Simuluho 26
26
Isaka h'a li kwa Gerari ni kwa Beeresheba
1Kwa ba ni tala hape mwa naha, kwand'a tala ya nako ya Abrahama. Isaka a ya kwa Gerari ku Abimeleke, mulena wa Mafilisita. 2Muñ'a Bupilo n'a iponahalize ku Isaka, mi n'a ize, “U si ke wa ya kwa Egepita. U ine mwa naha, ye ni ta ku bulelela kuli u ine mwateñi. 3#Sim 22.16-18 U ine hona mo nakonyana, ni ta ba ni wena, mi ni ta ku tohonolofaza, kakuli ni ta ku fa manaha a kaufela, wena ni lusika lwa hao. Ni ta buluka buitamo bo ne ni itamile ku ndat'aho Abrahama. 4Ni ta ku fa lusika lo luñata sina linaleli za kwahalimu, mi ni ta ba fa manaha kamukana. Macaba kaufela a lifasi a ta ni kupa kuli ni a fuyaule sina mo ni fuyaulezi lusika lwa hao. 5Ni ta ku fuyaula, kakuli Abrahama u ni utwile mi u bulukile litaelo za ka kamukana.”
6Isaka a yaha cwalo mwa Gerari. 7#Sim 12.13; 20.2 Banna ba mwa naha mo, ha ba mu buza ka musal'a hae, a li, “Ki kaizel'a ka,” kakuli n'a saba ku bulela kuli, “Ki musal'a ka.” N'a saba kuli mwendi banna bao ba ka swana ba mu bulaya ku ikungela Rebeka, kakuli n'e li yo munde hahulu. 8Cwale, Isaka ha s'a ngile nakonyana mo, Abimeleke mulena wa Mafilisita, h'a talima mwa lihaulo la ndu ya hae, a bona Isaka a nz'a yongelani ni Rebeka, ba bapala. 9Abimeleke kiha sa lumela Isaka, mi a li ku yena, “Bona, luli ki musal'a hao. Cwale kiñi ha n'o li ki kaizel'a hao?”
Isaka a alaba, a li, “Ne ni hupula kuli, ha ni ka li ki musal'a ka, ni ka swana na bulaiwa.”
10Abimeleke a mu buza, a li, “Kiñi se si ku ezisize cwalo ku luna? Kabe yo muñwi wa batu ba ka, n'a fosize ni musal'a hao bo, ha si fo mulatu n'o ka ba wa hao, nji?” 11Abimeleke a laela batu ba hae kamukana, a li, “Ku si ke kwa ba ni mutu ya ka kataza munna yo ni musal'a hae. Haiba yo muñwi a ka eza cwalo, u ta bulaiwa.”
12Isaka a lima mwa naha yeo, mi sona silimo seo a ba ni kutulo ye tuna hahulu. A kutula hahulu luli ku fita mw'a n'a calezi, kakuli n'a tohonolofalizwe ki Muñ'a Bupilo. 13A zwelapili ku fuma, mane a ba mufumi yo mutuna hahulu. 14Mafilisita ba mu shwela muna, kakuli n'a na ni mitapi ye miñata ya lingu ni likomu, ni batanga ba bañata. 15Cwale ba taza matakala mwa liliba ze ne yepilwe ki ndat'ahe Abrahama ha n'a sa pila.
16Abimeleke kih'a li ku Isaka, “Zwa mwa naha ya luna kakuli u s'o lu fita kwa maata.” 17Isaka kih'a tuta, mi a y'o tibelela mwa Libala la Gerari mw'a il'o yaha. 18A yepulula liliba ze ne yepilwe ka nako ya ndat'ahe Abrahama, ze ne hanisizwe ki Mafilislisita mwamulaho wa lifu la hae. Mane Isaka a zusa ona mabizo kasibili a n'a li file ndat'ahe.
19Batanga ba Isaka ba yepa lisima mwa libala, mi ba fumana liwelu-welu la mezi a shelauka. 20Balisana ba mwa Gerari ba kananisana ni balisana ba Isaka, ba li, “Mezi a ki a luna.” Isaka kih'a beya siliba seo libizo la Likañi, kikuli ne ba kananile ni yena.
21Batanga ba Isaka ba yepa hape siliba se siñwi, ni ku sona seo hape kwa ba ni likañi ka sona, mi a si biza Toyano. 22A ishimbululela kwahule, mi a y'o yepa se siñwi siliba. Seo ha si si ka ba ni likañi, mi kabakaleo sona a si biza Tukuluho. A li, “Cwale Muñ'a Bupilo u lu file tukuluho mwa naha, mi kwanu lu ka t'o pila hande ka buiketo.”
23Isaka a zwa, mi a ya kwa Beeresheba. 24Ka bona busihu bo Muñ'a Bupilo a iponahaza ku yena, a li, “Ki na Mulimu wa ndat'aho Abrahama. U si ke wa saba. Ni na ni wena. Ni ta ku tohonolofaza ni ku ku fa lusika lo luñata, kabakala mutang'a ka Abrahama.” 25Isaka a yaha katala hona mwa sibaka seo, mi a lapela Muñ'a Bupilo. Cwale a toma tende ya hae, mi batanga ba hae ba yepa siliba.
Tumelelano mwahal'a Isaka ni Abimeleke
26 #
Sim 21.22
Abimeleke a zwa kwa Gerari ku t'o bona Isaka, a zamaya ni Akuzati muelezi wa hae, ni Pikoli muzamaisi wa mpi ya hae. 27Isaka a mu buza, a li, “Cwale u teziñi, kanti pili n'o sa utwani ni na, mane wa ba wa ni leleka mwa naha ya hao?”
28Ba alaba, ba li, “Cwale lu se lu lemuhile kuli kanti Muñ'a Bupilo, u na ni wena, mi lu hupula kuli i ne ka ba hande ha ne lu ka eza tumelelano ye tiile mwahal'a luna. A lu eze tumelelano. 29U sepise kuli ha u na ku lu swenya, sina luna ha lu si ka ku eza maswe. Lu bile ni musa ku wena. Lwa ku tuhela mane wa ikela ka kozo. Cwale u na ni limbuyoti za Muñ'a Bupilo.” 30Isaka kiha s'a ba ezeza mukiti, mi ba ca ni ku nwa. 31Habusa kakusasa, yo muñwi ni yo muñwi wa batu bao a sepisa ka ku itama. Isaka a laezana ni bona, mi ba funduka ka kozo.
32Ka lona lizazi leo, batanga ba Isaka ba taha ku t'o mu bulelela ka siliba se ne ba yepile, ba li, “Lu fumani mezi.” 33Siliba seo a si biza Sheba. Kikabakaleo munzi ha u sa bizwa ni kacenu Beeresheba.
Basali ba Isau ba bazwahule
34Isau n'a na ni lilimo ze mashumi a mane, h'a nyala Judisi, mwan'a Beeri wa Muhiti. Hape a nyala Basemati, mwan'a Eloni wa Muhiti. 35Bao, ba filikanya hahulu Isaka ni Rebeka.
Цяпер абрана:
Simuluho 26: Lozi09
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Lozi Interconfessional Bible, Catholic Edition © Bible Society of Zambia, 2009.