Bulu - 1992 Edition (NT) Non Drama

Abôʼô belet e nji bi mvusu ba loone Pak valé é ntoo bebé. Minlô betuni a beyeme bekalate be mbe be jeñek avale be ne bo na Yésus a wu; amu be mbe be koo bôte woñ.
Ve e too na Satan a nga nyiine be Yudas, be loʼone nye jôé afe na Iskariôt, e nye a mbe wua ya beyéʼé awôm a bebaé. A Yudas a nga ke kui tyiñ a minlô betuni a bivete bezimbi, avale zen a mbe kuane nye e be be. Be nga vak a kui tyiñe na ba ye ve nye moné. A nga kañese a taté na a jeñe mbamba éyoñ a ne kalane be Yésus jama bôt teke yem.


E môse belet é nji bi mvusu ô nga kpwaan, e ñwô be nga yiane tyiʼi éyeme Pak, a Yésus a nga lôme Pierre a Yôanes a jôʼô na: Kela kômane bia Pak, nalé ate bia ye di nye. Be nga jô nye na: Wo kômbô na bi kôme nye vé? A nga yalane be na: Mi lôô éyoñ mi nyiineya e tison, môt éziñ a beʼe ndeʼe mendim a ye tôbane mia; tôñane nye e nda mia ye yen a nyiʼin, a mia ye jô mie ndaa na: Masa a jô wo na: Aba nda bia be beyéʼé bam bia ye di Pak e ne vé? A a ye liti mia beta étune nda yôp, é too nkôman, e nne mia ye kôme Pak valé. Be nga ke a koone mam avale a nga jô be a be nga kôme Pak.
Eyoñ awolo e nga kpwaan, a nga tabe tawôlô baa be minlôman. A nga jô be na: Me nga dañe kômbô di Pak nyô bia be mia, te na me tôbane njuk, amu ma jô mia de na: Ma ye bo te beta di je vʼakekui é jalébaneya éjôé Zambe. A nga nyoñ élaé , a ve akéva a jô na: Nyoñan élaé ji a kabane je e zañe jenan; amu ma jô mia de na, ma ye bo te beta nyu jôme ja so ébuma ndiʼi woon, vʼakekui éjôé Zambe é soya.
Wôna, a nga nyoñe fembé; a éyoñ a maneya ve akéva, a nga beʼe je a ve be je a jôʼô na: Jôme ji é ne nyôle jam, e nje é ne mveban asu denan; boʼone jame di mi simesaʼane ma. Nalé fe a nga nyoñ élaé , mvuse ndian, a ve be je, a jôʼô na: élaé ji é ne mfefé élat e metyi mam, e mme me nga mialan asu denan.
Ve da mi lôô: Nyô a kuane ma bia nye bi ne tawôlô nyô. Mona môt a ke avale ntyiʼan ô né; ve ngoʼé môt ate nyô a ne zen a kuabane je. A be nga taté na ba silane minsili bana ba bevok na za a mbe nyô ya be be a nga ye bo jame te.


Bisô bi nga bobane fe ézezañe jap ajô: Za ya be be a nga yiane yenébane Nyô a dañ?
Yésus a nga jô be na: Bejô bôte ya meyoñ be koo me minlô yôp a ba ba jôô me ba lobane na bezambe. E nji bo nalé e be mia. Ve nyô a ne beta môt a boʼo nyô a dañe tyôtyoé, a nyô a jôô a nyoñ éto nyô a ne mbo ésaé. Amu za a dañ, ye nyô a too tawôlô, ye nyô a ne mbo ésaé? Ye sa nyô a too tawôlô? Ve ma, me ne ézezañe jenan ane mbo ésaé.
Mia mi ne ba be nga jibi a ma e meveʼele mam été; ajô te ma telé éjôé asu denan aval Esaa wom a nga telé éjôé asu dam. Nalé ate mia ye di a nyu e tawôlô wom éjôé jam été, a na mi tabe bito bi njôan, a tyiʼi meyoñ awôm a mebaé yʼIsraél mejô.
A Simon! A Simon! Satan a nga kômbô mia asu ya seʼese mia ane avute fôn. Ve me nga yeʼele ajô dôé na mbunane wôé ô bo te tek, a wo éyoñ ô bulaneya be ma, yemeteʼe bobenyoñ. Pierre a nga jô nye na: A Nti, me ne nkômesane na bia wo bi ke nda mimbôk a awu. A Yésus a nga jô na: A Pierre, ma jô wo de na: E nnôme kup a ye bo te loñe den te na ô bene biyoñ bilale na ô nji yeme ma.
A nga beta jô be na: Eyoñe me nga lôme mia teke mfek, teke ékpwaé, nge besilefas, ye mi nga jeñembane jôm éziñ? Be nga yalane na: Teke jôm. A a nga jô be na: Vʼéyoñe jina ñhe nyô a bili mfek a nyoñe wô, avale da nyô a bili ékpwaé, a nyô a nji bi nkpwaté mekôn, a kuʼane ngômesane jé a kuse wua. Amu ma jô mia de na: E jam e ne ntilan da yiane tôébane be ma na: A nga lañeban e bebo mbia be mam été. A e jam da fombô ma e nga ke asuʼu dé. Ane be nga jô na: A Nti, tame yen minkpwaté mekôn mibaé. A a nga jô be na: Abime te da yian.


