Juan 7
7
Jesús tyvyre jyrojããhe
1Kova mbai hasamarã, Jesús iko vata'i tenta Galileaipi, hãrã ñatẽỹ oho Judeape, shara Judiore heka ñynõĩ haipe pota juka retarã. 2Tẽvã, vãhẽserima Judiore jy'arete “Oo rãĩmire jy'arete” he'iashua, 3hãrã Jesús tyvyre heishu: Avy pytakui kope; ekua tenta Judeape. Rymboiryreare hesha verã jyve nde rijapova. 4Shara pota kuaaha katuva, japoãpo maĩnunga ñemiãpe. Hãrã rijapova, japo opavare hỹnonde. 5Hokava hei reta shara tyvyre jyrojããhe. 6Hãma Jesús heishu reta: Ndeiteri vãhẽ shy'ara, tẽvã pee pevarã ĩmerãẽã ara haikavipe. 7Kuaretare ko yvy ĩãrẽ ẽvare katũã pyndyreshatãã; tẽvã she shymymorãã reta, shara she ambeushu reta mbai porãmba japo vekuare. 8Pekuape ñymby'areteha'õpe; ahããteriposhe, shara ndei vãhẽ shy'ara. 9Opama kova heishu retarã, pyta Galileape.
Jesús oho oo rãĩmi jy'aretepe
10Tẽvã ñymoña hãndiare opama ohorã, Jesús oho jyve ñymby'areteha'õpe; ñemiapẽĩ ohova rãĩmi. 11Haipe Judiore heka jyrerã hei: Mãĩpiante ĩme'ẽ hokava kuimbai? 12Hãma kuaretare mbytepe heta'ẽ ijetahevare. Ĩme'ẽ heiva: “Kuimbai heko kaviva rãnga”, tẽvã yngavare hei: “Kuaretare mbytavy'ia rãnga hai hokava”. 13Tẽvã mba'etymba ijetaiteheva, shara kyjeshi reta Judiore juhuvisha. 14Hãrã arete mbytema ohorã Jesús tũpaope icherã, õñepyrõ pyrỹmboi. 15Haipe Judiore mbyrymaĩ retarã hei: Marãira hetaite mbai kuaa, ñymboimba vekua? 16Jesús heishu reta: Kova ñee apyrỹmboihea ha'ẽã sha'ãpova. Tũpa ña'ãpova rãnga, shymbou vekua. 17Tũpa ĩñee pota japova, kuaañoĩpokui she apyrỹmboiheva, haira Tũpa potava rãĩmi, maĩrã shijuhuviira aijeta. 18Hareka ijuhuvii pyrỹmboiva, japo pota kuaretare mbyveteshurã; tẽvã Tũpa mbouva õñehãã kyrã japo õmombaivasushu verã, hokava añeteva hei hareka mba'etyre mbai hekopemba'õ. 19Me'ẽãrape Moisés ñee mbyparahava? Tẽvã mba'ety japova. Mbaiva rehera pota shukapi? 20Kuaretare heishu: Mbaiposhy rãnga nymbykuakuã'i! Mbavara pota nduka'i? 21Jesús heishu reta: Putu'uava jy'arape, mbaikavi heshaha verã ajapo vekua reheĩ rãnga, opa mbyrymaĩ reta. 22Hãme rãnga Moisés hejambape pyndyray pire chĩchĩãshi verã haimbate Moisés mbyparava, pynytynondeva reta rãnga, hãrã putu'uava jy'arapeave japo reta. 23Tẽvã, hekope kavi pijapo verã Moisés mbypara vekua, sanjay kuimbaimire putu'uava jy'arapeave pire pichĩchĩshi, marã'ĩrãra pyposhypishe amynguera putu'uava jy'arape pente ñymbairasyvarãme? 24Hãrã pijetapohe mbavarã hekope kavi pijapo, avy pimoã vekuaĩ pymbeu. Pikuaa kavi rãnipo ãñetera kyrã.
