MAK 11
11
Tajien Lahma Jeroselem nâng Hok
(Mt 21.1-11; Luk 19.28-40; Jhn 12.12-19)
1Thin a Jeroselem nâng hunemnem dângko, Batphas ngale Bathani hah wah Oliv hahhoko wângwah. Phumma Jisu ma ate dijunte wanii khema nâng chienwên lâwah 2Jisu ma aroh ngatwah: “Nema kowah hahdaangko wãngen. Ereko ne hokwâng rienrien, Gado chha henjô mathat chhang thiet lahma etongla a. Erepa jânletma anâng sietkatren. 3Ngale henma komin chenrãng sietchhoan eken a ngama mechhien hènko, Hethôtema#11.3: Hethôte ma; ba ere tângte. lemeka, sitsiak engak sietwênkoh e ngama thôkoh en.”
4Ephumma thin wãng lahma Gado chhapa lemkah wah hum kâsekko thietlahma chohkhe wah. Thinma erepa jân poatko, 5erekowah chepte hehma thinnâng chhienwah, “Nema chenre eken a, Gado chhapa chenrãng jân eken a?”
6Thinma chenroh Jisu ma thôkotah a eroh dânthâng wah, ephumma mihnyan hehma chhoanthuk wah. 7Thinma Gado chhapa Jisu tâko sietkat kohwah, ngale thin khet heh Gado khohko kêmko lahma Jisu chhangthuk wah. 8Jahmõang mihnyan hehma thinkhet heh lemko kêmkoh rewah, ngale ahan hehma pitwah bãngphak doak lahma lemko kêmkoh rewah. 9Jisu diama kowah johkhôamte mihnyan hehma, “Joban nângrôe! Teso mînko hoktenâng Joban ma rangkoh eka! ngama rakwah. 10Joban ma ahokmin wah nãngwa Devit Lowang Hahsôngko rangkoh eka! Joban nângrôe!”
11Jisu Jeroselem nâng hûlahma Rangsoamhum nâng wângwah, ngale atema chentôko tumlit phoangsok wah. Phumma nyahrãng sanhêmthah dangchoan dâng phumma, ate dijunte echhi wanii demnâng Bathani hahnâng katwah.
Jisu ma Phukbãng nâng Têm Athoak
(Mt 21.18,19)
12Eredijâko, thin Bathani wah ngakwângko, Jisu rêmritwah. 13Jisu ma roanchhe ataang manko Phukbãng dek jahmõang demnâng khekatwah, phumma phukri machohlek o ngama Jisu kalahma sokkatwah. Bãngthongko hûka lahma phoangsokko atema bãngdek loloba chohkhe wah, chenrãngma ngako ere rangkuhpa phukriri rangkuh ledangwah. 14Phumma Jisu ma Phukbãngko, “Henmemin nangwah phukri lechoh chhahtumin!” ngama ngatthien wah.
Ere ngatpa ate dijunte hehma leptatwah.
Jisu Rangsoamhum nâng Wâng
(Mt 21.12-17; Luk 19.45-48; Jhn 2.13-22)
15Thin Jeroselem nâng hokdiko, Jisu Rangsoamhum nâng wãng lahma chentô phinsâng thãsengte heh junloatwah. Ngale ngun litmînte heh khoang heh dâthinphe rewah, erediko phariwo sângte tôngthin heh rephekoh rewah, 16Ngale Jisu ma Rangsoamhum thakho ma hennâng min chenjô danpe thuktuho. 17Erediko Jisu ma mihnyan hehnâng hethô wah: “Joban nyapraang nâng Joban ma aroh ngalahma raangeka, ‘Nga Rangsoamhum pa chentô diak akanwah mihnyan hehrãngma Rangsoamhum ngama ngatmin.’ Phumma nema ahuh heh huhtong thinrãng hôan eken!”
18Soam aroakte adong ngale Niemarang hethôte hehma erengin pa chohtat lahma, thinma Jisu chenrohma jienritphe ea ngama lemkhô lêmsokwah. Thin Jisu ranchei dângwah, chenrãngma ngako mihnyan heh phangtang atema hethôeka junko bârit rewah.
19Sanhêmthah phumma Jisu le ate dijunte heh erehah kowah loatchhoan rewah.
Phukbãng wah Chohjet
(Mt 21.20-22)
20Eredijâ rangkhah rangkhoma, thin lemko khôam jenjenko phukbãngpa lepkhewah. Ere phukbãngpa phak ara ma bãngrin tôkotuk choakjâ lahma dângwah. 21Piter ma chhemthonghun lahma Jisu nâng ngatwah, “Sûtan, Hethôte, nangma temtoh phukbãngpa choakjâtah!”
22Jisu ma thinnâng dânthâng wah, “Joban nâng putedâlem en. 23Ngama nenâng linlin thôkoh eka, henma komin ate hungnâng letûngmaang thangma are hahkongko nangdede josiko rutjâkao, ngama chien lahma atema jab ekapa metkep edanga, ngama meputedâlem ako, erepa metkep erutjâa. 24Erohwah ngama nenâng thôkoh eka: Chenthu nema rangsoam letma chenni komin metha enko, erepa lâchohtih ngama putedâlem en, ngale nema chenni thaeken a, erepa nenâng ekohhèn. 25Chenthu nema toanchep letma rangmesoam enko, nema hen demnâng komin chenrãngma komin chhihchohmîn letma lelat metong hènko erepa map bângkoh mêngen, erohkoba nema chenni chhihmotet a erepa rangkhethung nâng tôngte ne Wa Joban ma map ekohhèn.”#11.25: wanwanthe ma vars 26: nema mihnâng map lekoh kenko, rangkhethung wah tôngte ne Wa Joban memin nema chhihmotet heh map lekohmin (Mt 6.15 ko tasûe).
Jisu Chaanpa Chenwah Choh eka ngama Thôngphâ
(Mt 21.23-27; Luk 20.1-8)
27Jisu le ate dijunte heh Jeroselem nâng ngakhok wah. Phumma Jisu Rangsoamhum khenko phoangkhôamko, soam aroakte adong, Niemarang hethôte, ngale khhepho phannang heh Jisu tâko hûlahma 28atenâng thôngphâ wah, “Nangnâng areheh moatrãng chenwah chaantong ehoa? Are chaanpa henma koh ehoa?”
29Jisu ma thinnâng dânthâng wah, “Ngama nenâng ngin wanthelolo chhien a, phumma nema arepa mejien dânthang hako, ngama areheh chenwah chaanma tamo ekanga erepa nenâng thôkoh a. 30Nganâng thôkoh tanha, Jon ma chenwah chaanchoh lahma baptijem kohwah a: Erepa Joban wah chohwah ale, mihnyan wah chohwah a?”
31Phumma thindede tungko chhiakmîn wah: “Nãngma chenroh dânthangea? ‘Joban wah choheka’ ngama medânthang eko, ‘Atema, eroh medang ako, chenrãngma nema Jon nâng lepute dangeken a ngama engahi?’ 32Phumma nãngma, ‘mihnyan wah...’ ” (Thin mihnyan heh ranchei rewah, chenrãngma ngako, anga ngama Jon pa mõng ngama thônghun wah.) 33Ephumma thinma Jisu nâng, “Nima jetmih” ngama dânthâng wah.
Jisu ma thinnâng ngatwah, “Eroh medang ako ngamemin chenwah chaanma areheh tamo ekanga erepa nenâng thôkomah.”
Избрани в момента:
MAK 11: NOKTBSI
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Nokte Naga NT - NIEMNYAN
© The Bible Society of India, 2014.
Used by permission. All rights reserved worldwide.