MATHI 28
28
Kring Karheel
1Tunva sabath nit dil tha, hapta ki mnii khat na thokki khuw mutmul daat arlaanni, Magdaleni Mery leh Mery murson rekki thlaan ksuw ra chet lamda. 2Ungta asuwn, ava thu ringnaang klin lang lang khat thuwk da; mleija parwaan ki Mukpu waan tamsii arjung ṭumda, ungu lung phel ava purlup pthiida, thida mleen ko ong da. 3Mrungchen ava kowl kiplek hep daat kurthuwk da, ungu mdo mna ava tbuwr heppi powl da. 4Ungta thlaan krung mii rekva Mma mdo ṭit reen lei inni kunchun lamda kdiyou rek lulu ngi am chlam da. 5Pdainu waan tamsii ngi snu rek hin theda, “Naanni ṭi maan; mleija Neiji kdea, khros leen mdo pthoi in Jisu ava kthlaam in pti. 6Mma ava hava thu ame; mleija Mma ngi mdo the dok heppi, kring kardel dok kcha. Arvang in, Mma iina mun ava asuwn. 7Ungta kbeiji vang inra, msiikhu rek hinni, Mma ava kdiyou thungki kring kardel dokka, adi inra ason pik chaan, ungu asuwn, Mma ava naan adu inni Galil tha kvang nga; asuwn, Neiji akthe pik dok inna, ava tha naanni Mma ava dei chnaan di.” 8Ava leiji mmaanni thlaan thungki mṭit in leh kheel sii ki mkanpat inni kuknotti sun lamda, ungu msiikhu rek hin ksong rangki chen lamda. 9Ungta asuwn, Jisu ngi kurdut ṭhi lamda mhin inni theda, “Kdaaiji aju ṭhi chaan so!” Ungu mmaanni hangkal lamda mkhu kjowng lam da, Mma ava luwbuk chlam da. 10Ava dilli Jisu ngi mhin inni theda, “Ṭi maan; ku u knao rek ava ngi Galil tha mvan nraan, vang inra, pau ason pik chaan; ava tha mmaanni mikdei ro lamra.”
Kseel rek Pauson
11Ungta mmaanni hanto mvan slii arlaan inni, asuwn, kseel rek mii angṭhe ngi khuwpii tha vang lamda, kthuwk nong mkheng ava thiimpu kinreel rek hin song lamda. 12Ungta mmaanni kver rek tu kurdu lamda karseel lamda, rawlmii rek hin sum pii lamda, 13ungta the lamda, “‘Neenni ki ii chaak dok arlaanni, jaanni msiikhu rek thleng lamda pru dok lamda,’ adiinra mii rek hin asong in. 14Ungta hava ava paam kpupa knaa mthlun bi, naanni plung ado pjat ma nraan, neenni mning pthlung chdaat ni kaan di.” 15Ungta mmaanni sum ava lou lamda, mmaan doparseel heppi tlo lamda; ungu hava paumin ava Jehudia rek arlakki snii kpha thung ngi kurjou da.
Jisu ngi Msiikhu rek hin Maktardet
16Ungta tunva siikhu rek sowm lei khat ava Galil tha vang lamda, Jisu do the pik lown ava tha hang lamda. 17Ungta mmaanni mdee in thungta luwbuk chlam da, pdainu mii angṭheva plung kinṭhekki bin lamda. 18Ungu Jisu ngi arvang da mhin inni theda, “Parwaan ki leh dultipaam thungki rutan mkheng ava Nei kihin ni mitpiik dok. 19Ava leiji chati rek mkheng thung ngi chet inra, siikhu rek aseem in, ungta Mpah, Mchapa, ungu Pthla Kchiir miing ngi baptis aptlot in, 20ungu Neiji naan hin pau kdo reen mkheng ava mdo dan nraan apurchuk in; ungta asuwn, kum ṭut du khim khai, Neiji mpha ktai thu aṭhi nikaan di.”
Избрани в момента:
MATHI 28: LAMKBSI
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Lamkang NT with PSA and PRO - REN PAURIINA
Copyright © Bible Society of India, 2002.
Used by permission. All rights reserved worldwide.