الإنجيل زي ما كتبه مَتَّى 26
26
المؤامرة لقتل يسوع
1و لما خلص يسوع كلامه، قال لتلاميده: 2" أنتون عارفين أن بعد يومين بيجي عيد العبور، وبيتسلم إبن الإنسان عشان ينصلب."
3و وقتها بيجتمعوا رؤساء الكهنة وقادة الشعب في بيت رئيس الكهنة وإسمه قيافا، 4وتآمروا عشان يمسكوا يسوع بالسكته ويقتلوه. 5و قالوا: " عشان لا يصير هالشي في يوم العيد، و ما تصير فوضى وبلبلة بين الشعب!"
مسح المسيح بالعطر
6و لما كان يسوع في قرية بيت عنيا عند سمعان الأبرص، 7جت له مره حامله غرشة عطر غالي، ويسوع كان قاعد، و راحت له وصبت العطر على راسه. 8واتضايقوا التلاميد لما شافوا إلا صار، و قالوا : "وش هالتبدير؟ 9كان يمكن أن هالعطر ينباع بفلوس واجد، و ينعطى ثمنه للفقرا!" 10و لما عرف يسوع إلا قالوه، قال ليهم: "إلاويه قاعدين تضايقوا المره، إلا سوته لي شيء جميل، وقصدته للخير." 11هدوهم الفقرا عندكم طول الوقت، لكن أنا ما بكون وياكم دايما. 12وهي يوم صبت العطر على كل جسمي، قصدت أنها تجهزني لدفني. 13وبأمانه أقول ليكم: لما قصص هدا الإنجيل يتبشر بها في كل مكان في العالم، بيندكر إلا سوته هدي المره، إحياء لذكرها!"
يهودا يتفق على تسليم يسوع
14ووقتها راح واحد من التلاميد الإطنعشر - و أسمه يهودا الإسخريوطي، إلى رؤساء الكهنة، 15و قال ليهم: "كم بتعطوني عشان أسلمه ليكم؟" و وزنوا له ثلاثين قطعة فضة. 16و من هداك الوقت، يهودا كان ينتظر الفرصة عشان يسلمه.
عشى الرب
17و في اليوم الأول من أيام عيد الفطير، جو التلاميد إلى يسوع عشان يسألوه: "وين تمبى نجهز لك عشى عيد العبور عشان تاكل؟" 18و رد عليهم يسوع، و قال : "أدخلوا المدينة، وروحوا إلى فلان وقولوا له: "المعلم يقول إن ساعتي قربت، وبسوي عيد العبور عندك ويا تلاميدي." 19فسووا التلاميد إلا أمرهم به يسوع، وجهزوا عشى عيد العبور هناك.
20و في المغرب قعد يسوع ويا التلاميد الإطنعشر. 21و هم قاعدين ياكلوا، قال ليهم: "بأمانة أقول ليكم: إن واحد منكم بيسلمني." 22وحزنوا مره، و قام كل واحد منهم يسأله: "أنا هو إلا بسلمك يا رب؟" 23و رد عليهم و قال: "إلا بيغمس إيده ويايي في الصحن هو إلا بيسلمني." 24إبن الإنسان لازم بيروح زي ما هو مكتوب عليه، و لكن الويل لداك الرجال إلا على إيده بيتسلم إبن الإنسان. كان أحسن له لو ما نولد!" 25وسأله يهودا إلا بيسلمه: " تقصدني أنا يا معلم؟" و قال له: "أنت إلا قلت!"
