Matayo 22
22
Wikhori wa malëwa a uvire
(Mrk 14:15-24)
1Yesu agarëghëtya inaawe kangë gwa utumëa nyinkhori: 2“Utemi wa girunde wikhweti na mutemi nëagamughondanëëya mwanakwe malëwa a uvire. 3Uvii, agavatuma atumami uvataana nënaavareekwaa vije guuvire, ëgweeso nënaavareekwaa vëgahita uja. 4Agatuma kangë atumami vangëja, uguhanya, ‘Vaerë nënaavareekwaa: malëwa a sigunkuu anë itungwee akhondaa, njiku yanë na ng'ombe nëighënie yakigitwaa, muu intu rakhondaa, njii guuvire.’ 5Ëgweeso veeso vëgadëa ukeera, vëgenda kunë vinjë, umwe umuundaakwe, ungëja umantu akwe, 6na vangë vëgaakwata atumami vasaa vëgaatuka, vëgavooragha. 7Mutemi wasuu agakheefa, agavatuma asikee vakwe vëamare vauraghi vasaa na uwacha moto muji wawe. 8Faafo agavëëra atumami vakwe: ‘Malëwa a uvire akhondaa tutë, ëgweeso nënaavareekwaa naavëtinoneye. 9Uvii, endi muntamanuko ya njëa na voong'e vasaa nëmuuvahanga vataani vëje guuvire.’ 10Atumami vasaa vëgafuma, vëgeenda munjëa, vëgaveeta antu voong'e, abë nanë aja, khaya a uvire ëgijua aghenyi. 11Mutemi nënaawingëa uvoona aghenyi agamumanya umwe nënaa atirie masaa a uvire.” 12Mutemi agamuwëëya: “Mbuyanë, wingëaa wurë afaa utikweti isaa ra uvire?” Ëgweeso mweeso agikhaa ukiire twë. 13Faafo mutemi agavëëra atumami: “Mutungi mëghuu nanë mëkhono mwende umujughuta gunji mukiti, kuuko ugëëra na usya mëno.” 14Yesu agadaha urëghëtya gwa uhanya, “Vingë vëreekiwe ëgweeso akeevu vaahwaaniywe.”
Urëfa Kodi kunë Kaisari
(Mrk 12:13-17; Luk 20:20-26)
15Uvii, Afarisayo vëgenda kunë vinjë, vëgisëya mwino vëumukwatya Yesu gwa nkhani yakwe. 16Vëgaatuma asëywi vawe itambëëmwe na asëywi va ikhakho ramwa Herode. Vëgamuwëëya, “Musëyi, gumanyie mwino veve wëë muntu në wëmëkie mu tutë na mwino ugusëya njëa a Muungu gwa tutë, utighooghofa muntu mbaumwe, gusoko üküü wa ukumu wa muntu ti intu kunë veve. 17Tiarë, gukhanëe masëgho ako. Wurë, inoneyena urëfa kotë kunë Kaisari namba ti uvii?” 18Ëgweeso Yesu agamanya ubë wawe agavëëra, “Nyee anyalakuno, njuuchuu muug'ema? 19Ndaghëëri hela a ukhombweera kotë.” Veeso vëgamudwëëye hela. 20Uvii, Yesu agavawëëya, “Wikhori na mutojo uruu wa mwaanyuhe?” 21Vëgamusucha, “Uu amwa Kaisari.” Faafo Yesu agavëëra, “Uvii, mufi Kaisari në amwa Kaisari, na Muungu në akwe Muungu.” 22Nënaavategheeya uvii vëgataka, vëgamureka vëgeenda kunë vinjë.
