Yohana 1
1
1Pa kutumbula likayili Lilowe, ni Lilowe likayili pa Mulungu, ni Lilowe likayili Mulungu. 2Yuyu akayili pa ndumbulo pa Mulungu. 3Fyoha fikakitiki nuyombe; ni pangali yombe nakukitika lepa kindu iki kikakitiki. 4Mwa yombe kukayili kulama; nu kulama uku kukayili lulangalila lwa wandu. 5Nu lulangalila lumulika mu lwisi; nu lwisi lukalukamwili lepa. 6Akawoniki mundu, wakutumika kuhuma pa Mulungu, lihina lyake Yohana. 7Yuyu akachiti kwa ulungamakiso, nausi alase ulungamakiso wa lulangalila, kukita woha wakele nuyombe. 8Yula akayili lepa lulangalila lula, koma nausi alase ulungamakiso wa lulangalila lula. 9Kwayili lulangalila lwa chakaka, lwakumulikila mundu ayi yoha, lwakuyicha mu ndima uwu. 10Akayili mu ndima, nu ndima ukakitiki nuyombe, nu ndima ukammanyiti lepa yombe. 11Akachiti pa findu fyake mwene, na wala wakayili wake mwene wakanjupalili lepe. 12Leka woha wawakanjupiti, akawapili wombe chengo waye wana wa Mulungu, awa walikela lihina lyake: 13wala wakahogoliki, kupita lepa pa mwasi, haka pa kulonda kwake nyama, haka kulonda kwake ngosi, koma kupita pa Mulungu. 14Ni Lilowe likakitiki mbili, ni likahweliti pa tenga (ni tikakulolakisi kukwisika kwake, kukwisika ngati kwa uyu wakuhogoleka wakape kuhuma pa Dadi), wakumema nu neema ni fya chakaka. 15Yohana alasa ulungamakiso wa yombe, ni akwesa, kujowa, Uyu yuyu nakitaga, Yombe yuahicha munyuma mwa nenga akitiki palongolo pa nenga: ndawa akayili wa kutumbula wangu. 16Pakuya kuhuma pa fya kumema fyake tenga tawoha tikayupiti, ni neema ya kuyupalila ni neema. 17Pakuya torah yikapeliwi nu Musa; neema ni fya chakaka fikawoniki pa Yesu Kristo. 18Nakuya mundu lukumbi luyi lwoha ambweni Mulungu; Mwana wa kuhogoleka wakapekape, uyu ayii pa kifimba kya Dadi, yuyulayula akankokosili.
19Nu uwu uyii ulungamakiso wake Yohana, pala waYehudi wakatumiti kwake makasisi na waLevi wa pa Yerusalem kunkota, Wenga uyii nani? 20Na akayitakisi, nukubela lepa; nakayitakisi, kujowa, Nenga nukuya Kristo. 21Na wakankotiti, kujowa, Apa wuli? Wenga uyii Eliya ati? Ni ajowa, Nukuya nenga. Wila wenga uyii wakulweta yula? Nakahigiti, Lepa. 22Mumu wakajowiti kwa yombe, Uyii wa naa? nausi tipeleke lihigo kwa wala wakatitumiti. 23Wijowa wuli wamwene? Akajowiti, Nenga niyii njowelo yakukuwa mu mapululu, Mugolosaye ndila ya Bambo, ngati umu akajowili Isaya wakulweta. 24Na awa watumiki kuhuma pa waFarisayo. 25Ni wakankotiti yombe, ni kunjowela, Wila ndawa kiki ubatisa, wona nukuya Kristo, haka Eliya, haka wakulweta yula? 26Yohana akahigiti kwa wombe, kujowa, Nenga nibatisa kwa machi: pagati pinu ayima uyu mwenga mummanya lepa, 27yuahicha munyuma mwa nenga, yuyu nakulinganila nenga kuwopola lukoto lwa kilato kyake. 28Aga gakakitiki pa Betania lisi lila lya Yordani, pala Yohana akayili kubatisa.
