kangi, ngana ndimuhige muunu, uluhigo lwangu lwa ndakyene, pakuva sindimwene ye ndiihiga, nda haamu, ndili pamwinga nu Daada ye áanumile. 17Mu milagililwe gyenyo lúsimbiilwe ukutigila, uwoolesi wa vaanu vavili, wa ndakyene.#Lwiwuko 17:6; 19:15 18Uneene ndikwiyoolela ndimwene, nayu Daada ye áanumile ye moolesi vangu.”
19Neke aVafwalisayo vamuwuudzage uYesu vatigilage, “UDaado ali kwiya?” UYesu akuvahigaga iitigilaga, “Unyeenye musiindzeeliye uneene, nayu Daada musimudzeeliye. Ngana mukali muundzeelage uneene, ngali mukali mukumudzeela nayu Daada.” 20UYesu aalongile amadzwi ago pe aawulanidzaga mu lipaala lya tembeli, biihi na poono pa kuviikila uwusembe. Kangi sikwali umuunu va kumwibata, pakuva umusika gwakwe gwali gusinaa gufika.
UYesu iilonga ulwa fuwa yaakwe
21UYesu akuvalongelaga kangi aVafwalisayo avo iitigilaga, “Uneene ndikwihelelelaga, unyeenye mulaanemula, neke kangi mulaafuwa mu ndzanangifu dzeenyo. Kwe ndiihelela uneene, unyeenye mwilemwa ukwadza.” 22Neke avalongodzi va Vayahudi vavangage ukwiwuudza vatigilage, “Kye kiki iilonga ukutigila twilemwa ukuhelela kwe iihelela? Ongo, iihelela kwikoma?” 23UYesu iiginaga ukuvalongela iitigilaga, “Unyeenye múhumile pe naanyi apa, neke kangi uneene ndíhumile kukyanya. Unyeenye muli va pe naanyi apa, neke kangi uneene sindili va pe naanyi apa. 24Lwe lwene lwe ndikuvalongela ndiitigila, mulaafuwa mu ndzanangifu dzeenyo. Lino, ngana musikuufuuwa ukutigila uneene ye mwene,#8:24 Uneene ye mwene Apa uYesu iilonga ngita uNguluvi kye akwilonga mu Lufingo uLulovela, Kuhega 3:14; Isaya 43:10-11. mulaafuwa mu ndzanangifu dzeenyo.”
25Neke vamuwuudzage uYesu vatigilage, “Yuuve ani?” Umwene akuvapilusilaga iitigilaga, “Ukuhuma pa wutalilo pe ndikiiwulanidzaga, ndikavalongiye ukutigila uneene ani. 26Kangi ndili nadzo ndzoloofu idza kulonga ulwa nyeenye ni dza kuvahiga. Neke kangi umwene ye áanumile va ndakyene, uneene ndiilonga na vaanu mwe naanyi, dze ndípuliike ukuhuma ukwakwe.”
27Avalongodzi va Vayahudi vasalufikile ukutigila, uYesu aalongaga navo ulwa Daadiye va kukyanya. 28Neke uYesu atigilage, “Pe mwivedza múmwinwise uMuswamuve va Muunu pa kipindulihidzo, apo muhadza mwidzeela ukutigila ye neene. Kangi muhadza mwidzeela ukutigila dzonda dze ndiilima, sindiilimila mu wutawulilwe wangu, nda haamu, ndiilonga dze áambulaniidze uDaada. 29Umwene ye áanumile ali pamwinga naane. Asaandekile ndimwene, pakuva umusika gonda ndiilima idzikumukeeledza.”
30UYesu pe aalongaga idzo, avaanu voloofu vamufuuviilwe.
UMuswamuve va Nguluvi akuvaviika avaanu mu wuvangwa
31Neke uYesu avalongelage aVayahudi avo avamufuuviilwe atigilage, “Ngana mwikuumiilila amadzwi gangu, mwivedza vanyigendwa vangu ndakyene. 32Pe peene pe muhadza mukuyifika indakyene ya Nguluvi, ni ndakyene iyo yihadza yikuvapeela uwuvangwa.”
33Aveene vakumuwuudzaga viitigilaga, “Uneefwe tuli kipelela kya Abulahamu. Tusinaa tuvedzaga vasutu va muunu. Wiilonga wuli ukutigila uneefwe twivedza vavangwa?” 34UYesu akuvahigaga iitigilaga, “Ndakyene ndikuvalongela ndiitigila, umuunu ye iigina ukulima indzanangifu, uyo ye musutu va ndzanangifu.#Valoma 6:12-23 35Umusutu asiikwidikilwa ukuvedza yumwinga va kaaya ya mutwa vaakwe mbeepali, neke kangi umuswamuve va mutwa iikwidikilwa ukuvedza yumwinga va kaaya mbeepali. 36Lino, ngana uMuswamuve va Nguluvi avaviike mu wuvangwa ukuhuma mu ndzanangifu dzeenyo, apo mwivedza vavangwa ndakyene. 37Ndiidzeela ukutigila, unyeenye va kipelela kya Abulahamu, neke kangi mwisaka ukuungʼoma, pakuva mwikaana amadzwi gangu. 38Uneene ndikuvalongela dze ndídziweene kwa Daada, neke kangi unyeenye mwilima dze múpuliike kwa dadiinyo.”
