MATHIU 14
14
Jon Baptis Rit Ngin
(Mak 6.14-29; Luk 9.7-9)
1Ere sanpoatko Galili pênte Hirot ma Jisu ngin chohtat wah. 2Atema ate khenwah sahhabdong hehnâng thôkoh wah, “Atea linlin Jon Baptis, ngakhîn reka,” “Erohwah Atenâng are patritli moatlem moatrãng chaantong eka.”
3Chenrãngma ngako, Hirot ma Jon loatkhhek rãng chienwah, phumma janruma khhek lahma phâtek nâng sekwah. Atema arepa atenaa Filip tangnyu Hirodik ma ngatjunko moatwah. 4Chenrãngma ngako, khema nâng Jon baptisma Hirot nâng, “nangma Hirodik pa nang tangnyu rãng kepniem aho ngama ngatwah!” 5Hirot ma Jon baptis ritphe hunwah, rohkomin Jews mihnyan heh ranchei rewah, chenrãngma ngako, thinma Jon pa mõng ngama ngatwah.
6Hirot chhatjâ rangwo ko Hirodik chha dihiaknya pa nok atang mako bôangwah. Erepa khelahma Hirot nyahrãng hungsên wah 7Hirot ma dihiaknya ko toamsem jabkhab jablahma ngatwah, “ngama toamsem ekang nangma chenni tha ehanga erepa ngama ekoh e!”
8Ate nyongma thôkoh junko dihiaknya pumma Hirot ngewah thâwah. “Nganâng athângheh aretheko Jon baptis khophang pa wankhoang nâng kohhu hang!”
9Lowang pa nyahrãng hungchhih wah, rohkomin, atema rootah mihnyan heh mako toamsêm wah dâng phumma, dihiaknya ma hun ekapa moatkoh rãng chienwah. 10Ephumma Jon khopa phâtek khenko thahdoak katwah. 11Khophang pa wankhoang ko thien lahma dihiaknya ko kohwah, ngale dihiaknya pumma ate nyong nâng katkohwah. 12Jon dijunte heh hûlahma ate mangpa pechhoan lahma ruchhoan wah; erediko thinma Jisu nâng thôkoh wah.
Jisu ma Hahjat Bangâ Mihnyan nâng Phhekchhah thuk
(Mak 6.30-44; Luk 9.10-17; Jhn 6.1-14)
13Jisu ma Jon nginpa chohtat diko, erethe kowah khôankhoma atelolo mihnyan lesongthe nâng chhoanwah. Mihnyan hehma arepa chohtatwah, Ephumma thin hahpa phethien lahma dakhoam lemma Jisu diko junchhoan wah. 14Jisu khôankho kowah loatkhôam ko, mihnyan heh jahmõang chohkhe wah, phumma thinnâng atema nyahrãng mînchen wah, ngale khun atamte heh atema mesiet wakwah.
15Erejâ rangjâ thahko ate dijunte heh ate tânâng hûlahma ngatwah, “San nyahrãng lâhemtah, ngale aretheko mihnyan min hênjô songmah. Are mihnyan heh chienchhoan eko, hahdaang hehnâng chhoan lahma thin dedema phhekchhah chenri chhah chhoanwak a.”
16Jisu ma dânthâng wah, “Thin nekchen chhoan eka, nema chenli komin phhekchhah liwah koh en!”
17Thinma dânthâng wah, “Ninâng bankên wanbangâ ngale ngah lanii loloba etonghi”
18Jisu ma ngatwah, “Ereheh nganâng wênkohha,” 19Atema mihnyan hehnâng hinkhohko tongen ngama chienwah; erediko atema bankên wanbangâ ngale ngah lanii pa semlahma rangkhethung nâng sûwên lahma Joban nâng dangkoh a ngalahma rangsoam wah. Erediko atema bankên pa chhupsiet lahma ate dijunte hehnâng kohwah, ngale ate dijunte hehma mihnyan hehnâng phênkohwah. 20Anga ngama phoatphoat phhekchhah wah. Erediko dijunte hehma abâ achâ heh echhi phânii chõngchõng khôantôan wah. 21Erekowah phhekchhah tah mihnyan heh dihiak ngale leta lechhih heh leweih thangma hahjat bangâ dângwah.
Jisu Jokhohnâng Khoam
(Mak 6.45-52; Jhn 6.15-21)
22Erediko Jisu ma dijunte heh khôankhoko chhangthuk lahma josi rankanâng dânwânglâ thukwah, ngale mihnyan han hehmin chienchhoan wah. 23Mihnyan heh chienchhoan diko, hahhokho nâng wãng lahma atelolo ma rangsoam wah. Sanhêmthah komin eretheko Jisu atelolo dângwah; 24Ngale ere sanpoat phumma khôankho pa ataangnâng josi mongtang nâng pôngpông junko jowakma ditwak lahma dângwah.
25Rangkhahkho wanrem ngale wan erok sanpoat tôko, dijunte heh tânâng Jisu jokhohma khôamhok wah. 26Jo-khohko khoam lahma kheko, thin patrit rewah, ngale chei nungma, “Arepa mihdâpha khe eki!” ngama rakwak wah.
27Jisu ma thinnâng lemlienma rânjab lahma ngatwah, “Hungdongsiet en!” “Ngae, nekchei en!”
28Erediko Piter ma dânjabwah, “Teso, linlin nang medang oko, ngamin jokhohma nang tânâng khoamka thukhang.”
29Jisu ma dânthâng wah, “Karoo!” Ephumma Piter khôankho kowah jâkhoam lahma jokhohma Jisu tânâng khoamkat wah. 30Phumma atema pôngdong pônghok khelahma chei rewah, ngale ate joko lûmjâkat wah. Ephumma, “Teso pênghang!” ngama Piter raksepwah.
31Lemlienma Jisu Piter tâko hûka lahma Atenâng lolahma ngatwah, “Nangnâng dâlem pa atôrîn ne! chenrãngma rinsamtoh a?”
32Waniinii khôankhoko chhangwãng phumma pôngpông pa jekwah. 33Erediko khôankho kowah dijunte hehma Jisu nâng soamwah, ngale “Linlin nanga Joban Chha!” ngama Atenâng ngatwah.
Jisu ma Ginisarat nâng Khunte Mesiet
(Mak 6.53-56)
34Thinma josi danlahma Ginisarat hahnâng hokwah, 35Enângwah mihnyan hehma Jisu jetloatwah. Ephumma khoanchette mihnyan heh Jisu tânâng siethok kohrãng thin tûm arien diak hehnângmin thinma ngin matchhoan wah. 36Jisu nâng thinma khunte hehnâng nang khetsako sahlothuk mêngo ngama roatsep wah; ngale ate khetsako sahloatte chentô heh khoanchet wah mêwah.
Избрани в момента:
MATHIU 14: NOKTBSI
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Nokte Naga NT - NIEMNYAN
© The Bible Society of India, 2014.
Used by permission. All rights reserved worldwide.