Yɔanɨ 3
3
Yeso ɓɔyakanakɔ nɔ Nɨkɔdɛmɔ
1Ya꞉ɓio jɛnɛ nɔ mombi mʉngana amati ɔ ɨtandɛ yɔ Ɓafalisayɔ, ino ɓɔ Nɨkɔdɛmɔ. Mombi ngɨananɨ, a꞉ɓio mutatamusie wɔ Ɓayuda. 2Naɓutu mʉngana, a꞉sa anɨna Yeso, ga ɨyɔ nayɔ ɓɔ: «Ha Mʉpananakɨa, tanɨmbɨa iɗo ɓɔ Asɔɓɨɨ a꞉natʉma akɔpananakɨa ɓombi. Dɔ mombi pɔ mʉngana, angɔkwanana kɨa yaka yɛta ɨmbangɛ ngɨyɛ wakɨa, Asɔɓɨɨ ɔɓienimʉ ta ɨhɔ nayɔ.» 3Yeso ɔ꞉mutosio ɓɔ: «Nanɔwɛ aɓɨa nɔ ingono ɓɔ, mombi ɔnɔtanɨenimʉ ta machaa kapɨnɨ, angɛnamʉ Ɓʉngama ɓɔ Asɔɓɨɨ.» 4Nɨkɔdɛmɔ ɔ꞉muɓokuo Yeso ɓɔ: «Mombi anɔtanɨa tanɨ, ɔɓieni tɨa mɨtɨɛ? Akumonio ndɨ ta akɔ ɓʉa ɓɔ inye, nɔ ɔnɔtanɨa ɓata?» 5Yeso ɔ꞉mutosio ɓɔ: «Nanɔwɛ asigio ta nɔ ingono ɓɔ, mombi pɔ mʉngana angɔkwananamʉ akumonio aƁʉngama ɓɔ Asɔɓɨɨ, ɔnɔtanienimʉ ta nɔ mipo, ɨhɔ nɔ Mʉtɨma wɔta Tu. 6Ɨkyɛmʉ ngɨyɛ yɔnɔtanɨɔ nɔ mombi, ya ta mombi. Nɔ ɨyɛ yɔnɔtanɨɔ nɔ Mʉtɨma wɔta Tu, ya kʉ mʉtɨma. 7Yatɨnambangɨamʉ dɔ nɔ꞉nasigio ɓɔ, yɔkwananɔ inu ɓaɓomu anɔtanɨa ɓata ta ɨtɔ. 8Mahuo, wachana ɨwɔ ta aki waɓio-ɛɛ akʉnda. Mungito wɔngɔ waʉka ʉkanɨ, yakamɛngana, wangɛmbɨa aki wa-ɛɛ anɨka nɔ aki wa-ɛɛ anɨsa. Yakyananakɨa kʉɓanɨ nɔ mombi ngɨa ɔnɔtanɨɔ nɔ Mʉtɨma wɔta Tu.» 9Ga Nɨkɔdɛmɔ ɓata nayɔ ɓɔ: «Ɨkananja yɔ yaka ndʉ ɨyɛnɛnɨ, yakyananakɨa tanɨ?» 10Yeso ɔ꞉mutosio ɓɔ: «Ʉwɛ ndʉ mʉpananakɨa wɔta ʉja, amati ɔ ɨkʉmbʉ yɔ Ɨsalaɛlɛ aka, wangɔ ndɨ apemiso yaka ngɨyɛnɛnɨ? 11Nanɔwɛ akɔɓɨa ta ingono ɓɔ, tasugo yaka ngɨyɛ tanɨmbɨa, nɔ, nɨmaya kʉ ɓʉdɛmʉ ɓɔ yaka ngɨyɛ tɛnɔ nɔ mesu. Ɨnadɔ, inu sɔkɔmʉ nɨbaya ɓʉdɛmʉ ngʉɓeso pɔ báya. 12Yɔɓieni-sɨ ɓɔ, nángɔmʉ abaya yaka yɔ dɔdɔ ngɨyɛ nanenu asigio, nábɨbáya ndɨ tɨa nɔnɨɓɨeni yaka ngɨyɛ ya akʉʉ ɔ ɓisi? 13Mombi pɔ mʉngana a꞉ngɔɗetomʉ sina akʉʉ ɔ ɓisi, yɔɓienimʉ ta Mwana ngɨyɔ Mombi, ɨya a꞉jo anɨngwa akʉʉ ɔ ɓisi.