Eyoñ a kuiya atan, a nga ke nkôle beôlivié avale a mbe a boʼok. Beyéʼé bé be nga tôñe nye.
A kuiya vôm ate, a nga jô be na: Yeʼelaʼan, nalé ate mia ye bo te nyiin e mebôbelaʼa été. Wôna a nga kandane be, bebé ane môt a wua akok, a kute meboñe si a yeʼelan, a jôʼô na: A Esaa wom nge wo kômbô nalé, kele ma élaé jina ôyap. Ve jame da na e nkômbane wôé e ñwô ôte ô bobaʼan saa ñhe éñwom. Ane éngele a nga so nye yôp asu ya ve nye ngule nyôl. Mbôlô biyebe bi nga bili nye e nde a mbe a yeʼelaʼan éyoñ ése, a éduduʼu jé é nga bo ane bibañe metyi bia toé si. A nga kôlô si meyeʼelane mé a zu be beyéʼé e mbe be mbe ôyo amu ôlun, a a nga jô be na: Mia ke ôyo amu jé? Kôlaʼane si, yeʼelaʼan, nalé mia ye bo te nyiine mebôbelaʼa été.


A ngenan a kobôʼô ateme na ndula bôt a nga suan a nyô a mbe a lobaʼane Yudas, wua ya bʼawômô a bebaé, a wuluʼu be ôsu. A nga subu Yésus bebé na a latane nye anyu. Yésus a nga jô nye na: A Yudas ye wo koñe Mona môt a nlatane nye anyu!
Ba ba be Yésus be mbe nsamba, ñyenan be nga yene jam e mbe na da zu boban, be nga jô na: A Nti, ye bia ye bôm a nkpwaté mekôn? A wua ya be be a nga baʼé mbo ésaé njôô betuni a tyiʼi nye alo ya mbo nnôm. Ve Yésus a nga nyoñe nkobô a jô na: Tebaʼane valé! Wôna a nga nnambe alo môt ate a bo nye mvoʼé .
Wôna Yésus a nga jô minlô betuni, bivete bebaʼale ya nda Zambe a bemvendé be nga zu wosane nye na: Mia te zu a minkpwaté mekôn a mimbeñ ane betitane ze mimfaka. Melu mese bia be mia bi mbe e nda Zambe, a mi nji ke bi ma. Ve vana a ntoo awolo denan a ngule dibi.


Eyoñe be biya Yésus, be nga kee nye a kui nye e ndaa évete betuni. Pierre a mbe a zaʼa ôyabe mvus. Be nga kôbane nduan ézezañe nseñ a tabe si. Pierre a nga tabe ézezañe jap. Mbo ésaé minga éziñ a nga yene nye a too nduan ôsu, a nga fombô nye a jô na: E môte nyôna fe a mbe e nsamba wé. Vʼa nga kate de a jô na: A minga me nji yeme nye. Obe aboñ ô lôteya, môte mfe a nga yene nye a jô na: Wo fe ô ne e nsamba bôte bete. Pierre a nga jô môt ate na: Me nji bo été. Bebé awolo e lôteya, mfe a nga yemete na: Teke vaa na e môte nyô a mbe fe e nsamba wé amu a ne môte ya Galilé. Pierre a nga yalane na: A wo môt, me nji yeme jam wo kômbô jô. Awolo te ebien, a ngenan a kobôʼô, nnôme kup a nga loñ. E nde Nti a nga kôñelan a fombô Pierre. A Pierre a nga simesane nkobô Nti a nga kobô nye na: Den te na nnôme kup a loñ, wo ye kate ma biyoñe bilaa. A nga kui atan, a atane wé, a nga yôn abui.


E bôt be nga bili Yésus ve zu kpweʼele a bôme nye. Be nga solé nye asu a sili nye minsili be jôʼô na: Kulaʼan asoé ba, za a te bibi wo? A be nga kobô nye minkobô mi ébiasé mife.
Eyoñe môs ô nga kui, nsamba bemvendé ya ayoñ, minlô betuni a beyeme bekalate, be nga sulan a bo na be zuu Yésus asu ékôane betyiʼi mejô. Be nga jô na: Nge ô ne Krist, kate bia de. Yésus a nga yalane be na: Nge ma kate mia de, mia ye bo teke de buni, a nge ma sili mia minsili, mia ye bo teke yalan. Ataté éyoñe ji, Mona môt a ye tabe e mbo nnôme Ngule Zambe. Bese be nga jô na: Nde ô ne ñhe Mone Zambe nga? A a nga yalane be na: Mia jô nalé me ne nye. Ane be nga jô na: Amu jé bia beta yi bengaa? Bia te de wôk biabebien e soʼok anyu dé.

Слушайте LUKAS 22