Aduya 5
5
Kefaree Lee Yale Kewɔlɛɛ Wose Man
1Me bu, tei me nyansa nombia,
see deŋele nyii me nombia kenyii man,
2yɛɛ abɔɔ nyansa man,
na n nɔɔ ke kyaŋ nombia kagyeŋ see.
3Nawolo nyi alo ŋon ɔ ba mo ayimɛɛ wuu ɔ wose nɔɔwoya yɛɛ ŋgba teebɔɔ nɛ,
te ɔ kekolosi dana yeliŋ ŋgba doosi nɛ.
4Mɔ kɔ ɔto na ke dana ŋgba ŋanŋanborɔ nɛ,
te kɛɛ bee ŋgba yoosila sia na wɔle nɛ.
5Ɔ nawɔɔ ne tisi gyu yeŋ man,
ɔ nawɔɔ kekulu ne gyu bo yebɔɔ man.
6Ɔ bɛɛ gyueŋ gbɛɛ keŋ ne fa nyeedoŋ ya,
ɔ dɔŋ bo ɔ ne kyeŋgbeŋ yakaa, mɔna ɔ ba gyeŋ ya.
7Me bia, nɛnɛɛ ɛ tei maŋ,
ɛ na lee keŋ mɛɛ yako ŋon nɛ wɔle ya.
8Ɛ wɔŋ ɛ wose lee ɔ gyaŋ gyu lem,
ɛ na benaa ɔ dekpaŋalaŋ denaanɔɔ gba ya.
9na mena ya na nyɔ obuo gyae ka lee n nyiŋmaa man,
te n yele kelɛɛ mɔ gyae ka lee n nyiŋmaa man gyu nyeeman doŋte gyaŋ.
10Na mena ya na ŋɔɔla baa di nya dedii,
na keŋ n be kaa nyiŋ nɛ ke gyu kedesina walaŋ wɔle dekpaŋalaŋ.
11N yeŋ wee da benaa na nyaŋ ke mutii,
nawolo nyi n wose naane na n wose pou gyae ke nyɔe.
12Nyaŋ ke yako nyiaa, <<Mena keŋ mɔɔ kɔla katenee.
mena keŋ me konɔɔ be bɛɛ kedesina.
13Me te nyii ma wolara ya,
ma te tei baŋ bɛɛ wola maŋ nombia nɛ ya.
14Kaa kyomii nafɔ ma wose te kyaŋ maŋ,
ba degyaŋee man.>>
15Nyɔɔ loŋ lee nyaŋ gbagba osuŋ man,
loŋ keŋ ne puu lee nyaŋ gbagba n detiribuŋ man.
16N loŋse dɛɛlee gyae ke wuu abɔnterese man,
na n boŋobiise ke lɛɛ balaŋ dɛɛgyaŋee man?
17Yela ŋe ka bese nyaŋ nyaageŋ wui,
ɛmɛɛ na ŋɔɔla na kpala ŋa korakora ya.
18Baa hiraa n loŋse dɛɛbɛe e lee,
nyaŋee lee n tobiiritɛɛ wɛɛle dɔɔ.
19Ɔ yɛɛ ɔkyueŋ ŋon ɔ dana kyeo, ŋaa ŋon ɔ ba lee aleebiri.
wa ade dɛɛ baa neŋ debaŋ kamasɛ,
ɔ kegyae dɛɛ dɛɛse neŋ debaŋ kamasɛ.
20Me bu, weera ŋolo wɛɛle ne dɛɛse neŋ?
Weera n ne pukaa ohuhoo alo?
21N gbɛɛneŋ pou doo Degbeŋgyoo siaman teŋteŋeleŋ,
ɔ sia gyakaa n dɛɛtɛe pou man.
22Akpanyanyaŋte nombiakumɛɛ keyɛɛ ne kyaŋ e ŋgba kɔta nɛ,
ɔ nombiakumɛɛ ŋmeeseŋ ne miliina e.
23Nyi walaŋ de bɛɛ katenee na ɔ na yem,
ŋon gbagba diyiŋ beiŋ ne yele ɔ na yo gbɛɛ.
Цяпер абрана:
Aduya 5: NTR
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
2026 Ghana Institute of Linguistics Literacy and Bible Translation