26و هم قاعدين ياكلوا، أخد يسوع قرص خبز، وباركه وقطّع القرص وعطى التلاميد و قال ليهم: "خدوا كلوا، هدا هو جسمي." 27و بعدين أخد الكاس و شكر الله، وعطاهم و قال: "أشربوا منه كلكم." 28"هدا هوعهد دمي، عهد الدم إلا بيني وبينكم و إلا بينسفك لناس واجد بتنغفر خطاياهم." 29بس أنا أمبى أقول ليكم: إني ما بشرب من بعد هاليوم من ثمرة هالعنب إلين يجي اليوم إلا أشربه وياكم مره ثانية في ملكوت أبويي." 30و بعدين قاموا يرنموا ويسبحوا الله ويا بعض، و بعدين طلعوا وراحوا جبل الزيتون.
يسوع يتنبأ بإنكار بطرس له
31و وقتها قال يسوع: " الليلة كلكم بتشكوا فيي وبتتركوني. لأنه مكتوب: "بضرب الراعي، وبتتشتت الخرفان." 32و لكن بعد قيامتي، بسبقكم إلى منطقة الجليل." 33و رد عليه بطرس و قال: "وحتى لو الكل شك فيك، أنا ما باشك فيك!" 34و رد عليه يسوع و قال: "بأمانة أقول لك: الليلة، قبل ما يصيح الديج، بتكون نكرتني ثلاث مرات." 35و قال له بطرس: "حتى لو أضطريت أموت وياك، مستحيل أنكرك أبد!" و التلاميد كلهم قالوا نفس الكلام.
بستان جثسيماني
36و بعدين راح يسوع و التلاميد بستان، أسمه جَثْسَيْمَانِي، و قال ليهم: "أنتون أقعدوا هني، و أنا باروح هناك عشان أصلي." 37وأخد وياه بطرس وأولاد زبدي، وبدا يحس بالحزن والكآبة. 38و قال ليهم: "نفسي حزينة حدي حتى الموت. خليكم وياي هني و أسهروا ويايي!" 39وتباعد عنهم شوي، ورمى وجهه على الأرض و قام يصلي ويقول: "يا أبويي، إدا أمكن، طوّف عني هالكاس: و لكن ما أمبى مشيئتي تصير و لكن أمبى مشيئتك" 40ورجع إلى التلاميد و شافهم نايمين، و قال لبطرس: " لهدرجة ما قدرتوا حتى تسهروا وياي ولو ساعة وحدة؟ 41أسهروا وصلوا عشان ما تدخلوا في تجربه. الروح نشيطة، لكن الجسد ضعيف." 42و راح مرة ثانية يصلي، و قال: "أبويي، إدا ما يصير أنك أتطوّف عني هالكاس، و كان لازم أشربه، خل تكون مشيئتك" 43ورجع للتلاميد، و شافهم نايمين بعد لأن النعسة ثقلت على عيونهم. 44فتركهم ورجع يصلي مرة ثالثة، و ردد نفس الكلام. 45و بعدين رجع إلى تلاميده و قال ليهم: "ناموا الحين وأستريحوا! جت الساعة، و راح يتسلم إبن الإنسان إلى إيد المدنبين. 46قوموا خل نروح. هاكوها قرب إلا بيسلمني!"
أعتقال يسوع
47و على طول، لما كان يتكلم، وصل يهودا، واحد من التلاميد الإطنعشر و وياه جماعة كبيرة رسلوهم رؤساء الكهنة وقادة الشعب حاملين سيوف وعصي. 48و إلا سلمه عطاهم علامة و قال: "إلا بابوسه، فهو هو؛ أقبضوا عليه!" 49وقرب من يسوع على طول و قال: "سلام يا معلمي!" وباسه. 50و قال له يسوع: " ياصديقي،يلا سوي إلا جيت عشان تسويه؟" فهجموا عليه الجماعة على يسوع و أعتقلوه. 51و واحد من إلا كانوا ويا يسوع مد إيده وسحب سيفه، وضرب عبد رئيس الكهنة، وقص أدونه. 52و قال له يسوع : "رجع سيفك مكانه! إلا يلجأ للسيف، بالسيف بيهلك 53أنت تفكر أني ما أقدر الحين أن أطلب من أبويي ويرسل ليي أكثر من إطنعشر جيش من الملائكة؟ 54وهدا چيفه بعد بتم النبؤه إلا أندكرت في الكتاب و هو مكتوب إن إلا قاعد يصير الحين لازم بيصير؟"
55و بعدين يسوع قال للجماعة: "طلعتوا بالسيوف والعصي عشان تمسكوني كاني حرامي. هداني كنت وياكم كل يوم أعلم في الهيكل، و ما مسكتوني! 56و لكن كل هدا صار عشان أتم النبؤة إلا أندكرت في كتب الأنبياء" و وقتها كل التلاميد تركوه لحاله وهربوا!
