मत्ती 18
18
सोरगोन राजमा मोटलु कुन?
(मरकुस 9:33-37; लुका 9:46-48)
1तिने टेमे चेला येसुनचा आवीन पुछने लाग्या, “सोरगोन राजमा मोटू कून छे?” 2इनापोरसी येसु एक पुऱ्या काजे साते बुलावीन तिंदरे इचमा उबराख देदू, 3एने कोयू, “मे तुमु काजे छाचलीन कोयो कि जेतार तोक तुमु नि बोदले एने नानला पुऱ्यान तोसा नि बोने, तुमु सोरगोन राजमा नि जाय सोके.” 4जू कुदू आपना खुद काजे इना पुऱ्यान तोसु नानलो नि बोने, चू सोरगोन राजमा मोटू होयसे. 5एने जू कुदू मारे नावसी एक ओसा पुऱ्या काजे मारे नावोसी स्वीकार कोरसे चू मेसे काजे स्वीकार कोरसे.
पाप कोरनेन पारख
(मरकुस 9:42-48; लुका 17:1-2)
6“बाकीन जू कुदु इना नानलामा गोथू मार पोर भुरसू कोरे ती एक काजे ठूकर खावाळे, तेरेन कोरता वारला होये कि मोटली घट्टीन पुळ तेरे गोवामा बांदाय जातलो छे, एने चू उंडला दोरीयान पाणीमा डूबाय जातलो.” 7ठूकरोन वोजेसी जोगो पोर हाय ठूकरोन लागनो जोरुरी छे; बाकीन हाय तिना माणसो पोर जिंदरे लारे ठूकर लागतेली छे.
8“कोदि तारू हात नीती तारू पाय तुसेक ठूकर लागाळे, ती तीनाक काटीन नाख दे; दुंन्डू नीती लेंगळू होयीन जीवनमा प्रवेश कोरनो तारेन कोरता इना गोथो भोलो छे कि दुय हात नीती दुय पाय रोयीण बी तू ओमोरकाईन आगठामा नाखाय जाय. 9कोदि तारू डूवू तुसेक ठूकर खावळावे, ती तीनाक निकावीन नाख दे; बाडलु होयीन जीवनमा प्रवेश कोरणे तारेन कोरता एरे गोथो वारू छे कि दुय डूवा रोयीण बी तू नोरोगन आगठामा नाखाय जासे.”
खुवायला गाडरान दाखलू
(लुका 15:3-7)
10“देखू, तुमु इना नानलामा गोथू कुदा काजे बी वीटरावो नि सोमजनो; काहाकि मे तुमु काजे कोयो कि सोरगोमा तेरा दूते मारा सोरगोन बासोन मूय हमेशा देखतेला छे,” 11(काहाकि माणसोन पुऱ्यु खुवायला काजे वाचाडने आवलु छे). 12“तुमु काय सोचतला छे? ओगर कुदा माणसो जु सोव गाडरा होसे, एने तिना मायलु एक भोटकी जाय, ती काय चो एक कोम सोव काजे छुळीन, एने बोयळा पोर जायीन, तिनी भोटकायली काजे नी हेरे?” 13एने कोदि ओसो होये कि तीनाक जोळे, ती मे तुमु काजे छाचलीन कोय कि चे तीनाक एक कोम सोव गाडरान कोरता जी खुवायली नी होती, ओतरी खुशीसी नी कोरे जोतरो कि इना गाडरान कोरता कोरसे. 14ओसोच तुमरू बास जू सोरगोमा छे जी मोर्जी नी कि इना नानला मायला एक बी नष्ट होये.
गुणावावा साते चाल चलन
(लुका 17:3)
15“ओगर तारू विस्वासी भाश तारे खिलापमा पाप कोरे, ती जा एने एखलामा वात कोरीन तीनाक सोमजाड; कोदि चू तारी सोमवे ती तू आपना भाश काजे ली लेदू. 16ओगर चू नी सोमवे, ती एक नीती दुय जोना काजे आपने साते ओवी लीन जा, कि होर एक वात दुय नीती तीन गोवान मूय सी पाको कोराय जाय. 17ओगर चू तिंदरी बी नी माने, ती मंडवी काजे कोय दे, बाकीन कोदि चू मंडवीन नी माने ती तू हिनाक दिसरा जात्या एने फावू लेनेवावान तोसो जान.”
