MATHI 22
22
Kphal Kmaal Paupurtol
1Ungta pau ksaammi Jisu ngi mhin inni paupurtol khatti the nowl da, 2“Parwaan Kruwngpaam ava kruwng khatti mchapa ki kphal kmaal mdo piik chaak ava tu tpurtol kro, 3ungta mma ngi kphal kmaal ra kowl mdo lat chaak mii rek ava ku ownra msra owr rek siida; pdainu mmaanni thleng nuwm lamme. 4Ungta mma ngi ktlok sra owr rek siida the nowl da, ‘kokowl lat dok rek hin atheen, asuwn kmaal rang ki kpurchuwl dokka, ksilpa rek leh msuwn kmar rek eayou nu, ungta do khim khai kpurchuwl dokka kphal kmaal mhai thlen pik chaan.’ 5Pdainu mmaanni ko ol tekki tlo lamda, khatti bil tha, ungu khatti msumdowl lo ntha, 6angṭhe rekva sra owr rek ava kjowng lamda, ungta aeyou lamda. 7Ungta kruwng ava ngi plung pthit da, mii rek ava mlop mloppi siida, mii ke eayou rek ava pmawng pthii da, ungta mkhuwpiin ava rukka meiji pkaa pthii da. 8Ava dilli mma ngi msra owr rek hin theda, ‘Kphal ava kurchuwl dokka, pdainu kukowl lat chaak rek ava kurhui sii me. 9Ava ngi mlei kurthuwk da, lamṭhuwm rek thung ngi va inra, ado dut thok in khim khai mii knempok kphal kmaal rang ki arvan ṭhiin.’ 10Ungta sra owr rekki lamṭhuwm thung ngi chet lamda, mdo phaak khot in mii mkheng kṭha leh kṭha kma purkuk lamda; ava leiji kphal inn ava malli dim chda.
11“Pdainu kphalpa ngi arva da mmal rek msut thungta, kphal dona knaa kma miilai khat dei da; 12Ungbi mma ngi mhin theda, ‘Plap, kphal dona knaa kma daattu tak heppi hava thu klut pti da?’ Ungta mma va do khat lee the pchaang me. 13Ava dilli kruwng ngi vaiklou rek hin theda, ‘Mkhu mkhut abowl inra duwnki kjiing thung ngi avar pthiin; ava thung ngi mii rekki mhaa in kril donle kṭap lamra.’ 14Mleija knempok mdo own, pdainu mruk suwn daat mukcholla.”
Khasna Kpii Mlei thu mdo Khewl
15Ava dilli pharisi rek ki sun lamda, tak heppi mpauna rek thung ngi tukjown raan kdingi karseel lamda. 16Ungta mmaanni siikhu rek leh Herodia mii rek Mhin haisii lamda the lamda, “Chukpu, Nah kindit tdit neenni kdee in, Isowr lam kindit deekki purchuk tinu, ungta mii ava tuksuw mti; mleija mii rek nong powk ava nang ngi kjat mti. 17Ava mkurthuttu Nang va talu abinna, mhai the pik chaan. Keisar hin khasna tpiik ava Nowlam do rot mo dorot pme?” 18Pdainu mmaan ṭhat ma Jisu ngi deida theda, “Talu leiji atpirsin naanna, ṭha tlot ktlo rek naan? 19Khasna tummi sum ava mhai tdet in.” Ungta mmaanni thiir sum khat arvan sin lam da. 20Ungta Jisu ngi mhin inni theda, “Hava ku do kjit ungu ku mdutta?” 21Ungu mmaanni theda, “Keisar.” Ava dilli Mma ngi theda, “Keisar do rek ava Keisar hin apiin ungu Isowr do rek ava Isowr hin apiin.” 22Mmaanni ava maryaak in thungta, kdung ngi ngak chlam da; ungu ma pthii lam thida sun chlam da.
