Matayo 5
5
Sayu Njija guughongo
1Yesu nënaa wayoona maburi a antu aganatëa guughongo, agëkhaa. Asëywi vakwe vëgamwendea, 2mweeso noo agaandya uvasëya; uguhanya:
Uyanjo wa tutë
(Luk 6:20-23)
3“Vaforiwe vasaa nëvëgionaa atuki munkhoo, gusoko utemi wa girunde u wawe.
4“Vaforiwe vasaa nëvëgurëa, gusoko vëjie ufefeheeywa.
5“Vaforiwe vasaa nëafoo, gusoko vëjie umësaa ng'ë.
6“Vaforiwe vasaa nëvëna njaa na nyweta gwa ayoo nëatutë, gusoko vëjegikutiwa.
7“Vaforiwe vasaa nëvëgoonëa uvavi, gusoko vëjegoonëwa uvavi.
8“Vaforiwe vasaa nevëru munkhoo, gusoko vëjeumwoona Muungu.
9“Vaforiwe vasaa nëvëgweetaa majëghana, gusoko vëjeutaanwa vana va Muungu.
10“Vaforiwe vasaa nëvëukhasiwaa gusoko a asaa nëatutë na nëëghookie, gusoko utëmi wa girunde u wawe! 11Mwaforiwe nyenye nësa antu vëumutuka na umukhasya na umuruva na umweegheegheya mavë hiya hiya gusoko anë. 12Yanji na giririsya gusoko mpamba anyu unë nküü girunde. Gusoko noo naa antu vëgavakhasya anyagëdaghu nënaa vëgadwëëra unyuma anyu.”
Munyu na weru
(Mrk 9:50; Luk 14:34-35)
13“Nyenye mwë munyu wa urëmi! Ëgweeso munyu nëwasusufa, ugutendwa wurë ujëfe? Utinoneye intu mbanduvë, ëgweeso uguhunuwaa gunjë na ufanangëwa na antu. 14Nyenye mwë weru wa urëmi! Muji nëujengiwe gu ughongo gunto utiudaha gifiha. 15Ëgweeso noo antu vëtigwachaa gemwëë na ugëkunëkea gwa gëfe, ëgweeso vëugëreka gunto a intu nërëhumbukie gidahe gwerya gwa antu voong'e nevëë munyumba. 16Uvii, uvii, inoneye weru wanyu werye usonge a antu, vëdahe uyiona ntendo yanyu njija, vëmukurye Tata wanyu në wëë girunde.”
Seria
17“Mutasëghee nee najie umëheya seria nanë anyagëdaghu. Ntinajaa uheya asaa ëgweeso utenda ëkhondeke. 18Tutë namwëëra, faka afoo nëikwë irunde na fang'ë ëguwura, gutie mbesa gasampu gamwe ga itungo mbesa gantu ganyuughuu ino ga Seria nëgëuheyiwa, faka oong'e ëkhondeke. 19Uvii, muntu gëkaku nëwadëa ukwatëëra mbesa iraghëëyo në inyuughuu ino ukëra oong'e na uvasëya vangë noo vëtende uvii, wasuu ugutendeka muyuughuu ino mu utemi wa girunde. Ëgweeso wasuu nëwayakwatëëra na uvasëya vangëja, wasuu ugutendeka müküü mu utemi wa girunde. 20Gusoko ësëë nene ngumwëëra, nyenye uja wanyu nëwadëa ukëra uroo wa Afarisayo na asëyi va Seria, mutigingëa kamwe mu utëmi wa girunde.”
Ikuwo
(Luk 12:57-59)
21“Mwadahie utegheeyaa mwino antu va khae vëgakhanëwa: ‘Utauraghee! Nëuguuragha inoneye uramuëywa.’ 22Ëgweeso nee ngumwëëra, nyenye wasuu nëwamukheefea gwa ikuwo muunaakwe inoneye aramuëywe. Nëugumuhorya muunaakwe imunoneye utowa ubarasa. Nëugumutaana muunaakwe: ‘Mufutü vëë!’ Imunoneye gingëa gwa arungu a makhaa. 23Uvii, nëwatoa sadaka ako usonge a masabahu na faafo wakümbukwa mwino muunako wina siimba na vee, 24mëreke sadaka ako usonge a masabahu enda tanju uning'anëëye mahanyo mwina muunako, nëwadaha suka uduye sadaka ako. 25Iyanjëëyi na munya ugusitaaka ruvë nëëkëë mwë munjëa, mwinjë ubarasa. Nëwadëa utenda uvii munya ugusitaaka ugugutoa kunu hakimu mweeso hakimu noo ugugutoa gwa asikëe veenoo ugutungwa ugeresa. 26Tutë nagwëëra utiafuma kuuko faka udahe urëfa senti a mpëo.”
