YOHANI 4
4
Yesu nunkikulu unSamariya
1Umwene Yesu bo asyagenie ukuti abaFarisai bapilike isya kuti Yesu ikukaba abafundigwa nukobosya abandu ba bingi ukunkinda Yohani 2(napapo Yesu akabosyaga yuyo, loli abafundigwa bake), 3Popapo alinkusokamo mu Yudai, alinkubuka kangi nkisu kya Galilai. 4Lelo kwalimbagile ukuti akisaniege nkisu kya Samaria. 5#Bwa 33.19; Yos 24.32Popapo alinkwakufika mu Samaria nkaya aka batigi Sikari, aka kapalamene nungunda ugu Yakobu alimpele umwanake Yosefu. 6Mo kyalimo ikisiba kya Yakobu ikya nyibuko ya misi. Umwene Yesu bo akatele injila, alinkutugala itolo panyibuko; pali po pakabalilo ka buhano na kamo.#4.6 Buhano na kamo: ko kuti ilisuba bo lili pantu.
7Popapo alinkwisa unkikulu unSamaria kukunega amisi. Umwene Yesu alinkumbula alinkuti, “Mbapo nine amisi nnwepo.” 8Namanga abafundigwa bake babukile nkaya nkula ifyakulya. 9#Ezra 4.1-5; Nehe 4.1-2Popapo unkikulu unSamaria yula alinkumbula Yesu alinkuti, “Kali ubagile gwe nYuda ukusuma amisi kuli ne nkikulu ne nSamaria?” (Namanga abaYuda batikwangala naba Samaria). 10Umwene Yesu alinkumwamula alinkuti, “Linga gwafimenye ifyabupe fya Kyala, numundu uyu ikukubula ukuti, ‘Mbapo nine amisi nnwepo,’ angali kunsuma yuyo, po umwene angali ikukupa amisi aga gikupa ubumi.” 11Unkikulu alinkumwamula alinkuti, “Malafyale, ikinegelo ukaya nakyo, kangi ikisiba kisolofu, lelo pokugagaga kugu amisi aga gikupa ubumi? 12Kingamo unkindile ubukulumba tata Yakobu, uyu atupele ikisiba kikiki, uyu yope anwaga muli kikiki, nabanake, nimitimo gyake?” 13Umwene Yesu alinkumwamula alinkuti, “Gwesa uyu linga ikunwa amisi gagaga, yo ikumilwaga kangi; 14loli uyu linga ikunwa amisi aga nisakumpaga une, yo atisakukibonaga siku ikyumilwa, loli amisi aga nisakumpaga, go gisakwipelaga mmyake nyibuko ya misi, iyi yikwibukila kubumi bwa bwila bwila.” 15Popapo unkikulu alinkuyoba nagwe alinkuti, “Malafyale, go ulimbaga amisi gagaga, ukuti nangumilwaga kangi, nukuti nangisaga kangi kuno kukunega.”
16Umwene Yesu alinkumbula unkikulu yula alinkuti, “Buka kambilikile undumego, mukisege kuno.” 17Popapo unkikulu alinkumwamula alinkuti, “Ngaya nunnyambala.” 18Umwene Yesu alinkumbula alinkuti, “Utalwisye apa utile, ‘Ngaya nunnyambala.’ Buno gwali nabanyambala bahano, kangi uyu uli nagwe lilino akaya ndumego. Isi uyobile sya naloli.” 19Popapo unkikulu alinkumbula Yesu alinkuti, “Ngubwene ukuti uli nsololi. 20Batata biputilaga nkyamba kikiki, umwe loli mukuti mu Yerusalemu bo buyo ubu abandu fikuti biputilengemo.” 21Umwene Yesu alinkumbula alinkuti, “Unyitikege une gwe nkikulu, kikwisaga akabililo apa mutisakwiputilaga kwa Tata nkyamba iki, nalinga mo mu Yerusalemu. 22Umwe baSamaria mukwiputa kuli uyu mukammanya, uswe twe baYuda tukwiputa kuli uyu tummenye; namanga ubupoki bukufuma mbaYuda. 23Loli kikwisaga akabalilo, nalilino kalipo, po aba bikwiputa naloli bisakwiputaga kwa Tata mwa Mbepo na mbwanaloli; namanga Tata ikubalonda aba bikwiputa bo bunobuno kumyake. 24Umwene Kyala Mbepo, bosa aba bikwiputa kumyake bo fikuti biputilege mwa Mbepo na mbwanaloli.” 25Umwene unkikulu yula alinkumbula Yesu alinkuti, “Une menye ukuti Mesiya ikwisa (ko kuti Kristi),#4.25 Kristi: ki kuti umpakigwa. linga isile yuyo, po isakutubulaga syosa.” 26Popapo Yesu alinkumbula unkikulu yula alinkuti, “Yo une ne nikuyoba nanugwe.”
