Simuluho 22
22
Abrahama u laelwa ku eza sitabelo ka Isaka
1 #
But 10.5; Litu 44.20;
Maheb 11.17-19
Mwamulahonyana, Mulimu a lika Abrahama. A li ku yena, “Abrahama!” Yena a alaba, a li, “Mulena, ki na yo, ni teelelize.”
2 #
2 Lita 3.1
Mulimu a li ku yena, “U nge Isaka, mwan'a hao wa libanda y'o lata hahulu, mi u ye ni yena kwa naha ya Moria. Hona ko, u y'o mu eza sitabelo, mi u mu ciseze fa lilundu le ni ka ku bonisa.”
3Habusa, i sa li kakusasa, Abrahama a beya sale fa mbongolo ya hae, mi a nga Isaka ni batanga ba hae ba babeli. A lwalela likota za sitabelo, mi a funduka ku ya kwa sibaka s'a n'a mu bulelezi Muñ'a Bupilo. 4Ka lizazi la bulalu, Abrahama a bona sibaka seo si li kwahulenyana. 5Kih'a li kwa batanga ba hae, “Mu ine fa ni mbongolo. Na, ni mushimani, lu ka ya kwale ku y'o lapela mi lu ta kutela ku mina hape.”
6Abrahama a lwalisa Isaka likota za sitabelo, haili yena, n'a lwezi mashala a mulilo ni tipa. Cwale ba funduka bubeli bwa bona. 7Isaka kiha s'a bulela, a li, “Tate!”
Ndat'ahe a li, “Kiñi, mwan'a ka?”
Isaka a buza, a li, “Ni bona kuli u na ni mashala ni likota, kanti yona ngunyana ya sitabelo i kai?”
8Abrahama a mu alaba, a li, “Mwan'a ka, Mulimu u ka lu bonela s'a ka lu fa ili yena.” Mi bubeli bwa bona ba zwelapili hamoho.
9 #
Jak 2.21
Ha ba t'o fita fa sibaka f'a n'a mu bulelezi Mulimu, Abrahama a yaha katala mi a lukisa likota fateñi. Kiha s'a tama mwan'a hae, mi a mu beya fa katala, fahalimw'a likota. 10Cwale a comola tipa kuli a mu bulaye. 11Kono lingeloi la Muñ'a Bupilo la mu biza, li li kwa lihalimu, la li, “Abrahama, Abrahama!”
A alaba, a li, “Mulena, ki na yo.”
12Lingeloi la li, “U si ke wa holofaza mushimani, kapa ku eza sifi ni sifi ku yena.” Mi la zwelapili, la li, “Cwale ni ziba hande kuli u saba Mulimu, kakuli ha u si ka ni hanisa mwan'a hao wa libanda.”
13Abrahama a talima-talima, mi a bona poho ya ngu i swasizwe kwa manaka mwa sicacani. A ya, a y'o i nga ku eza sitabelo, mi a i cisa mwa sibaka sa mwan'a hae. 14Abrahama a beya sibaka seo libizo la Jehova-Jire. Mane ni kacenu batu ba sa bulela kuli, “Fa Lilundu la Muñ'a Bupilo kwa iponelwa.”
15Lingeloi la Muñ'a Bupilo la biza Abrahama lwa bubeli, li nze li li kwa lihalimu, la li, 16#Maheb 6.13-14 “Ni ikonka ka libizo la ka, ku bulela Muñ'a Bupilo. Ni ka atisa hahulu limbuyoti za hao, kakuli u ezize cwalo, mi ha u si ka ni tima mwan'a hao wa libanda. 17#Maheb 11.12 Ni ku sepisa kuli ni ta atisa lusika lwa hao, lu be lo lutuna sina linaleli ze kwahalimu, kamba sina mushabati wa kwa liwate. Lusika lwa hao lu ka fenya lila za lona. 18#Lik 3.25 Mi macaba a lifasi kaufela a ta ni kupa kuli ni a fuyaule sina mo ni fuyaulezi lusika lwa hao, kakuli u utwile litaelo za ka.” 19Abrahama a ya kwa batanga ba hae, mi hamoho ba kutela kwa Beeresheba kw'a n'a yahile.
Lusika lwa Nakori
20Mwamulahonyana Abrahama a utwa kuli Milika u pepile bana ni munyan'a hae Nakori. 21Uzi ne li yena mweli, mi n'a tatamwa ki Buzi ni Kemuele, yena ndat'ahe Arami. 22Yo a latelelwa ki Kesedi, Hazo, Pilidashi, Jidilafi ni Betuele. 23Betuele ne li ndat'ahe Rebeka. Milika a pepa bashimani bao ba supile ka a li muñwi ku Nakori, munyan'a Abrahama. 24Musal'a Nakori wa bubeli, ya n'a bizwa Reumi, a pepa Teba, Gahami, Tahashi ni Maaka.
Цяпер абрана:
Simuluho 22: Lozi09
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Lozi Interconfessional Bible, Catholic Edition © Bible Society of Zambia, 2009.