Ulehadi
27“Mwategheeye mwino antu vëgëërwa, ‘Utalehadee!’ 28Gweeeso nëë ngumwëëra, nyenye mu muntu nëugumuraraava mukhema gwa umumiëra mate, wadaha utenda ulehadi inakwe munkhoo akwe. 29Uvii, nësa riho rako ra ugëlëlo raguhutëya rëküre urëjughute kureengë. Bahu ino kunë vee uwurya gafëgha gamwe ga mwëërë ukëra mwëërë wako woong'e ughumëwa mumoto na uJehanamu. 30Na nësa mukhono wako wa gëlëlo uguguhutëya, ukigite uwujughute kureengë. Bahu nanguu uwurya gafëgha gamwe ga muvëë ukëra muvëë wako woong'e wende mumoto wa uJehanamu.”
Gireka
(Mat 19:9; Mrk 10:11-12; Luk 16:18)
31“Gwahanyiwe noo: ‘Nëugumureka mukhemaakwe na imunoneye amufe rëandëko ra gireka.’ 32Ëgweeso nëë ngumukhanëa muntu gëkaku nëugumufa mukhemaakwe rëandëko ra gireka, nëësa ti gwa soko a ulehadi, ugumutenda alehade, na muntu nëwamuroghoa mukhema nëwafewe rëandëko ra gireka ugulehada.”
Girafëa
33“Kangë mwategheeye mwino antu akhae vëgëërwa: ‘Nëwërafëa utadëe utenda uvii, ëgweeso igunoneye utenda mwino wërafëa kunë Müküü.’ 34Ëgweeso nëë ngumwëëra, nyenye mutiirafëe mbanduvë, mba gwa girunde gusoko uunë itumbë ra üküü na utemi ra Muungu, 35mbesa gwa urëmi gusoko unë itumbë rakwe ra uvëkëa mëghuu, mbesa gwa Yerusalemu gusoko uunë muji wa Mutemi müküü. 36Utajee wirafëe gwa itwe rako gusoko utiudaha uwutenda utuka utendeke weru mba wuutiki. 37Intu në nyenye ‘Nha’ mba ‘Ti nhaa,’ intu nërëkeanëye rasëë rëfumie kunë murughu.
Urëfëëya
(Luk 6:26-30)
38“Mwategheeye mwino gahanyiwe: ‘Riho gwa riho, rino gwa rino.’ 39Ëgweeso nee ngumukhanëa, nyenye utamughëëye muntu në mavë. Muntu nëwagukhuva ikoofi uhaya ra gëlëlo, mufëëntuire nëë uhaya ra gavëë. 40Muntu nëwagutoa ubarasa ugufenja uguhegheya igwanda rako, mureke ahore ikooti#5:40 Ikoori: Isaa ramwa ino u matiku asaa. rako noo. 41Nësa muntu waguumëëya gweenda sampi igëtunga, ende mëhënjo ëvëë. 42Mufe wasuu nëuguguromba, na utamufeeyee ginyankhoti nëugufenja ugukofa intu.
Uvayanja arughu
(Luk 6:27-28, 32-36)
43“Mwategheeye mwino ëgarëghëtiwa: ‘Ugumuyanja munya fifë wako, ëgweeso ugumuhura murughu wako.’ 44Ëgweeso nëë ngumwëëra, nyenye vayanji arughu vanyu na uvarombea vasaa nëvëumutendëa në ëtinoneye, 45mudahe utenda vana vamwa Tata wanyu në wëë girunde. Gusoko mweeso uguvamwëëkëa yuva rakwe në aja nanë avë uguvafaa mbura në aja nanë avë. 46Wurë, nyenye muuhanga gëfewakë gwa uvayanja gutufu vasaa nëvëmwaanjëte nyee? Gusoko mbesa anya ukhombosya kooti#5:46 Anya ukhomboisya kooti: Arë vëvarewe mwino në anya mahutye nanguu gusoko arë vëulëa hela ya kooti. vëutendaa uvii? 47Na nëmwaaramucha vaunaanyu gutufu, mwatendaa ntuni nanguu ukëra vangëja? Nanë antu va Ndughu ingëja noo vëtiutendaa uviina? 48Nyee uvii, imunoneye mutendeke mukhondekeke, mwino Tata wanyu wa girunde mwino ukhondekekie.
Цяпер абрана:
Matayo 5: RIMRC
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Kirimi New Testament © Bible Society of Tanzania, 2008.