Jesús mbeu mãĩvira ou
25Haipe Jerusalenvare, pyrãndu jyre: Ha'ẽãra ko kuimbai, heka jyreare juka verã? 26Pymãĩhe kuty ijetañynoĩ hãndi reta, mba'ety rãnga mbai heishua. Ĩmera'ẽ ñanduruvishare rojava ko kuimbai ãñeteĩte haiva Cristo? 27Ñande rãnga jaikuaa mãĩvira ou ko kuimbai; tẽvã Cristo oumarã, mba'etypokui kuaava mãĩvira ou. 28Hokava hendurã, Jesús tũpaope pyrỹmboi'ẽrã hỹnatu hei: Ãñetera pikuaa mbavara she hareka mãĩvira'ai? Tẽvã She shijuhuvireiã'ai; añeteva rãnga shymbou, pikuaambava. 29Tẽvã She aikuaashu shara hai ẽvãivi ai, hareka hai shymbou. 30Haivi pota pysykajyre; tẽvã mba'ety pysyva shara ndeiteri vãhẽ jy'ara. 31Heta kuaretare jyrojaherã, hei jyre: Cristo oumarã, mbaikavi heshaha verã hetaverapo japokui ko kuimbai japovaivi?
Fariseore mondo syndaro pysy verã Jesús
32Fariseore hendu kuaretare heiheva Jesús; hãrã haire hareka pai ruvishare hãndi, mondo reta tũpaope'õ syndarore pysy verãre Jesús. 33Haipe Jesús hei: Mbovy araĩmapo ãĩme'ãĩ pynymbytepe, haivi ahajypokui Tũpa shymbou vekua'õpe. 34Hãrã shyrekapopikui, tẽvã shyreshapopikui, shara katũãpo peho, she aha verãpe. 35Hãma Judiore pyrãndu jyre ijupe: Matyrapo ohojy ko kuimbai, katumba ñavãĩshu verãpe? Ohorapo Judiore opa ñymõmohẽva hendaipi, mboishu verã griego reta? 36Mbaivara he'ise ko hei ñandeva: “Pee shyrekapopikui, tẽvã shyreshapopikui; shara katũãpo peho she aha verãpe”?
Yy syryva tykove meẽva
37Arete vasu ara koñymava mbyharuaveva, Jesús ñymbou hỹnatu ijetarã hei: Ĩme'ẽ ju'uhevarã tou shyrẽndape, hou verã yy. 38Jyroja shyreheva, Mbyparahava heiva rãĩmi, pyaivivepo syry'ẽkui yy meẽva tykove. 39Hokava Jesús heirã, he'ise jyrojaheare mẽ'ẽãshu verã Espiritu; tẽvã hoka arape Espiritu Santo nde'iaveteri ou, shara Jesús nde'iave teri ohojy vate arape.
Jesús rehe pente ñeepeã ñynõĩ kuaretare
40Ĩme'ẽ kuaretare mbytepe hendu hokava ñeerã heiva: Haiñõĩ ãmo Tũpa ĩñee mbeu'ia ñahãrõ ñaĩva. 41Ĩrũre hei: Kova hai Cristo. Yngavare heijy: Marãrapo Cristo Galileaivi ou? 42Mbyparahavape rãnga hei: Hokava Cristo haipokui huvishavasu David ñymoñashi vekua hareka Belenpe'õ, David henta, haivipo ou Cristo. 43Hãrã kyrã kuaretare ijeta jyrehe Jesús pente ñeepembaa ñynoĩvape. 44Ĩme'ẽ pota pysykava; tẽvã mbavẽã japohe maĩnunga.
Huvishare rojãã reta Jesús
45Hãma syndarore tũpaope'õre oujy fariseo hareka pai ruvishare ẽvãperã, haire pyrãndushu: Marã'ĩrãra peruambaje? 46Haipe syndarore hei: Mba'ety ko kuimbai rãĩmi ijetava! 47Haivi fariseore heishu: Peeavera piñymbytavyka jyve? 48Ĩmera'ẽ huvishare, maĩrã, fariseore jyrojaheare? 49Tẽvã kova kuaretare Moisés mbypara vekua kuambava retaĩ rãnga jyrojahe, hãrã Tũpa jahepohekui. 50Nicodemo hai jyve fariseore penteva, Jesús ẽvãpe pente pyharepe ohorã hei: 51Ñee mbyparahava ñandy kuatiape'õ rãnga hei: “Katuã jahehahe pente kuimbai hẽnduhã terishurã hareka kuaahãteri japovarã”. 52Haipe heishu reta Nicodemo: Galileape'õra jyve nde? Mãĩ kavipy kuatia Mbyparahava. Hãrã rikuaapo penteã Tũpa ĩñee mbeu'ia ou Galileaivi. 53Haivi pepenteĩ ohojy hentaipi.
Цяпер абрана:
Juan 7: TPJ
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
©2023 LETRA Paraguay