Kɛ́nsísɔ́ Xónusɔ́ɖóte
Xónusɔ́ɖóte
Xwe kanɖé (40) wɛ Izlayɛ́li ví lɛ́ɛ flú gbɔn gbětótló mɛ xɔ, bɛ́ sín Sinayíi só ɔ́ kɔn káká yi Kanáa tomɛ; Kanáa to ɔ́ wɛ nyí ayǐkúngban e sín akpá Mawu dó nú tɔ́gbó yětɔn lɛ́ɛ é.
Kɛ́nsísɔ́ sín wěma ɔ́, xwe kanɖé (40) énɛ́ lɛ́ɛ sín tan wɛ è kpi d'é mɛ.
Togun Mawu tɔn ɔ́, azɔn mɔ̌kpán wɛ è sɔ́ kɛ́n tɔn; nǔ e wú wěma élɔ́ nyí Kɛ́nsísɔ́ wéma ɔ́ nɛ́.
Wěma élɔ́ ɔ́, akpá atɔn wɛ è mǎ ɖó:
Nǔ e ɖo akpá nukɔntɔn ɔ́ mɛ lɛ́ɛ ɖíe: (1.1—10.10), Aklúnɔ ɖɔ nú Mɔyízi ɖɔ é ní sɔ́ togun ɔ́ sín kɛ́n. Azɔ̌ e Levíi ví lɛ́ɛ ná nɔ́ wa ɔ́ ɖó nyǐ. È ɖu Dǐndínwáyixwe ɔ́ bɔ akpɔ́kpɔ́ ɖé wá cyɔ́n Goxɔ ɔ́; akpɔ́kpɔ́ ɔ́ za wě.
Nǔ e ɖo wěma ɔ́ sín akpá wegɔ́ ɔ́ mɛ ɔ́ ɖíe (10.11—21.20). Togun ɔ́ gosín Sinayíi só ɔ́ kɔn bó ɖidó ayǐkúngban e sín akpá Mawu dó nú tɔ́gbó yětɔn lɛ́ɛ ɔ́ jí. Togun ɔ́ mɔ wǔvɛ́ gěgé, bɔ awakanmɛ nɔ kú i hwɛhwɛ. É nɔ́ hlún nǔ ɖɔ dó Mawu kpó mɛsɛntɔ́ tɔn Mɔyízi kpó wú. È sɛ́ mɛ dó ɖɔ yě ní yi ba do nú Kanáa to ɔ́; to énɛ́ e mɛ nyibúnɔ́sin kpó wǐin kpó nɔ́ sa tɔ ɖe é. Lo ɔ́, togun ɔ́ ɖi xɛsi bó gbɛ́ ɖɔ émí kún ná byɔ́ to ɔ́ mɛ ó. Énɛ́ ɔ́, Mawu dɔn tó nú togun ɔ́ bɔ é ɖó ná flú gbɔn gbětótló mɛ xɔ xwe kanɖé (40).
Nǔ e ɖo wěma ɔ́ sín akpá atɔngɔ́ ɔ́ (21.21—36.13) mɛ lɛ́ɛ ɖíe: Izlayɛ́li ví lɛ́ɛ ɖo Judɛ́ɛn tɔ ɔ́ sín zǎnzǎnhwe jí. Ée yě wá jɛ Amɔliti lɛ́ɛ tomɛ ɔ́, Amɔliti lɛ́ɛ sín axɔ́sú Sihɔ́ni kpó Ɔgu kpó tɔ́n ahwan yě; Izlayɛ́li ví lɛ́ɛ ka ɖu ɖo yě jí. Axɔ́sú Mɔwabu tɔn ɔ́ ylɔ́ nǔkantɔ́ Baláamu ɖɔ é ní wá dó nu togun ɔ́. Lo ɔ́, Baláamu ɖótó Mawu bó xo ɖɛ dó togun ɔ́ jí. Đo Judɛ́ɛn tɔ ɔ́ sín zǎnzǎnhwe jí fínɛ́ ɔ́, è sɔ́ togun ɔ́ sín kɛ́n azɔn wegɔ́ ɔ́. È ɖe Jozuwée bɔ é ná nɔ Mɔyízi tɛn mɛ. Mawu gbɔn Mɔyízi jí bó lɛ́ ɖɔ sɛ́n e kan xwe lɛ́ɛ kpódó vɔ̌ lɛ́ɛ kpó lɛ́ɛ; é lɛ́ ɖɔ fí e ayǐkúngban e ná wá nyí yětɔn ɔ́ sín dogbó lɛ́ɛ ná gbɔn é.
Kɛ́nsísɔ́ sín wěma ɔ́ ɖe xlɛ́ ɖɔ Mawu ɖo gbejí nú togun tɔn. É nya xɛ ɖo jǐ tɔn hwenu e é ɖo gbětótló mɛ é. É xo ɖɛ dó togun tɔn jí bó bló bɔ é ɖu ɖo kɛntɔ́ tɔn lɛ́ɛ jí. Baláamu ɖɔ: “Nɛ̌ un ka ná dó nu mɛ e Mawu ma dó nu ǎ gbɔn?”
Mawu Mavɔmavɔ wa adǎn dó togun ɖé ǎ, bɔ nyɛ ka ná wa adǎn dó e a?
Mɛ̌ ká sixú xa Izlayɛ́li ví wɔ̌buwɔ́bú énɛ́ lɛ́ɛ, bó ná ɖɔ mɛ nabí e Jakɔ́bu ví lɛ́ɛ nyí é? (23.8, 10a)
Nǔ tají tají e ɖo wěma ɔ́ mɛ lɛ́ɛ
È sɔ́ togun ɔ́ sín kɛ́n (1—4)
Sɛ́n tɛnmɛ tɛnmɛ lɛ́ɛ kpó Levíi ví lɛ́ɛ sísɔ́ kpó (5—8)
È ɖu Dǐndínwáyixwe ɔ́ (9.1—10.10)
Togun ɔ́ xwe ayǐkúngban e sín akpá Mawu dó nú tɔ́gbó yětɔn lɛ́ɛ ɔ́ jí (10.11—21.35)
Izlayɛ́li ɖo ayǐkúngban wɛnjɛ Mɔwabu tɔn jí (22—32)
Fí e Izlayɛ́li gbɔn, bɛ́ sín Ejípu lɛ́ɛ (33.1-49)
Mawu kplɔ́n nǔɖé lɛ́ɛ togun ɔ́ (33.50—36.13)
Цяпер абрана:
Kɛ́nsísɔ́ Xónusɔ́ɖóte: FONDC
Пазнака
Падзяліцца
Параўнаць
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
La Bible en langue fon © Alliance Biblique du Bénin, 2012.