المحكمة قدام المجلس اليهودي
57و ألا أعتقلوا يسوع، ودوه إلى رئيس الكهنة و كان أسمه قيافا، وهناك تجمعوا عنده الكتبة والقادة. 58ولحقه بطرس من بعيد إلى بيت رئيس الكهنة، و بعدين دخل داخل وقعد بين الحراس عشان يشوف وش نهاية هالموضوع. 59وانعقد المجلس من رؤساء الكهنة والقادة كلهم، و حاولوا يدوروا على يسوع شهادة زور عشان يحكموا عليه بالموت، 60ولكنهم ما قدروا يحصلوا شي، مع أنه حضروا شهود زور واجد. وآخر شي جو أشخاص أثنين 61و قالوا: "هدا الرجال قال: أنا أقدر أهدم هيكل الله وأبنيه في ثلاثة أيام." 62و وقف رئيس الكهنة وسأله: " لا تجاوب على إلا يشهدوا عليك بس جاوب هدولا الإثنين؟» 63و لكن يسوع ظل ساكت ورجع رئيس الكهنة يسأله: و قال: "حلفّتك بالله الحي أنك تقول لينا: هل أنت المسيح إبن الله؟" 64و رد عليه يسوع،و قال: "هدا أنت قلتها! وأقول ليكم بعد إنكم من الحين ورايح بتشوفوا إبن الإنسان جالس عن يمين القدرة و بعدين بجي على غيوم السما!" 65و قام شقق رئيس الكهنة ثيابه و قام يصرخ: "هدا قاعد يقول كلام كفر! بعد ما لينا حاجة شهود. وهداكم سمعتوا كلامه. 66وش رايكم؟" وردوا الجماعة: "الموت هي العقوبة إلا يستاهلها!" 67وتفلوا في وجهه، وضربوه، وفي ناس لطموه 68و قالوا: "تنبأ لينا، يا المسيح، منهو إلا ضربك!"
بطرس ينكر يسوع
69و في دالك الوقت كان بطرس قاعد في القاعة إلي برا، وجت له وحدة من الخدم وقالت له: "أنت كنت ويا يسوع الجليلي." 70وأنكر بطرس قدام الجميع و قال: "ما أدري عن وش تتكلمي أنتين!" 71بعدين طلع و راح عند مدخل البيت، و عرفته خدامة ثانية، وقالت للحاضرين إلا هناك: "هدا كان ويا يسوع الناصري!" 72وأنكر بطرس كلامها مرة ثانية وحلف و قال : "أنا ما أعرف منهو هالرجال!" 73و بعد شوي قربوا الواقفين هناك من بطرس و قالوا له: "إلا صحيح أنت واحد منهم، لهجتك واضحه!" 74و بعدين صار بطرس يلعن نفسه ويحلف ويقول: "أنا ما أعرف داك الرجال!" و على طول صاح الديج، 75وتذكر بطرس كلمة يسوع يوم قال له: "قبل ما يصيح الديج بتكون نكرتني ثلاث مرات." وطلع برا، و قام يصيح بمرارة وحسرة.
Цяпер абрана:
الإنجيل زي ما كتبه مَتَّى 26: QNAV
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Qatifi New Arabic Version © 2024 Strategic Resource Group