MATHIU 20
20
Angurthong nâng Kaammoatte
1“Rangkhethung Hahsông pa arerãngrãng. Rekthenâng rangkhah rangkhoma wathe mihnyan ate angurthong moatrãng dekbi bite lemchhoan eka. 2Atema dekbi thãpa jengre wah rãngrãngjô jâtheko phathe ngunpha koh a ngama thômîn lahma ate angurthong moatrãng chienkat eka. 3Ngale eredikomin atema wan ekhu sanpoatko bôjatnâng wientheka lahma khuthe mihnyan chenjô lemo thangma phoangchep lahma chohkhe wah, 4Phumma atema thinnâng ngatwah, ‘nemin nga angurthong ko kaletma moka en, ngama dekbi thãpa senthem themjô koh a.’ 5Ephumma thin katwakwah. Eredikomin echhi wannii sanpoat ngale wanrem sanpoat komin erohjô thômîn lahma chienkatwah. 6Wanbangâ sanpoat komin bôjat nâng kalahma mihnyan khuthe chenjô lemo phoangchep lahma khekatwah. Phumma atema thinnâng thôngphâ wah, ‘nekhu aretheko ngihliangma chenjô lemo chenrãngma mahtong eken a?’ 7Thinma dânthâng wah. ‘Henmemin ni dekbi birãng sietmahhi,’ ephumma atema thinnâng ngatwah. ‘Roh medang ako, nemin nga angurthong ko kaletma moka en,’
8“Phumma chenthu sanhêmthah hokko, tângtewa pumma dekbi bite heh sokrãng thieneka mihnyan ko ngatwah, ‘Dekbi bite heh roolohma thinnâng dekbi thãpa koh o, khedithôan wah chepte hehnâng bengkoh lohma khema thôanwah chepte hehnâng khedi koh o.’ 9Wanbangâ sanpoatko dekbi birãng chepte hehnângmin phatherujô kohwah. 10Ephumma dekbi birãng khekhothôan chepte mihnyan heh nângkoh sanpoat hokko, nima ajah echoh e ngama thinma thonghunwah; rohkomin thinnângmin dekbi thãpa phatherujô kohwah. 11Thinma ngun thalahma thinnâng dekbi bithukte demko chhiakmîn wah. 12Thinma ngatwah, ‘Are khedithôan wah chepte mihnyan hehma koantathe loloba mowaktah,’ ‘phumma nia ngihliang sanko sahrii lihma moatwah-phumma nangma ninâng chentô kohehia eretôjô thinnângmin koh eko!’ 13Tângte pumma thinkhuwah wathe nâng dânthâng wah, ‘Lemruchha, tattan,’ ‘Ngama nenâng diapchhahmah. Nangma ngihtheko phathenâng mo ang ngama nyoaktoh. 14Nang dekbi thãpa thalohma humnâng wãngo. Ngama nangnâng chentô koh ekia eretôjô are khedithôan chepte komin kohhun ekang. 15Ngadede ngunpa ngama chenroh kohhun ekanga eroh leta kohminne? roh akole nga chhahme dâng phumma nema phetwân eha?’”
16Ngale Jisu ma jekthôwah, “Erohwah henhen khedinâng dangeka, ereheh khema nâng edangwak a, ngale henhen khema nâng dangeka, ereheh khedinâng edangwak a.”
Jisu ma Ate ritjunma Lôrem Jabwah
(Mak 10.32-34; Luk 18.31-34)
17Jisu Jeroselem nâng wângthuko, atema echhi wanii ate dijunte heh khhesiet chhoan lahma thinlolo nâng khoam nungnungko thôkoh wah. 18Atema thinnâng ngatwah, “Tattan en, nãnga jeroselem nâng wãngeki, enâng Mihnyan Chhapa soam aroakte adong, ngale Niemarang hethôte hehnâng elo thuk a. Ngale thinma hôanjôan lahma ritphe erea 19ngale erediko Jews ledangjat heh deknâng ekoh a, phumma thinma atenâng jôjêm, buh awat, ngale bãngphakko etek a; rohkomin, jârem diko ate ngakhîn erea.”
Nyong ma Roatsep
(Mak 10.35-45)
20Erediko Zibidi tangnyu ate chha dela wanii pa sietlahma Jisu mathahko khupjup lahma chenni akomin mammo mêngkohhang ngama roatsep wah.
21Jisu ma atenâng ngatwah, “nangma chenni hun ekoa?” Dihiaknyu ma dânthâng wah, “Nang Lowang medang tohko, are ngachha wanii pa nang dekhit wathe ngale dekchah wathe tongthuk ang ngama toam mamsem o.”
22Jisu ma ere dihiaknyu chha waniiko dânthâng wah, “Nema chenni thaeken a erepa jetmet” “Ngama chêmchei chohmin pa nema tatha ena?”
Thinma “Nima tathae” ngama danthângwah. 23Jisu ma thinnâng thôkoh wah, “Ngama chohmin chêmchei pa linlin nechhe memin etatha en”, “Rohkomin nga dekchahko hentôngmin a, ngale dekhitko hentôngmin a arepa rênrãng nganâng chaan aho. Erethepa nga Wa Joban ma henrãng khoakhem koheka ereheh rãngba.”
24Chenthu ahan waechhi dijunte hehma erengin pa leptat phumma, ere pho anaa wanii demko rinkhah wah. 25Ephumma Jisu ma phangtang roamroo lahma thinnâng ngatwah, “nemajet Jews ledangjat mihnyan heh khoko thin pênte heh leng achaanrii lahma pên eka, ngale thin lemsente khhepho phannang heh thinkhoko leng achaanrii wakeka. 26Phumma arerãngrãng pa nekhu tungnâng nekdangen. Nekhuwah henkomin adongdâng mehun enko, atea anga ngarãngma haa rãngrãng chendanga; 27ngale nekhuwah hen komin wathe khekhodâng mehun enko, atea nekhu haa dângmin- 28Mihnyan Chha pemin mihnyan hehma atenâng khoakhêm rãng katwah dangmah, atema mihnâng khoakhêm rãng ngale ate roandông pa kohlahma ajahthem mihnyan heh pêsietrãng katwah.”
Jisu ma Mitdoak Wanii Sênsiet
(Mak 10.46-52; Luk 18.35-43)
29Jisu le ate dijunte heh Jeriko hahwah loatchhoan poatko, loangchhang dong thin diko junkhôam wah. 30Lemkah kowah tôngte mitdoak wanii pumma Jisu thinkê pumma dânkhôam pa tat lahma rakwah, “Devit Chha! ninâng mammînchen hi!”
31Loangchhang pumma thinnâng ritnga lahma kihchepchep tongen ngatwah. Phumma mitdoak wannii pumma, “Devit Chha! ninâng mammînchen hi!” ngama jêngchaan chaanrak rakwakwah.
32Jisu ma tahchep lahma thinnâng roolahma chhienwah, “Ngama nerãng chenni moatkoh hun eken a?” 33Thinma dânthâng wah, “Teso, nimit sensiet kohhi!”
34Jisu ma thinnâng mînchen lahma thin mitko sahloat kohwah; ephumma lemlienma jienkhe wakwah, ngale Jisu didiko junkhôam wakwah.
Избрани в момента:
MATHIU 20: NOKTBSI
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Nokte Naga NT - NIEMNYAN
© The Bible Society of India, 2014.
Used by permission. All rights reserved worldwide.