Ufëtyo
(Mrk 12:18-27; Luk 20:27-40)
23Itiku rasëë, Asadukayo akeevuu vëgamwendea Yesu. Vasaa unë avoo nëvëuhanyaa mwino akuyi vëtiufëtya. 24Uvii, vëgamwëëra, “Musëyi, Musa agahanya muntu nëuroghoe nëwakuya naa inareka vaana, inoneye muunaakwe amuroghoe mukhema wasuu nëwakuëywe mughosya, vëhange vana gwa ikhondo ra muunaakwe. 25Itungwee, afaa ung'iitu naa gwina anaamuntu vëëmufungatë. Wa mwandyo agaroghoa noo agakuya naa ainahangaa vana, agamurekea muunaakwe mukhema wasuu në muhimbë. 26Ëgatendeka uvii uvii gwa muunakwe wa gavëë na wa gatatu faka wa mufungatë. 27Anaa muntu vasaa voong'e vëgakuya, mukhema wasuu noo agakuya 28Wurë, itiku nëikwë akuyi vëufëtya mukhema wasuu ugutenda mukhema wamwaanyuhe mukhatë a anaamuntu vasaa mufungatë? Voong'e mufungatë vëgamuroghoa.”
29Yesu agavasucha, “Tutë mwahutyaa gusoko mutiamanyie Maandëko Meru nanë nguu ya Muungu! 30Gusoko akuyi nëikwë vafëtiwa vëtiuroghoa mbesa uroghowa, vëutenda mwino vamalaëka girunde. 31Ëgweeso gwa ihanyo ra akuyi ufëtya, ëkëë mwinasomaa ayoo në Muungu wamukhanëena? 32Agahanya, ‘Nene në Muungu wamwa Iburahimu, Isaka nanë Yakobo!’ Uvii, mweeso ti Muungu wa akuyi, ëgweeso unë Muungu wa vasaa nëafanga.” 33Mwirundo wasuu wa antu nënaawategheeya uvii ugayataka masëyo akwe.
Iraghëëyo në iküü
(Mrk 12:28-34; Luk 10:25-28)
34Afarisayo nënaavategheeya mwino Yesu naa waakiryaa Asadukayo, vëgatang'ana itambëëmwe. 35Umwe wawe, Munyaumëmanya Seria, agamwëëya Yesu gwa umughema, 36“Musëyi uu në iraghëëyo rëëfë nëiküü nanguu mu Seria amwa Musa? 37Na mweeso agamweera, ‘Muyanje Müküü Muungu wako gwa nguu yako yoong'e, na gwa nkhoo ako oong'e na gwa ihaa rako roong'e.’ 38Erëë unë iraghëëyo në iküü na ra mwandyo. 39Ra gavëë rikhwete na rasëë: ‘Muyanje munyafifë wako mwino vee wianjëte mughonjo!’ 40Seria oong'e amwa Musa na masëyo a anyagëdaghu ëëmukhatëkhatë a maraghëëyo ayaa avëë.”
Mwana wamwa Daudi
(Mrk 12:35-37; Luk 20:41-44)
41Afarisayo nënaa vatang'ana itambëëmwe, Yesu agavawëëya, 42“Nyenye mumumanyie wurë Masihi? Wurë, uu mwana wamwaanyu?” Vëgamusucha, “Wamwa Daudi.” 43Yesu agavëëra, “Uvii, rësëë rëutendeka wurë mwino chuu gwa nguu ya Mwahu Mweru Daudi ugumutaana mweeso Müküü? Gusoko agahanya:
44‘Müküü agamwëëra Müküü wanë:
ëkhaa uvaru wanë wa gëlëlo,
faka fananëjiëuvavëka arughu vako
fang'ë a mëghuu ako.’
45Uvii, nësa Daudi chuu ugumutaana Masihi ‘Müküü,’ ugudaha wurë utendeka mwanakwe?” 46Gutie muntu mbaumwedu nëagadaha umusucha ukhani. Na ufuma itiku rasëë gutie muntu nëagasoya kangë umuwëëya ëwëëyo.
Цяпер абрана:
Matayo 22: RIMRC
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Kirimi New Testament © Bible Society of Tanzania, 2008.