الإنجيل زي ما كتبه مَتَّى 17
17
التجلي
1و بعد ستة أيام، أخد يسوع بطرس ويعقوب ويوحنا أخوه، وركب وياهم على أنفراد على جبل مرتفع، 2وتجلى قدامهم، وشع وجهه نور زي الشمس، وصارت ثيابه بيضة زي النور. 3وماشافوا إلا موسى وإيليا طلعوا ليهم، قاعدين يتكلموا ويا يسوع. 4و قام بطرس يقول ليسوع: "يا سيد، مو أحسن لينا ننصب الخيام ونظل هني. و إدا بغيت، بنصب هني ثلاث خيمات: وحدة لك، ووحدة لموسى، ووحدة لإيليا!" 5و هو بعدهو يتكلم، ماشافوا إلا غيمة مضوية ظللتهم، وجا صوت من الغيمة يقول: "هدا هو ولدي الحبيب إلا فرحت به أعظم فرحة. أسمعوا كلامه!" 6و لما سمعوا التلاميد الصوت، خافوا حدهم، و طاحوا على وجوهم. 7وقرب منهم يسوع ولمسهم و قال: "قوموا لاتخافوا!" 8و قاموا رفعوا راسهم، و بس شافوا يسوع بروحه.
9و هم نازلين من الجبل، وصاهم يسوع و قال ليهم: "لا تقولوا لأحد باللي شفتوه اليوم إلى غاية ما يقوم إبن الإنسان من بين الميتين." 10وسألوا تلاميده: " إلاويه عجل يقولوا الكتبة إن لازم بيجي إيليا أول؟" 11و رد عليهم و قال: "أي، إيليا جي و على إيده بيتجدد كل شي. 12و أمبى أقول ليكم: إيليا جا، و لكنهم ما عرفوه، وسوّوا فيه إلا يمبوه. ونفس الشي بعد إبن الإنسان بيتعدب على إيدهم." 13ووقتها فهموا التلاميد إنه كان يتكلم وياهم عن يوحنا المعمدان.
صبي فيه شيطان يتشافى
14و لما وصلوا إلى جماعة الناس، جا رجال ليسوع، وركع قدامه، 15و قال له: "يا سيد، أرحم ولدي لأنه مريض فيه صرع، و قاعد يتعدب عداب ما بعده عداب. و أحيانا يطيح في النار وأحيانا يطيح في الماي. 16و وديته لتلاميدك، و ما قدروا يشفوه." 17و رد عليه يسوع و قال: "يا الجيل الأعوج ومو المؤمن، إلى متى أنا بقعد وياكم؟ إلى متى بتحملكم؟ جيبوه ليي هني!" 18وانتهر يسوع الجني، وطلع من الولد، وآنشفى الولد على طول. 19وبعدين جو التلاميد ليسوع على أنفراد و سألوه: " إلاويه أحنا عجزنا إن نطّلع الجني؟" 20و قال ليهم: " بسبب قلة إيمانكم. بأمانة أقول ليكم: لو كان عندكم إيمان قد حبة الخردل، كان قدرتوا تقولوا لهالجبل: تحرك من هني إلى هناك، وبيتحرك، ولافي شيء بصير مستحيل عليكم. 21أما هالنوع من الشياطين، فماينطرد إلا بالصلاة و الصوم."
يسوع يتنبأ مرة ثانية بموتته
22و يوم كانوا متجمعين في الجليل، قال يسوع لتلاميده: " قريب بيتسلم إبن الإنسان إلى أيادي الناس، 23وبيقتلوه. و في اليوم الثالث بيقوم!" وتضايقوا مره.
ضريبة الهيكل
24و لما وصلوا إلى قرية كفرناحوم، جا إلا يشتغل في مكتب الضرايب حق الهيكل و قال إلى بطرس: "عاده معلمكم يدفع الضرايب إلا عليه للهيكل؟"
25و رد عليهم و قال : "إي يدفع!"، و لما دخل بطرس البيت، على طول يسوع سأله: "وش رايك يا سمعان: من من ياخد ملوك الأرض الجزية والضريبة؟ من عند أولادهم، لو ياخدوهم من عند الأجانب؟" 26و قال له بطرس: "من عند الأجانب." و قال له يسوع: "يعني أولادهم أحرار، 27شوف - عشان ما تصير مشكلة وياهم، روح بحيرة الجليل، و أرمي السنارة هناك، وصيد أول سمجة تطلع لك، و أفتح بوزها و بتحصل فيها قطعة نقد بقيمة أربعة دنانير، خدها وأدفع الضريبة عني وعنك!"
Цяпер абрана:
الإنجيل زي ما كتبه مَتَّى 17: QNAV
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Qatifi New Arabic Version © 2024 Strategic Resource Group