Jn 10
10
Li chaab'il aj k'aak'alenel karneer
1Toja' naq li Jesus kixye reheb':
—Relik chi yaal ninye eere: ani ink'a' nanume'k sa' li rokeb'aal li xkoraleb' li karneer, sa' jalan b'an chik na'ajej nataqe'k ut napisk'ok chisa', a'an aj elq' ut aj kamsinel. 2A'ut li na'ok sa' li okeb'aal a'an aj k'aak'alehom reheb' li karneer. 3Laj ilol okeb'aal natehok chiru ut eb' li karneer neke'rab'i li xyaab' xkux; ut a'an naxb'oqeb' li xkarneer rik'in li xk'ab'a'eb' ut narisiheb' chi b'eek. 4Ut naq ak xrisi chixjunileb' li re, k'amol b'e naq naxik chiruheb', ut eb' li karneer neke'xtaaqe, xb'aan naq neke'xnaw rab'inkil li xyaab' xkux. 5Ab'anan ink'a' te'xtaaqe junaq li ink'a' neke'xnaw ru, elelik b'an chik te'xb'aanu chiru xb'aan naq ink'a' neke'xnaw rab'inkil li xyaab' xkuxeb' li jalaneb' chik.
6Li jaljookil ru aatin a'in li kixye li Jesus reheb', ink'a' ke'xtaw ru.
7Jo'kan naq li Jesus ki'aatinak wi' chik rik'ineb':
—Relik chi yaal ninye eere: laa'in li rokeb'aaleb' li karneer. 8Chixjunileb' li xe'k'ulunk xb'enwa chiwu a'aneb' aj elq' ut aj kamsineleb'; ab'an ink'a' xe'ab'iik xb'aaneb' li karneer. 9Laa'in li okeb'aal. Ani taa'ok sa' ink'ab'a', kolb'ilaq; taa'ok, taa'elq ut tixtaw xwa.
10“Laj elq' ka'ajwi' elq'ak, kamsink ut sachok naraj naq nachalk. Laa'in xinchalk re naq te'wanq xyu'am ut taawanq chi numtajenaq. 11Laa'in li chaab'il aj k'aak'alenel karneer. Li chaab'il aj k'aak'alenel naxk'e li xyu'am sa' xk'ab'a'eb' li xkarneer. 12-13A'ut li yal tojb'il, li maawa' aj k'aak'alenel ut moko re ta eb' li karneer, naq nachalk laj xojb', naxkanab'eb' li karneer ut na'elelik, xb'aan naq yal tojb'il ut maak'a' naraj wi' eb' li karneer; jo'kan naq laj xojb' naxsaapuheb' ut naxcha'cha'iheb'.
14“Laa'in li chaab'il aj k'aak'alenel, ut nekeb'innaw ru linkarneer ut eb' li we neke'xnaw wu, 15jo' li Yuwa'b'ej naxnaw wu ut laa'in ninnaw ru li Yuwa'b'ej; ut nink'e linyu'am sa' xk'ab'a'eb' li karneer. 16Wankeb' ajwi' jalan chik inkarneer li moko wankeb' ta sa' li koral a'in; a'aneb' ajwi' tento tinb'eresiheb' chaq, ut te'rab'i xyaab' linkux, ut jun ch'uutaqeb' aj chik naq te'wanq, ut junaq ajwi' laj k'aak'alehom reheb'.
17“A'an ninxra wi' li Yuwa'b'ej, xb'aan naq nink'e linyu'am re naq tink'ul wi' chik. 18Maa'ani namaq'ok chiwu linyu'am, laa'in b'an nink'ehok re, xb'aan naq jo'kan x'alaak sa' inch'ool. Wank inwankil chi xq'axtesinkil linyu'am ut wank inwankil chi xk'ulb'al wi' chik.#10,18 Li Jesus kixq'axtesi li xyu'am chi anchal li xch'ool, sa' xk'ab'a' li rahok (cf. 12,27; 13,1-3; 18,4). A'an a'in lintaqlankil xink'ul rik'in linYuwa'”.
19Naq ke'rab'i li aatin a'in, kiwank wi' chik jachok ib' sa' xyanqeb' laj Judiiy. 20Ut naab'aleb' sa' xyanqeb' ke'yehok:
—Wank aj tza rik'in ut kaan ru. K'a'ut naq nekerab'i?
21Ab'anan wankeb' ajwi' ke'yehok:
—Eb' li aatin a'in moko raatineb' ta junaq eechaninb'il xb'aan laj tza. Ma truuq tab'i' laj tza xteeb'al xsa' ruheb' li mutz'?
