Bisalu Bibilumbi 2
2
Durugu duYinyunyi yiNsambi
1Mu yilumbu yiPentecote jogu botsu bamaba bagukama va mbura mosi. 2Vana vana nduku jimaruyila o julu nana nduku mungudi uneni; mu ndagu jiotsu aji bamatsanina jimaba yika nduku na nduku. 3Ndimi atsimabagunu na ndimi tsimuji tsimalabana ombu gogu; tsionyi tsimaba tsigukama mbana tsimakakana na tsimatsana ombu mutu mutu. 4Botsu bamabasu na Yinyunyi yiNsambi na bamabanda uvosa mbembu tsisusu nana Yinyunyi yieni amaveyila mutu mutu mangolu uvosa.
5O Jerusalem umaba baJuif abamaruyila o malongu motsu abamayitsanga Nsambi. 6Nduku jinogulunu yiari na yiari bapuela bamabenguna va mbura eni. Bamaba kumfu jineni mu mbari mutu mutu amagulu bevosi tindi mbembu andi. 7Botsu bamakambulu na bamasutu. Bamawivusananga rie: Jogu botsu abevosi nana bagaa bisi Galilee? 8Dibandu yi tuigulu yiri bevosi mu mbembu tsietu? 9Jetu bisi Parthes na bisi Medie na bisi Elam na abetsani o Mesopotamie na bisi Judee na bisi Cappadoce na bisi Pont 10na bisi Asie na bisi Phrygie na bisi Pamphylie na bisi Egypte na bisi Libye, bulongu abusungasana na Cyrene; na abamaruyila o Rome 11na abasamaburu baJuif, diwendi rie: abamapalila mu dibundu disusu na bisi Crete na bisi Arabie, tsie tuibagululu bevosi mambu maNsambi mu mbembu tsietu? 12Botsu bamakambulu la dibandu bamawivusananga rie: Adina divindugulu yi? 13Tumba basusu bamadesanga na bamavosanga rie: Tsiri malangi mavu nogu?
Malongi maPierre
14Pierre na digumi na umosi bamarelama mbana Pierre amagamuga rie: Merianu: Jenu baJuif na bisi Jerusalem, liganu matuji! 15Batu bebaba bagaa na malangi nana duitasili. Dugejabi yiri tuki kedi? 16Tumba ama tuilabi namunyi amana Joel mubiyitsi amalebiga rie:
17Nsambi evosi rie:
Mu bilumbu biusita nyuwitilila batu botsu Yinyunyi yiami;
baana benu bababaala na babagetu bobiga;
bafudu benu bolabanga biriariamu,
binunu bienu bodoranga mandosi.
18Nyiina, mu bilumbu bieni
nyuwitilila basalitsi bami bababaala na babagetu Yinyunyi yiami
na bobiga.
19Nyulasa bimaga o julu na bilimba va butamba:
voba malungu na muji na nsumbili.
20Wisi ukaluga pisama na tsungi jiukaluga malungu
ne yilumbu yiFumu yikatola.
Yilumbu yieni yiuba yineni na yiranga.
21Mbana uotsu agunengila diina diFumu ogobulu.
22BaIsrael, merianu: Nyivosi mu diambu diJesus muisi Nazareth, dibaala adi Nsambi amadujabisa na bimaga na bilimba abi amavaga va gari enu. 23Mu duganu duNsambi amawakusu ombu genu na dumasinga yiri agomunu va kurusu noboku. 24Tumba Nsambi amamurambusa na amabelisa dufu, diwendi rie: dufu dusamaba na mangolu ombu gandi. 25Mu mbari David amamubiyila rie:
Nyimalabanga Fumu va gusu ami temu tsiotsu, ngokungusu
mu mbari Fumu avu va mabaala mami.
26La dibandu nyilabilingi nsangu
na murima uotsu yika usangila.
Ka muna murima usunda gu guvu nami,
nesi na udeda udunyuru nyina ditasa
27mu mbari gugogaru yiri mutu agu abi o mbura jiabafu,
gugonsingisa ubola o ngila.
28Gumandonsa mansila mamonyu
gumambasa na nsangu
mbura tsiotsu atsi nyivu.
29Kabogu baana bataji, nyirondi udurangimisa yiri yivunda yietu David amafu na amatsigu na tuilabi ngila andi. 30Kabogu dilabini yiri amaba mubiyitsi agumajaba yiri Nsambi amavangana pangini nandi nojilevila pesi yiri mutegula andi otsana va yitsiga yibufumu buandi. 31David amabiga amoba, diwendi rie: amavosa diambu didurambugu duChrist ava amabiyila rie:
Agobuagu mu mbura jiabafu,
musonyi andi ugobola.
32La Jesus eni aji Nsambi amarambusa; jetu botsu tuji bambeji.
33Amamatusu na amatsanusu va mabaala maNsambi agumamuvega Yinyunyi yiandi agumavangunu pangini na motsu ama duilabi nogulu meruyili ombu gandi.
34Dingensa agumamata o julu tsiri David mu mbari jandi amavosa rie:
Fumu amavosa na Fumu ami rie:
Ndeʼ tsana va mabaala mami
35te na vana nyusunsa bavinitsi bagu
o tsi durumu duagu.
36Kabogu baIsrael botsu bajabi buranga yiri jandi agu jenu dumagomina va kurusu, Nsambi amamuvaga Fumu na Christ.
37Banomana ugulu diambu dieni bamaregama na goma na bamawivula Pierre na bilumbi bisusu rie: Baana bataji, tsie tuvayila? 38Pierre amabatsingula rie: Kalulanu diela, batusuanu mu diina diJesus Christ yiri masumu menu modutandu. Mbana dudila pegulu jiNsambi, diwendi rie: Yinyunyi yiandi. 39Pangini ejiji jivu ombu genu nombu baana benu nombu abonengulungu na Fumu Nsambi etu.
40Mbana mu mambu masusu mapuela amabalubusanga rier Rinanu bango paga yiri dugobulu. 41Jogu abamasinga mambu mandi bamabatusu. Mu yilumbu yieni bebeli na tosini yirieru tsibatu bamafubana nogu. 42Bamabengunanga temu tsiotsu ugulu malongi mabilumbi nowarisanga dinonga diogu notsananga va tavula Fumu nosambilanga.
Mutsanu ubango yitu
43Goma jimaba na mutu uotsu na bilimba bipuela na bimaga bimavagungu na bilumbi. 44Botsu abamavaga yitu bamatsana va mosi na bamaba mubundini. 45Bamasumbisanga bima biogu na botsu bamagabananga dufunu nana bamarondilanga. 46Yilumbu na yilumbu botsu bamabengunanga va mosi o Ndagu Nsambi, bamajanganga va mosi na bamagabanga biguji biogu na nsangu na mirima misunda 47ava bamayitsilanga Nsambi bamalabanga ubueji. Yilumbu na yilumbu Fumu amabuesanga abamagobulungu mu dibundu.
Цяпер абрана:
Bisalu Bibilumbi 2: PUU1992
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
La sainte Bible en langue Yipunu © Alliance Biblique du Cameroun, 1992.