YOANO 2
2
1Ha tangwa liamuchitatu, mwapwile umbachiso mu Kena, chihunda cha mu Ngalileya; ni naye ya Yesu wapwileko: 2alakenyene Yesu nawa ni tumbaji twenyi ku umbachiso. 3Muze ahonene vinyu, naye ya Yesu yamba kuli iye ngwenyi, Vinyu keshi nayo. 4Yesu yamba kuli iye ngwenyi, Pwo, kuchi ni yami ni yena? Ola yami kanda yiza. 5Naye yamba kuli tuvumbi ngwenyi, Cheswacho mamba kuli yenu, chilingenu. 6Achi, kwapwile sapa ja mawe jisambano ajiseleko nikulita ni ndako ja A-Yunda ja kulipemesa, jeswe, yimwe ni yimwe, jalita ni njongo jiali hanji jitatu. 7Yesu yamba kuli ayo ngwenyi, Zalisenu sapa ni meya. O ajizalishile ndo ku mukomo. 8Iye yamba kuli ayo ngwenyi, Switenu haliapwila, nutwale kuli mukwa kuyula ulungi, o ajitwalile. 9Alioze muze te mukwa kuyula ulungi apanjikile meya aze aalumwine vinyu, kanyingikine kuze yakatuka (alioze tuvumbi waze aswichile meya anyingikine), mukwa kuyula ulungi yatambika sandungi. 10Yamba kuli iye ngwenyi, Atu eswe masa hatangu vinyu yipema ni muze atu hanwa chikolo, hohene masa yize hi yipema ko: yena hiwatunga vinyu yipema ndo haliapwila. 11Chino chitangu cha ku yilayi yenyi Yesu wachilingile mu Kena, chihunda cha mv Ngalileya, nikusolola uhenya wenyi; ni tumbaji twenyi amufulielele.
12Kulutwe lia chino, wapalumukine ku Kafwanaume, iye ni naye, ni ana-akwo, ni tumbaji twenyi; atwamineko hi matangwa anji ko.
13Chizomboka cha A-Yunda muchikundama, mba Yesu wakandukile ku Yerusaleme. 14Iye wawanyine mu tembele waze alanjishile ngombe ni mapanga ni tutele, ni akwa kusumbakenya mbongo kanatwamamo: 15iye wahosele shikote ya mihipu, watuhwishile eswe mu tembele, ni mapanga ni ngombe; wamwangine mbongo ja akwa kusumbakenya, nikulimbula mesa jo; 16wambile kuli waze alanjishile tutele ngwenyi, Twalenu yino yuma haze; kanda nukapwisa zuwo lia Tata zuwo lia chitanda. 17Tumbaji twenyi ewulukile ngwe chinasonewa ngwo, Kulinga ni mbunge yeswe ha zuwo lie hichinanguli. 18A-Yunda kashika amukumbulwile ngwo, Chilayi chika mulweza kuli yetu se wakulinga yino yuma? 19Yesu waakumbulwile ngwenyi, Onwonenu tembele yino, mba ha matangwa atatu mungukayihindwisa. 20A-Yunda kashika ambile ngwo, Makumi awana a miaka ni miaka yisambano apwile nikutunga tembele yino, ni yena mukayihindwisa ha matangwa atatu, nyi? 21Alioze iye wahanjikile ha kutwala ku tembele ya mujimba wenyi. 22Muze te kashika hamuhindwisa hakachi ka afu, tumbaji twenyi ewulukile ngwe wambile chino; o afulielele che chisoneko, ni liji lize ambile Yesu.
23Muze apwile mu Yerusaleme ku Chizomboka, ku chiwanyino, anji afulielele jina lienyi, ha kumona yilayi yenyi yize apwile nikulinga. 24Alioze Yesu mwene kakolelele kuli ayo, mumu wanyingikine atu eswe, 25kafupile umwe ashindakenye hali atu; mumu iye mwene wanyingikine chize chili muli atu.
Цяпер абрана:
YOANO 2: Csa
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Chokwe Bible © Bible Society in Angola, 1975.