रुकनो एने मोकू आपनो
18“मे तुमु काजे छाचलीन कोयो, जो काहीन तुमु धोरती पोर बांधसु, चू सोरगोमा बांधसे एने जो काय तुमु धोरती पोर उगाळसु, चो सोरगोमा उगळसे. 19एने मे तुमु काजे कोयो, कोदि तुमरे मायीन दुय जोना धोरती पोर काहनीस वातोन कोरता एक मोन होयीन तीनाक मांगे, ती चो मारे बासो जुव गोथो जू सोरगोमा छे, तिंदरेन कोरता होय जासे. 20काहाकि जा दुय नीती तीन मारा नावमा एखठा होयतला छे, चा मे तिंदरे इचमा मा रोयतलु छे.”
दया नि करनेवावा दासोन दाखलू
21ती पतरस साते आवीन येसु काजे कोयू, “हे प्रभू, ओगर मारू भाश पाप कोरतू रोये, ती मे हिनाक कोतरी कावार माफ कोरो? काय सात कावार तोक?” 22येसु तीना काजे कोयु, “मे तुसे काजे यो नी कोयतू कि सात कावार तोक नी तेत्यार सात कावारोन सत्तर गुणा तोक.”
23“इनान कोरता सोरगोन राज तिना राजा सारखो छे, जू तेरा दासो जुव लेखो लेने हिंड्यु. 24जेतार चू लेखो लेने बाज गोयू, ती एक जोन तेरे सामने लावाय गोयू जू दोस होजार तुळान कर्जदार होतु. 25जेतार कि आपने कोरीन काय नी होतो, ती तेरु मालिक कोयू, यु एने हेरी लाडी एने पुऱ्या एने जो काय हेरो छे आखो काय वेचाय जाय, एने कोरजू आपाळाय जाय.” 26इनापोरसी चू दास पोळीन तीनाक नोमोन कोऱ्यु, एने कोयू, “हे मालिक धीर धोर, मे आखो काय भोर दिस.” 27तेत्यार तिना दासोन मालिक गिन खायीन तीनाक छुळ देदू, एने तेरु कोरजू बी माफ कोर देदु.
28बाकीन जू दास बारथे निकव्यू, ती तेरा साती दासोमा गोथू एक हिना काजे मेव्यू जू तेरा सोव दिनारोन कर्जदार होतु; चू तीनाक धोरीन तेरु गोवू दाब्यू एने कोयू, “जो काय तार पोर कोरजू छे भोर दे.” 29इनापोरसी तेरु साती दास पोळीन तीनाक विनता कोरणे बाज गोयू, “धीर धोर, मे आखो भोर दिस.” 30चू नि मान्यु, बाकीन जायीन हिनाक बंदी घोरोमा घाल देदु कि जेतार तोक कोरजू भोरी नी आपे, चा तोक होयात रोये. 31तेरे साती दास यो चो होयलो होतो देखीन जुदा उदास होया, एने जायीन आपना मालिक काजे पुरो हाल कोय देदा. 32तेत्यार तेरु मालिक तीनाक बुलावीन तीना काजे कोयू, “हे दुष्ट दास, तू यो मेसे काजे विनता कोऱ्यु, ती चो मे तारू पुरू कोरजू माफ कोर देदू, 33इनान कोरता जोसू मे तारे पोर दया कोऱ्यु, तोसोच काय तुसेक बी आपने साती दासो पोर दया कोरनो नी जुवतो होतो?” 34एने तेरु मालिक रीसमा आवीन तीनाक दोंड देणे वावान हातोमा सोप देदु, कि जेतार तोक चू आखो कर्जदार भोरी नी आपे, तेत्यार तोक तिंदरा हातोमा रोये.
35“इना रितीसी कोदि तुमरे माहीन होर एक आपना भाशो काजे मोनोमा माफ नी कोरे, ती मारू बास जू सोरगोमा छे, तुमरे साते होसुत कोरसे.”
Цяпер абрана:
मत्ती 18: BFBNT
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Bareli Pauri (बारेली पावरी) Bible by The Love Fellowship is licensed under Creative Commons Attribution-ShareAlike 4.0 License.