Kdiyou thung ki Kring Karheel Mlei thung ngi mdo Khewl
23Ava nit katti kdiyou thungki kring karheel ame dida kthe Sadusi rekki Mhin arva lamda paukhewl lamda, 24the lamda, “Chukpu, Mousi va hanto theda, ‘Naolu khat lee kthloi kcha mlaiji mii ava ngi mdiyo bi, mei khunu ava mnaopa ngi mdolo ra, ungu mu upa tummi naole mdo pluk pik ra.’ 25Tunva neen karlak inni unao tikheu am lamda; ru kri verri snu louda, naolu khat lee kthloi cha kma laiji mnu mei ava mnaopa hin ma thida diyou chda. 26Ava leiji miknit na ruk, ungu mukdum na, mtikheu na jun pha dek da. 27Mmaan mkheng dil tha snu ava ruk diyou chda. 28Ava ngi mlei kurthuwk da, kring karheel nit va hava tikheu thungki ku numei kurthuwk rang da? Mleija mkheng inni numei purthuw sap lamda.” 29Pdainu Jisu ngi mhin inni arthawng da, “Naanva aparma inna, mleija laaika mdit mata Isowr rutan daat don dei maan ti. 30Mleija kring karheel nit va, innknei mdit mata kphal pii nime, pdainu parwaan tamsii rek hep daat ra. 31Ungta kdiyou rekki kring karheel mkurthuttu, Isowrri ahin inni mdo the ava naanni pa maan timo’? 32‘Neia Abraham ki Isowr, Isek ki Isowr, ungu Jakob ki Isowr pmaang mo’? Mma ava kdiyou ki Isowr pme pdainu kringki Isowr.” 33Ungu kurtuwl mii rekki ava maryaak in thungta, Mma do purchu leen mmaanna ngak chlam da.
Klin lang lang Paureen
34Pdainu Sadusi rekka rim kdi mpa am pthii lamma tdit pharisi rekki maryaak in thungta, mmaanni arva kurkuk lamda. 35Ungta mmaan arlakki Nowlam chukpu khatti, mdo parsin na ngi Mhin pau khat khewl da. 36“Chukpu, Nowlam thungki paureen mklin sii ava tva da?” 37Ungbi Mma ngi mhin inni theda, “Nang ngi nang ki Isowr Mukpu ava aplung ril mkheng, araothla mkheng, ungu adobin mkheng tu kilṭhi ngi wonsat adolo ra. 38Hava ngi klin ungta ru kri ver ki paureen. 39Ungta miknit na rukka hanto hep daat, nang ngi aveen ava adaksaa kat lulu ngi wonsat alo cha. 40Hava paureen rek knii ava Nowlam leh khulpu rek kurdu ngi ka am.”
Masijah Mlei thu mdo Khewl
41Tunva pharisi rekki mthuw kurku arlaanni, Jisu ngi mhin inni pau khat khewl lamda, 42theda, “Khrista ava talu heppi abin inna? Mma ava ku Chapa?” Ungta mmaanni Mhin the lamda, “Devid Chapa.” 43Mma ngi mhin inni theda, “Ava mkurthuttu tak heppi Devid va pthla tdaalli, Mhin Mukpu dida mdo theda?
44‘Nei ki Mukpu ngi Neiki Mukpu hin theda,
arawlmii rek akhu tingi kthiik du khim khai,
Nei kukhut chang ktong tha ku ong cha.’
45Devid mdak katti Mukpu mdo dit ava tak heppi mma chapa kurthuwk rang da?” 46Ungta ku mii khat lee ngi Mhin pauna khat lee arthawng pchaang me, mdit mata ava nit ki kupṭhun ni ku mii khat lee ngi Mhin pau khewl purnowl me.
Избрани в момента:
MATHI 22: LAMKBSI
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Lamkang NT with PSA and PRO - REN PAURIINA
Copyright © Bible Society of India, 2002.
Used by permission. All rights reserved worldwide.