29Lukela lwake ambona Yesu ayii mu kumhichila yombe, na ajowa, Lola, Mwana ling’osi wa Mulungu, wakusiwusa sambi sya ndima! 30Uyu yuyu nakitaga, Munyuma mwa nenga ahicha mundu uyu akitiki palongolo pa nenga: pakuya wakutumbula wangu ayii. 31Na nenga nikammanyiti lepa yombe; koma kukita awawonakele waIsrael, kwa ndawa iyi nikachiti nenga nibatiseye kwa machi. 32Nu Yohana akalasiti ulungamakiso, kujowa, Nandolakisi Roho ayii mu kuselela ngati njiwa kuhumila kunani; na akahweliti panani pa yombe. 33Na nenga nikammanyiti lepa yombe: koma yula akanitumiti kubatisa kwa machi, yuyulayula akajowiti kwa nenga, Pa uyu yaumbone Roho anselelela, ni kuhwela pa yombe, uyu yuyu abatisa pa Roho Mbalafu. 34Nenga nani niweni, ni nalungamakili kukita uyu ayii yuyu Mwana wa Mulungu.
35Lukela lwake kawili Yohana akayimi na wawili wa wanafunsi wake; 36na akambweni Yesu ayii mu kugendagenda, na ajowa, Lola, Mwana ling’osi wa Mulungu! 37Na wanafunsi wake wawili wakanjufwini yombe pa kujowa, na wakankisiti Yesu. 38Leka Yesu akang’anamwiki, nakawalolakisi wankisa, na awajowela, Mulondalonda kiki? Leka wakajowiti kwa yombe, Rabbi (ili likokoseka, Mwalimu), uhwela kuu? 39Awajowela, Muhichaye, mukawone. Mumu wakahichiti, na wakakuweni kuku ahweliti; ni wakahweliti kwake ligono lililalila: yikayili ngati saa kumi. 40Andrea, nung’una wa Simon Petro, akayili yumonga wawala wawili wawakayufwini kwa Yohana, ni wakankisiti yombe. 41Yuyu pakutumbula ankolela mbele mundu Simon, ni akokosela, Tinkolili Masiya (kukokoseka, Kristo). Akabiti nako kwa Yesu. 42Yesu apa akandoliti, akajowiti, Wenga uyii Simon mwana wa Yohana: yaukemaleke Kefa (lila kukokoseka, Petro).
43Lukela lwake akalonditi kubita mwanja ku Galilaya, ni ankolela Filipo: nu Yesu anjowela, Unikise nenga. 44Leka yombe Filipo akayili kuhuma pa Betsaida, wa likaya lila lya Andrea nu Petro. 45Filipo ankolela Nathaniel, nanjowela, Tinkolili uyu andembiti Musa pa torah, na wakulweta, Yesu mwana wa Yosefu, wakuhuma pa Nazareti. 46Nathaniel akajowiti kwa yombe, Kindu kinofu kihotola kuhuma pa Nazareti ati? 47Filipo anjowela, Wichaye, ukalole. Yesu akambweni Nathaniel ahicha kwa yombe, nanjowela fya yombe, Lola, mIsrael wa chakaka, pa yombe payilepe kukonga! 48Nathaniel anjowela, Kuhumila kuliku uniwalalila nenga? Yesu akahigiti, nakajowiti kwa yombe, Akona Filipo kukukemela, apa ukayili pasi pa nkuyu pala, nikakuweni wenga. 49Nathaniel akamhigiti, Rabbi, wenga uyii Mwana wa Mulungu; wenga uyii Mutwa wa Israel. 50Yesu akahigiti nakajowiti kwa yombe, Ndawa nikajowiti kwa wenga, Nikakuweni pasi pa nkuyu, hino ukela? yaufiwone fya kulutila ifi. 51Na anjowela yombe, Chakaka chakaka niwajowela, Yamukuwone kunani kudinduliki, na wamalaika wa Mulungu kukwela na kuselela panani pa Mwana wa adam.
Цяпер абрана:
Yohana 1: MGS1937
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
First published by the British and Foreign Bible Society in 1937.