39Aveene vakumuhigaga uYesu viitigilaga, “UAbulahamu ye dadiisu.” UYesu akuvalongelaga iitigilaga, “Ngana ndakyene muli vaana va Abulahamu, ngali mwilima dze aalimaga uAbulahamu. 40Neke kangi lino, mwisaka ukuungʼoma, nde luvedze ndívalongiye indakyene ye ndaapuliike ukuhuma kwa Nguluvi. UAbulahamu asaalimile ngita kye mwisaka ukuundimila uneene. 41Amalimo ge mwilima giihuma kwa dadiinyo.” AVayahudi avo vakumuhigaga uYesu viitigilaga, “Uneefwe tusili vaholwa piivala ya noolane, yu Nguluvi mwene uyo ye Dadiisu.” 42UYesu akuvahigaga iitigilaga, “Ngana uNguluvi akali avedzage Dadiinyo, ngali múundzendile, pakuva ndaahumile kwa Nguluvi neke lino ndili apa. Uneene sindaadzile mu wutawulilwe wangu, nda haamu, ye Nguluvi ye áanumile. 43Kye kiki musikulufika lwe ndiilonga? Pakuva mulema ukwanukila amadzwi gangu. 44Unyeenye udadiinyo ye Setano, na yuunye mwisaka ukulima uwudobofu wa dadiinyo. Umwene aali muwuladzi ukuhuma pa wutalilo, kangi asiikwima mu ndakyene, pakuva indakyene simooyili umwakwe. USetano pe iilonga uwudesi, igyo gye migendele gyakwe, pakuva umwene mudesi kangi ye daada va wudesi. 45Neke kangi pakuva ndikuvalongela idza ndakyene, musikuufuuwa.
46“Ye ani umwenyo ye akuungomehedza ukutigila, ndili ni ndzanangifu? Ngana dze ndikuvalongela dza ndakyene, lino kye kiki musikuufuuwa? 47Umuunu va Nguluvi aaikwidika amadzwi ga Nguluvi. Neke kangi unyeenye musiikwidika, pakuva musili vaanu va Nguluvi.”
UYesu mukomi ukulutila uAbulahamu
48AVayahudi vakumuhigaga uYesu viitigilaga, “Ongo, tusiilonga ndakyene pe twitigila uveeve uli Musamalya, kangi uli ni mibepo imiviifu?” 49UYesu akuvahigaga iitigilaga, “Uneene ndili hela imibepo imiviifu. Ndikumuginiya uDaada, neke kangi unyeenye mukuumbeda. 50Uneene sindiisakula indolo dzangu, neke kangi pwali yumwinga ye iisakula ndaanukile indolo, umwene ye munya kuhiga idzo. 51Ndakyene ndikuvalongela ndiitigila, umuunu ye iikwidika amadzwi gangu, asilaafuwa mbeepali.”
52Neke aVayahudi vamulongelage uYesu vatigilage, “Lino twidzeela ukutigila, uveeve uli ni mibepo imiviifu! UAbulahamu aafuwe, na vavidzi navo vaafuwe. Neke kangi uveeve wiitigila, ‘Umuunu ye iikwidika amadzwi gangu, asilaafuwa nambi.’ 53Ongo, uveeve uli mukomi ukulutila ukuhwesu uAbulahamu? Umwene aafuwe, na vavidzi navo vaafuwe. Uveeve ukwipugudza ukutigila yuuve ani?” 54UYesu akuvahigaga iitigilaga, “Ngana ndikwipeela indolo yuune, apo indolo dzangu dzaahela. UDaada ye mwitigila Nguluvi veenyo, ye mwene ye akuumeela indolo. 55Neke kangi unyeenye musimudzeeliye uNguluvi, uneene ndímudzeeliye. Ngana ndiilonga ukutigila sindimudzeeliye, apo ndiivedza ndili mudesi ngita unyeenye. Nda haamu, uneene ndímudzeeliye uNguluvi, kangi ndiikwidika amadzwi gaakwe. 56Ukuhwenyo uAbulahamu aakeeliye hiilo, pe aadzeeliye ukutigila ahadza akukiwona ikigono ikya kwadza uneene. Nave akiweene, iikeelaga hiilo.”
57Neke aVayahudi vamuwuudzage uYesu vatigilage, “Uveeve gisinaa gikwila imyaka makyumi gahaanu (50), lino wamuweene uAbulahamu?” 58UYesu akuvahigaga iitigilaga, “Ndakyene ndikuvalongela ndiitigila, ukuhuma uAbulahamu pe asinaa aholwa, uneene pondili.”#8:58 Uneene pondili UYesu apa akulitambula ilitaawa lya Nguluvi, ngita kye lyasimbiilwe mu kitabu kya Kuhega 3:14; Isaya 43:10. 59AVayahudi pe vaapuliike idzo, viiholaga amaganga, ukuta vamutove nu kumukoma,#8:59 Viiholaga amaganga, ukuta vamutove nu kumukoma AVayahudi vasamufuuwaga uYesu ukutigila Nguluvi, vaahoodzaga ukutigila akumulonga fivi uNguluvi. Pa kulonga fivi, ulupedzo lwakwe lwali ukutowa na maganga ukufikila ifuwa, Valevi 24:13-16. neke kangi uYesu afihamage, ahumage mu lipaala lya tembeli.
Цяпер абрана:
Yohana 8: BEZ
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© 2022 Wycliffe Bible Translators, Inc. All rights reserved.