Li Jesus kixye naq Ralal li Yos
22Sa'eb' li kutan a'an aran Jerusalén naninq'ehimank li xq'axtesinkil li rochoch li Yos sa' ruq' li Qaawa', jo' rajlal chihab'.#10,22 A'an naninq'ehimank rajlal chihab' chiru li po Diciembre re xjultikankil li kixb'aanu chaq laj Judas Makabeo (1 Mak 4,36-59; 2 Mak 1,9.18; 10,1-8). Yo li hab'alq'e 23ut li Jesus yo chi b'eek sa' rochoch li Yos wan wi' li numleb'aal re laj Salomón. 24Kisute'k xb'aaneb' laj Judiiy ut ke'xye re:
—Jo'q'e taakanab' xrahob'tesinkil li qach'ool? Wi laa'at li Kriist, ye qe chi ch'olch'o ru.
25Kichaq'ok li Jesus ut kixye:
—Ak xinye eere, ab'an ink'a' nekepaab'. Li k'anjel nalajinb'aanu sa' xk'ab'a' linYuwa', a'an na'aatinak chiwix; 26a'ut laa'ex ink'a' nekepaab' xb'aan naq moko xkomonex ta linkarneer. 27Eb' linkarneer neke'rab'i xyaab' inkux; laa'in nekeb'innaw ru ut eb' a'an nikine'xtaaqe. 28Laa'in nink'e reheb' li junelik yu'am ut maajaruj te'oso'q, ut maa'ani taamaq'oq reheb' sa' wuq'. 29Li Yuwa'b'ej li xk'ehokeb' we, a'an q'axal nim xwankil chiruheb' chixjunil ut maak'a' naru taamaq'e'q xb'aan anihaq sa' ruq' li Yuwa'b'ej. 30Laa'in ut li Yuwa'b'ej juno ajwi' chiqib'il qib'.
31Toja' naq eb' laj Judiiy ke'xchap wi' chik xpek re xkutinkil chirix. 32Ut li Jesus kixye reheb':
—Naab'al li chaab'il b'aanuhom li neke'chalk rik'in li Yuwa'b'ej xlajink'ut cheru. B'ar wank reheb' a'an li teeraj wi' inkutinkil chi pek?
33Ke'chaq'ok eb' laj Judiiy:
—Ink'a' tatqakuti chi pek xb'aan junaq chaab'il b'aanuhom, rik'in b'an naq xamajewa li Yos ut, us ta yal winqat, nakak'e aawib' cho'q Yos, chankeb' re.
34Kixye li Jesus reheb':
—Ma ink'a' tab'i' tz'iib'anb'il sa' leechaq'rab': «Laa'in xinye naq Yosex»#10,34 Sal 82,6. Wi eb' laj jolominel ut eb' laj raqol aatin yoseb' nayeemank reheb', li Jesus ink'a' yo chi xmajewankil li Yos naq naxye naq tz'aqal Ralal li Yos (5,25; 11,4.27).? 35Wi naxk'eheb' cho'q yos li ke'k'uluk re li Raatin li Yos (ut ink'a' naru xsachb'al xwankil li Santil Hu), 36k'a'ut naq chiwix laa'in li kinxsantob'resi li Yuwa'b'ej ut kinxtaqla chaq sa' ruuchich'och' nekeye naq ninmajewa li Yos xb'aan naq xinye: «Ralalin li Yos»? 37Wi ink'a' ninb'aanu xk'anjel linYuwa', mineepaab'. 38Ab'anan, wi ninb'aanu, us ta ink'a' nikineepaab' laa'in, paab'omaq li k'anjel ninb'aanu. Chi jo'kan teek'e reetal ut teenaw chi junajwa naq li Yuwa'b'ej wank wik'in ut laa'in wankin rik'in li Yuwa'b'ej.
39Toja' naq ke'xyal wi' chik xchapb'al, ab'an li Jesus ki'elelik chiruheb'.
Li Jesus koho junpak'al li nima' Jordán
40Koho wi' chik junpak'al li nima' Jordán, sa' li na'ajej kikub'sink wi' ha' laj Jwan sa' xtiklajik, ut kikanaak aran. 41Naab'aleb' ke'wulak rik'in: “Laj Jwan maajun xnimal eetalil xb'aanu, ab'an chixjunil li xyehom laj Jwan chirix li winq a'in, a'an tz'aqal yaal”, chankeb'.
42Ut naab'aleb' ke'paab'ank re li Jesuus aran.
Цяпер абрана:
Jn 10: QQC
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Q'eqchi DC Bible © Bible Society in Guatemala, 2005.