Luc 23
23
Jesus va gusu Pilate
(Matt 27.1-2, 11-14; Marc 15.1-5; Jean 18.28-38)
1Jogu botsu bamarelama na bamabega Jesus va gusu Pilate. 2Bamabanda umufuengilila novosa rie: Tutsirasuna mutu egugu epupisi di bayafuta dumandu ombu kaga na eyosi yiri aji Christ na kaga.
3Pilate amamuwivula rie: Ndeʼ guji kaga jibaJuif?
Jesus amamugabusila rie: Ndeʼ gumadivosa.
4Pilate amatsingula bivunda bibavagulitsi bapagu na yinombu rie: Ngelabi yiri mutu egugu ana diambu.
5Tumba batu bamamukambisa novosa rie: Jandi epupisi mirima mibatu na malongi mandi. Amabanda o Galilee te no Judee jiotsu na namapapa aji vava.
Jesus va gusu Herode
6Ava Pilate amadigululu amawivula rie: Aji muisi Galilee? 7Amagulu yiri amaruyila o yiari ayi Herode erumi kabogu amamusindiga ombu gandi mu mbari jandi wandi amaba o Jerusalem mu temu eni. 8Herode amalaba nsangu jineni udila Jesus mu mbari amagulungu adi bamamuvosila na va julu vana amaronda ulaba nana esalili bimaga. 9Amamuwivula puela bivu tumba Jesus asamawagula ne yimosi. 10Bivunda bibavagulitsi bapagu na milonsi mimigaga bamaba vana na bamamufuengilila mambu mapuela. 11Herode na bagora bandi bamamulensanga; banomana umulensa bamamuduisa yikutu yibenga mbana bamamugabusa ombu Pilate. 12Diuleba Pilate na Herode bamabanganga na yikenganyi tumba muna yilumbu yieni bamanonga.
Jesus evegu mbela dufu
(Matt 27.15-26; Marc 15.6-15; Jean 18.39, 40; 19.1-16)
13Pilate anogukiga bivunda bibavagulitsi bapagu ria batu badiela na dibuli 14amabatsingula rie: Dutsimbeyila mutu egugu na duivosi yiri epupisi batu. Labanu nsimusosisa na mambu ama dumamufuengilila na ngelabi yiri ana mbela. 15Ne Herode asamamulaba na mbela la dibandu amamugabusa ombu getu. 16Agaa na diambu diwefimina uboku. Kabogu nyumudimbisa mikasa mbana opalusu. [ 17Kadi feta Paque Pilate amabapalisilanga muisi tsugu.] 18Bamagamuga va mosi rie: Muboki! Tupalisili Barabbas!
19(Barabbas amakotusu o tsugu mu mbari amabangisa kindu ajimapupisa musiengi na amaboka mutu.) 20Pilate amaronda upalisa Jesus kabogu amamueweliga uvosa na batu. 21Tumba bamagamuga rie: Mugomini va kurusu! Mugomini va kurusu!
22Pilate amabawivula adimurieru rie: Dibi yi atsivaga? Ngaalaba diambu diwelimina yiri oboku. Kabogu nyumudimbisa mikasa mbana opalusu.
23Bamagamuga na yindandi rie: Vengu ogomunu va kurusu! Bamamukambisa na migamu miogu te na bamalunga. 24Pilate amatabulila Jesus bunsonsi nana bamarondila. 25Amapalisa agu bamavondanga, agumakotsu o tsugu mu diambu dikindu na bukongu na amabavega Jesus yiri bomuvayila nana bamarondila.
Jesus egomunu va kurusu
(Matt 27.32-44; Marc 15.21-32; Jean 19.17-27)
26Ava bamabeyila Jesus, bamabonga Simon muisi Cyrene omaruyila o musiru. Bamamusikiga na bamamunangusa kurusu aji amabega o nsima Jesus.