27Pakabalilo kako abafundigwa bake balinkwisa, balinkuswiga bo bagile Yesu ikuyoba nunkikulu; loli pope nayumo alinkusita nukundalusya unkikulu ukuti, “Kulonda fiki,” pamo, “Kuyoba nagwe sya fiki?” 28Popapo unkikulu alinkuyileka papo indeko yake, alinkubuka nkaya, alinkubabula abandu alinkuti, 29“Tubuke mukankete umundu uyu ambulile syosa isi nabombaga; kali ayege yo Kristi yuyuyu?” 30Popapo abandu balinkusoka nkaya, balinkubuka apa alipo.
31Lelo pakabalilo kako, abafundigwa balinkuntengulila balinkuti, “Rabi lyangamo.” 32Loli umwene alinkubabula alinkuti, “Une ndi nafyo ifyakulya ifi mukafimanya umwe.” 33Abene abafundigwa balinkulalusania balinkuti, “Kali yumo umundu antwalile fimo ifyakulya?” 34Umwene Yesu alinkubabula alinkuti, “Ifyakulya fyangu ko kubomba ubwigane bwa uyu andumile une, nukuyimalisya imbombo yake. 35Umwe mutikuyoba ukuti, ‘Gisyele imyesi mina ukwisa untondolo’? Keta lelo nikubabula nikuti, amukete kosakosa, mugibone imigunda, buno gyelukile gifikilepo pantondolo. 36Untondoli ikwambilila ifihombigwa fyake, ali pakubungania iseke syabumi bwa bwila; ukuti unsopi nuntondoli basekelege pamopene. 37Buno mo mumo likubonekela ukuya lya naloli ilisyu ili likuti, ‘Yumo ikusopa, uyungi ikutondola.’ 38Une nabatumile nkutondola ifi mukaliyulilepo; abangi baliyulile, umwe mwingilepo itolo pakabombo kabo.”
39AbaSamaria ba bingi aba nkaya kala balinkumwitika Yesu panongwa ya isyu ili unkikulu alisisimikisye atile, “Ambulile syosa isi nabombaga.” 40Lelo bo abaSamaria bafikile apa alipo, balinkunsuma ukuti agonepo pamyabo. Umwene alinkugona papo amasiku mabili. 41Popapo balinkumwitika ba bingi ukukindapo, panongwa ya isyu lyake; 42balinkumbula unkikulu balinkuti, “Lilino tutikwitikila pamasyu gako gene, mma, buno na yuyuswe twibene tupilike, kangi tumenye ukuti uyu naloli yo Mpoki gwa kisu.”
43Lelo bo gakindile amasiku mabili gala, umwene alinkusokamo, alinkubuka nkisu kya Galilai. 44#Mat 13.57; Mar 6.4; Luk 4.24Namanga Yesu yuyo asisimikisye ukuti, “Unsololi atikwimikigwa nkisu kyake.” 45#Yoh 2.23Lelo bo afikile mu Galilai, abaGalilai balinkumwambilila; abene basibwene syosa isi asibombile mu Yerusalemu paKyaka, namanga bope babukile kukyaka.
Yesu ikumbumbulusya umwana gwa ifumu gwa nkisu kya Galilai
46 #
Yoh 2.1-11
Popapo Yesu alinkwisa kangi nkaya ka Kana nkisu kya Galilai, mumo agapelile amisi ukuya bwalwa bwa mafilu. Lelo alipo papo ulifumu yumo uyu umwanake ali mbine nkaya ka Kapernaumu. 47Umwene bo apilike ukuti Yesu afumile mu Yudai isile nkisu kya Galilai, alinkubuka kumyake alinkunsuma ukuti asuluke akambumbulusyege umwanake; namanga ali pipi itolo ukufwa. 48Umwene Yesu alinkumbula alinkuti, “Linga mutikufibona ifya kumanyilamo nifiswigu, po mutikwitikamo siku.” 49Umwene ulifumu yula alinkumbula alinkuti, “Malafyale, isaga twikililege bo umwanangu akali ukufwa.” 50Umwene Yesu alinkumbula alinkuti, “Bukaga, umwanako mumi.” Popapo umundu yula alinkulitika ilisyu ili Yesu alimbulile, alinkubuka. 51Lelo bo akali ikwikilila, ababombi bake balinkwaganila nagwe, balinkumbula balinkuti, “Umwanako mumi.” 52Popapo alinkubalalusya akabalilo#4.52 Kabalilo: kabuhano na bubili, yo 1 koloko pamusi, yosa. kako umwanake asisipukile. Abene balinkumbula balinkuti, “Mmayolo pakabalilo kabuhano na bubili, po apa isekema yalindekile.” 53Popapo ugwise alinkumanya ukuti pali po pakabalilo kako Yesu alimbulile ukuti, “Umwanako mumi;” popapo alinkwitika yuyo ninyumba yake. 54Iki lelo kyo kika kya bubuli, iki Yesu apelile bo isile mu Galilai ukufuma mu Yudai.
Цяпер абрана:
YOHANI 4: NNBII
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
BAIBULO INONGWA INUNU © Bible Society of Malawi, 2017.