14Ngbanga kʉndʉ Musa ɛ꞉maiso sɨɨ wɔ mako akʉʉ ɔ mʉkakaʉ amukengu, yɔkwanana ɓɔ Mwana ngɨyɔ mombi ɓɨmɨmaiso ɨyɔ kʉɓanɨ. 15Dɔ, mombi muɓomu ngɨa amʉbaya, ɨnɨanɨa nɔ uɓei ngʉwɔ mago nɔ mago. 16Yaɓanɨ, Asɔɓɨɨ a꞉kʉnda dɔdɔ kʉ ingono, kʉdɔ, e꞉njo Mukpekpe wɔ Mwana angɔ nangana, asugo ɓɔ, mombi nga eno tanɨ, ɨya amʉbaya ɨyɔ atɨyangaamʉ, yakamɛngana, ɨnɨanɨa nɔ uɓei wɔ mago nɔ mago. 17Asɔɓɨɨ a꞉tʉmamʉ Mwana angɔ akɔnapɨa ɓombi ɓɔ dɔdɔ nɔ mʉkɔmbʉ, yakamɛngana, a꞉mʉtʉma ta ɓɔ dɔ, ɓɨnɨanɨa nɔ ɓʉhɛa. 18Mombi ngɨa amʉbaya Mwana ɔ Mombi, ɓa꞊ngɔkiomʉ mʉkɔmbʉ ngʉangɔ. Yakamɛngana, mombi ngɨa angɔbayamʉ, a tɨa nɔ mʉkɔmbʉ. Dɔ, aɓio ɓɔ ɔyaeni abaya mukpekpe wɔ Mwana ngɨa Asɔɓɨɨ.» 19Mʉkɔmbʉ ngʉwɔ Asɔɓɨɨ wa ɓɔ: «Ʉwanga wɛ꞉ka adɔdɔ, yakamɛngana, ɓombi ɓɔ꞉kʉnda nɔgbɛ ta umomo anagaaka ʉwanga. Ɓa꞉kɨa ɓanɨ dɔ, mʉkyananakɨa ngʉweɓo wa꞉ɓio ɓɨɓɨ. 20Mombi muɓomu ngɨa akyananaka ɓɨɓɨ, angɔkʉndamʉ ɨyɔ, ʉwanga pɔ bele. Nɔ, ayaa kʉ anɨka tinene nɔ ʉwanga, dɔ, ɓʉɓɨɓɨ ngʉɓangɔ ɓatɨnɨanɨamʉ aɓʉmba. 21Yakamɛngana, mombi ɔ ingono, angɔmʉ nɔ ʉɓa anɨka aʉwanga. Dɔ, mʉkyananakɨa ngʉwangɔ wɨnɨanɨa aɓʉmba, ɓɔ akyɛndaka aɨsɨ ɔ ʉpanʉ wɔ Asɔɓɨɨ.»
Yɔanɨ ɔngakɔ yaka akʉʉ ɔ Yeso
22Mbise ɔ yaka ngɨyɛnɛnɨ, atɨ Yeso nɔ ɓakpata ngʉɓangɔ, ɓa꞉sa tɨa akɔ ihoi yɔ Yudɛa. Ɓa꞉kɨa inani makwaa, ɨyɔ, akɔɓatisa ɓombi.
23Yɔanɨ a꞉ɓio ɨyɔ kʉ akɔɓatisa ɓombi amati ɨwɔnjɔ yɔ Aɨnɔnɨ, tinene nɔ ɨkʉmbʉ yɔ Salɨmʉ, dɔ, mipo ka꞉ɓio inani maja. Ɓombi ɓa꞉ɓisa inani anɨkwa uɓatiso. 24Angbinga ngɨananɨ, yaɓio-sɨ ta ɓɔ ɓangɔfenimʉ Yɔanɨ aboloko.
