YOHANI 9
9
Yesu ikumbumbulusya umundu uyu apapigwe mfwamaso
1Lelo bo Yesu ikukinda, popapo alinkumbona umundu uyu apapigwe bo mfwamaso. 2Abene abafundigwa bake balinkundalusya balinkuti, “Rabi, ywani uyu atulile inongwa, umundu uyu, pamo abapapi bake; papo apapigwe mfwamaso itolo?” 3Umwene Yesu alinkubamula alinkuti, “Yope na yuyuyu akatula inongwa, na ba bapapi bake bakatula inongwa. Loli apapigwe umfwamaso, ukuti imbombo sya Kyala mo sibonekelege mmyake. 4Uswe fikuti tubombege imbombo ya uyu alindumile une, bo musi itolo; buno ikilo kikwisaga, apa nayumo akabagila ukubomba. 5#Mat 5.14; Yoh 8.12Apa ndimo nkisu, po ne lumuli lwa kisu.” 6Lelo bo ayobile sisisi, popapo alinkuswa amata pasi, alinkufuga amatope namata, alinkumpaka namatope mmaso, 7alinkumbula alinkuti, “Bukaga ukasugusule pakisiba Siloa” (ko kuti “ntumigwa”). Popapo alinkubuka alinkwakusugusula; alinkugomoka bo ikuketa itolo.
8Popapo abapalamani bake naba bambonaga bwila bo ikusuma balinkuyoba balinkuti, “Kali uyu akaya yo yula atugalaga nukusuma?” 9Bamo balinkuti, “Yo yuyo;” abangi balinkuti, “Mma, afwene nagwe itolo.” Umwene alinkubabula alinkuti, “Yo yuyune.” 10Abene balinkundalusya balinkuti, “Amaso gako gigwike bulebule?” 11Umwene alinkwamula alinkuti, “Umundu uyu bikuti yo Yesu, afugile amatope nukumbaka kumaso; alinkumbula alinkuti, ‘Bukaga pa kisiba Siloa ukasugusulege kumaso.’ Ndinkubuka, ndinkwakusugusula, popapo ndinkwaga nikuketa.”
12Abene balinkundalusya balinkuti, “Umwene ali ko kugu?” Alinkubamula alinkuti, “Ngamanya.”
AbaFarisai bikulalusya isya kubumbuluka
13Popapo balinkuntwala kubaFarisai uyu afwile amaso iyolo. 14Apene pali po pisiku lya Sabati, apa Yesu afugaga amatope nukumwigula amaso. 15Popapo abaFarisai balinkundalusya kangi muno gigukile amaso gake. Umwene alinkubabula alinkuti, “Alimbakile amatope mmaso, ndinkusugusula kumaso, po apa lilino nikuketa.”
16Bamo aba Farisai balinkuti, “Umundu uyu akafuma kwa Kyala, papo atikulyimika ilisiku lya Sabati.” Abangi balinkuti, “Abagile bulebule umundu untulanongwa ukupela ifika bo fififi?” Popapo balinkwenda nukutapukana. 17Bunobuno balinkundalusya kangi umfwamaso balinkuti, “Ugwe kwinogona sya fiki kumundu uyu, apa akwigwile amaso?” Umwene alinkwamula alinkuti, “Nsololi.” 18Abene abaYuda balinkusita nukwitika ukuti ali mfwamaso kangi lilino ikuketa, babuya bababilikila abapapi ba uyu aligwike amaso. 19Bo balinkubalalusya balinkuti, “Kali uyu yo mwaninu, uyu mukuti apapigwe bo mfwamaso, lelo ikuketa bulebule lilino?” 20Popapo abapapi bake balinkwamula balikuti, “Tumenye ukuti uyu yo mwanitu nukuti apapigwe bo mfwamaso, 21loli muno gigukile amaso gake, syo tukamanya; na uyu amwigwile amaso tukammanya. Mulindalusyaga yuyo, buno nkusi, isakwiyobela mwene.” 22Isi syo abapapi bake bayobaga papo babatilaga abaYuda, namanga abaYuda balitikene ukuti, linga yumo ikumwitika Yesu ukuya yo Kristi, yo tukunsosyangamo nnyumba yakwiputilamo. 23Yo nongwa iyi abapapi bake bayobaga ukuti, “Nkusi, amundalusyege yuyo.”
24Popapo balinkumbilikila ulwa bubili, umundu uyu afwile amaso, balinkumbula balinkuti, “Umwimikege Kyala, uyobe ubwanaloli. Uswe tummenye umundu yula ukuya ntulanongwa.”
25Umwene alinkwamula alinkuti, “Linga ntulananongwa, syo ngamanya; une nkamenye kamokene, akakuti, nali mfwamaso, lilino nikuketa.”
26Abene balinkundalusya balinkuti, “Akubombile sya fiki? Akwigwile bulebule amaso?”
27Umwene alinkwamula alinkuti, “Une mbabulile litasi, loli mulinkusita nukupilika; lelo fiki mukulonda ukupilika kangi? Kingamo nanumwe mukulonda ukuya bafundigwa bake?”
28Abene balinkuntuka balinkuti, “Uli mfundigwa gwake yuyugwe, loli uswe tuli bafuindigwa ba Mose. 29Uswe tumenye ukuti Kyala ayobile na Mose, loli uyu yo uswe tukammanya na kuno afumile.” 30Umwene alinkwamula alinkuti, “Isi syo sya kuswigisya, ukuti umwe mukammanya kuno afumile umundu uyu, bo umwene anyigwile une amaso. 31Uswe tumenye ukuti Kyala atikubapilika abatulanongwa, loli uyu linga ikuntila Kyala, ikubomba isya bwigane bwake, yo ikumpilika. 32Tukapilikamo siku ukuti yumo amwigwile amaso umundu, uyu apapigwe bo mfwamaso. 33Linga umundu uyu akafumile kwa Kyala, akabagile ukuti abombe fimo.” 34Abene balinkumwamula balinkuti, “Gwe gwapapigwe mbutulanongwa itolo, gwe gwati utumanyisyege uswe?” Popapo balinkunsosya panja.
Ubufwamaso ku sya mwambepo
35Umwene Yesu alinkupilika ukuti bansosisye panja; lelo bo amwagile, popapo alinkumbula alinkuti, “Bule kumwitika Nnyamundu?” 36Umwene alinkwamula alinkuti, “Yo aliku Malafyale, ukuti yo numwitikege?” 37Yesu alinkumbula alinkuti, “Umbwene kangi uyu ikuyoba nanugwe yo yuyo.” 38Umwene alinkuyoba alinkuti, “Nikwitika gwe Ntwa.” Popapo alinkumbungulukila. 39Umwene Yesu alinkuyoba alinkuti, “Nkisu muno nisile ku kulonga, ukuti aba batikuketa baketege, naba bikuketa ukuti bayege bafwamaso.” 40Bamo abaFarisai aba bali nagwe, bo bapilike sisisi, balinkundalusya balinkuti, “Ngimba nanuswe tuli bafwamaso?” 41Umwene Yesu alinkubamula alinkuti, “Linga mwali bafwamaso, angali mukaya nimbibi; loli lilino apa mukwinogona ukuti mukuketa, po imbibi syinu sikubumililaga.”
Цяпер абрана:
YOHANI 9: NNBII
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
BAIBULO INONGWA INUNU © Bible Society of Malawi, 2017.