27Batu bapuela bamamuduka na va gari ogu bamaba bagetu abamadumanga tulu tsiogu na abamalilanga. 28Jesus amageluga ombu gogu novosa rie: Bagetu baJerusalem, duyandila tumba kelilanu na lilanu mu diambu dibaana benu. 29Bilumbu biuruga abi bovosa rie: Ka muna yiesa yi binguma belabi! 30Temu eni bovosa na mikongu rie: Tuvikianu! Na bovosa na bikundubuga rie: Tusueyianu! 31Pa bevayi mambu meni ombu muiri aguvu na magaji tsie bovayila na muiri agugumuga?
32Bavayitsi bamabi babeji bamabegu uyeboku va mosi na Jesus. 33Ava bamatolila va mbura ajinengulu rie: Dubengili, bamagomina Jesus va kurusu va mosi na bavayitsi bamabi babeji: umosi va mabaala mandi na ususu va magetu mandi. 34Jesus amavosa rie: Tata batandi! Bagejabi adi bevayi.
Bamabuaga mbanda ujaba anyi odila biduaru biandi. 35Batu bamasikama vana ugengila adimavagu. Bivunda bibaJuif bamalensanga Jesus rie: Jandi otsigobulanga basusu akegobula pa aji Christ agusolu uNsambi!
36Bagora wandi bamamulensanga, banobambana nandi bamamuvega dive dinganyi 37na jogu bamavosa rie: Pa ndeju la kaga jibaJuif, kegobula!
38Va kurusu andi vamasonugu mambu memama rie: Agugu la kaga jibaJuif.
39Muvayitsi mabi umosi agumagomunu va kurusu amamupeji rie: Ndeʼ gugaa Christ? Kegobula nogobula jetu wetu!
40Tumba ususu amamusiemba rie: Gugedumi Nsambi? Tsia jetu botsu tuikilusu mukilu umosi? 41Diwelimina ombu getu mu mbari tumavaga mabi tumba jandi agaavaga dibi.
42Mbana amavosa na Jesus rie: Tangimini ava guruyila nana kaga.
43Jesus amamuwaka rie: Dingensa namunyi guba nami o paradis.
Dufu duJesus
(Matt 27.45-56; Marc 15.33-41; Jean 19.28-30)
44Ubongila ava muangulu bulongu buotsu bumaba yika pisama na pisama te na murekumunu. 45Wisi umapinda na dumbu duNdagu Nsambi dumapasiga va gari. 46Jesus amagamuga na diufi dineni rie: Tata, nyiwakisi yinyunyi yiami ombu gagu.
Anovosa nana amatabuga. 47Yivunda yikama bagora anolaba adimaba amayitsa Nsambi na amavosa rie: Dingensa mutu eni abetsi mutu usungama.
48Abamawenda uyelaba adimaba vana banolaba adimavagu bamayenagabusila nodumanga tulu tsiogu. 49Bambatsi baJesus na bagetu abamaruyila o Galilee bamasikama vala uyegengila adimavagu.
Dutsigu duJesus
(Matt 27.57-61; Marc 15.42-47; Jean 19.38-42)
50-51Vamaba mutu diina diandi Joseph agumatsana o Arimathee, diwendi rie: dimbu dibaJuif. Amaba mutu uboti na asigama na amaviva Durumu duNsambi. Amaba yivunda yineni tumba asamaba kingu mosi na bivunda bisusu mu diambu diJesus. 52Amawenda ombu Pilate uyewivula mfumbi Jesus. 53Amajisundusa va kurusu na amajipieta va muvelu; amajisunsa mu ngila ajimapaku mu dimanyi aji mbe jisakasunsu mfumbi jisusu. 54Yilumbu yieni yimaba vendredi, diwendi rie: samedi jikabebeli.
55Bagetu abamaruyila o Galilee bamawenda na Joseph uyelaba mfumbi Jesus nana jimasunsulu muna ngila. 56Bamagabuga o ndagu na bamakunsa matsi na miyombu uyegotsa mfumbi. Mbana yilumbu yisamedi bamatsana, adina dimaba diwelimina na migaga miogu.
Цяпер абрана:
Luc 23: PUU1992
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
La sainte Bible en langue Yipunu © Alliance Biblique du Cameroun, 1992.