25Ɓisi mʉngana, nganangana ati ɔ ɓakpata ɓɔ Yɔanɨ, ɓa꞉ɓio anɨchwa pasi nɔ atɨ Muyuda mʉngana, akʉʉ ɔ gbali ngɨyeɓo ɔ mʉgyaɓa. 26Kʉdɔ, ɓa꞉sa atɨ Yɔanɨ ga ɨɓɔ nayɔ ɓɔ: «Mʉpananakɨa, wa ndɨ ɓata kʉ atunguo mombi ngɨa ná꞉ɓio pɛ nayɔ amondu ɔ Yɔlɔdanɨ, nɔ, ɨya wa꞉tʉngakɨa pɔngɔ yaka akʉʉ angɔ? Ɛɛ, a dɔ ɨyɔ tɨa kʉ akɔɓatisa ɓombi. Nɔ ɓombi ɓaɓomu, ɓanayɔ anɨkɨa tɨta ɨyɔ ɓɔ hɨtɔɔ.» 27Yɔanɨ ɔ꞉ɓutosio ɓɔ: «Mombi angɛnɨanɨamʉ nɔ ɨkyɛmʉ, yɔɓienimʉ ta ɓɔ Asɔɓɨɨ akɛ ɔ꞉minjo ɨyɔ. 28Inu ɓakwɔɓɔngɔ ná ɓadɛmʉ ɓɔ yaka ngɨyɛ na꞉sugo ɓɔ: ‹Sɔkɔmʉ ɨmɨ akɛ na Klisito, yakamɛngana, ɓa꞉natʉma ɨmɨ ta tʉma apɛɨ angɔ.› 29Gue ngɨa anɔ moi ɔ ɨmbanda akɛ, a swaɨ ɔ moi. Yakamɛngana, awai ɔ swaɨ ɔ moi, aɓio ta ananɨ anɔ ambamba angɔ. Aɓio nayɔ anɨtekio nɔ ɔkwa ɨgyagya nɔgbɛ anʉka iso yangɔ. Kʉɓanɨ, ɨgyagya mɛngana ngɨyɛ ɨmɨ nanayɔ ɨyɛ kʉ ɨyɛnɛnɨ ɓɔ chɨnɨchɨnɨ. 30Kʉɓanɨ, yɛtɔ ɓɔ ʉbɨba ngʉwangɔ wɔ Klisito wɨsɨnganaka nɔpɛɨ, nɔ ʉwɔsɛmɨ, wʉjo nɔ mʉdʉʉ.
Mombi ngɨa angwa akʉʉ ɔ bisi
31Mombi ngɨa ɔngwɔ akʉʉ ɔ ɓisi, ɨyɔ akʉʉ ɔ ɓombi ɓaɓomu. Mombi ɔ dɔdɔ a ɨyɔ ta mombi ɔ dɔdɔ, nɔ, yaka ngɨangɔ ya kʉ yɔ dɔdɔ. Nɔ, mombi ngɨa ɔngwɔ akʉʉ ɔ ɓisi, ɨyɔ akʉʉ ɔ ɓombi ta ɓaɓomu. 32Ɨyɔ, angaka ta ɨsaʉ yɔ yaka ngɨyɛ ɛna, nɔ, ɨyɛ ɔka. Yakamɛngana, mombi pɔ mʉngana angɔɓɨnyɨamʉ yaka ngɨangɔ. 33Mombi ngɨa akɔɓɨnyɨa ɨsaʉ ngɨangɔ, ambɔ ɨyɔ akɛ a꞉pemiso ɓɔ yaka ngɨa Asɔɓɨɨ ya ingono. 34Dɔ, mombi ngɨa Asɔɓɨɨ a꞉mʉtʉma, asugo kʉ yaka ngɨyɛ Asɔɓɨɨ, dɔ Asɔɓɨɨ a꞉muhuiso nɔ Mʉtɨma ngʉwangɔ ɓɔ kyɛɛ. 35Aba akʉnda Mwana kʉndanɨ, nɔ, a꞉minjo ʉpanʉ akʉʉ ɔ yaka iɓomu. 36Mombi ngɨa abaya Mwana ngɨa ɔ Mombi, anɔ uɓei ngʉwɔ mago nɔ mago. Nɔ mombi ngɨa ayaa baya Mwana ngɨa ɔ Mombi, angɛnɨanɨa nɔ uɓei. Yakamɛngana, ʉnganga ngʉwɔ Asɔɓɨɨ waɓio akʉʉ angɔ.»
Цяпер абрана:
Yɔanɨ 3: buuN
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© 2021, Wycliffe Bible Translators, Inc.