MAK 4
4
Chhahli Wênte Nginthakthô
(Mt 13.1-9; Luk 8.4-8)
1Eredikomin Jisu ma Galili josi kênâng wien hethô wah. Ate tûmlit wah khôan eka mihnyan heh jahmõang dâng phumma atea khôankhoko chhangkat wah. Khôankhopa joko dângwah ngale mihnyan heh jokahko chepwah. 2Atema nginthakthô demnâng mihnyan hehnâng ajahthem ngin thôkoh wah, ngale thinnâng ngatwah:
3“Tattan en! rekthenâng mihnyan wathema chhahli wênchhoan wah. 4Atema pitnâng chhahli wênpoatko, wanwanthe pa lemdongko chatjâeka, phumma wo heh hûlahma thôantu eka. 5Wanwanthe pa longrã khohnâng chatjâeka. Phumma hah aho dângjunko chhah pa sitsiak koateka. 6Phumma chenthu sanchaan hông phumma koatnyan chhahpa choaksah eka; chenrãngma ngako rinpa alunâng lesutka dângjunko sitsiak choakjâeka. 7Wanwanthe pa suhbuk nâng chatjâeka, phumma suhheh donglahma chhahpa tahbuk eka, erohwah chhahri hongrimah. 8Rohkomin, khakapa hahsen nâng chatjâeka, phumma chhahpa koatlahma, donglahma chhahri hongrieka: Wanwanthe ma roakrem chhahri hongrieka, wanwanthe ma roak erok, ngale wanwanthe ma châthe hongrieka.”
9Ngale Jisu ma athôanko ngatwah, “Tattan en, nenâng nâ metong hènko!”
Jisu ma Nginthakthô Chenrãng Kepwah a
(Mt 13.10-17; Luk 8.9,10)
10Jisu ate lanlan dângpoatko, ate dijunte echhi wanii demko mihhan atewah ngin chohtatte heh khuthe hûlahma atenâng nginthakthô pa ngaksen thôkohhi ngama ngatwah. 11Jisu ma dânthâng wah. “Nenâng Joban Hahsông nginpa loatjetthuk eka,” “Phumma, ahan hehma, erepa nginthakthô rãng tateka, 12erohwah,
‘Thinma mesû akomin,
jetkhe mah;
Thinma mejetat akomin,
jetlo mah.
Thinma jetloat ngako, Joban tânâng chenngak hûwaktha,
ngale atema thinnâng map chenkohtah.’ ”
Jisu ma Chhahli Wênte Nginthakthô pa Ngaksên thôkoh
(Mt 13.18-23; Luk 8.11-15)
13Erediko Jisu ma thinnâng chhienwah, “Nema are nginthakthô pa jetlo metne? eroh medang ako ahan nginthakthô hehjã chenroh ejien jetlo en a? 14Chhah wênte pumma Joban ngin wên eka. 15Wawathe mihnyan pa lemdongnâng chatjâte chhah rãngrãng; thinma Joban nginpa chohtat rienrien, joak hûlahma thinwah nyenchhoan eka. 16Ahan mihnyan heh longrã khohnâng chatjâte chhah rãngrãng. Thinma Joban ngin chohtat rienrien khuhah nâhah kepeka. 17Rohkomin erepa thinhung khennâng lupmah, erohwah thinhungnâng lekroi tongmah. Erohwah chenthu Joban ngin junma chêmchei ba mihma chêmsietko thinma lemlienma thinphe eka. 18Ahan mihnyan heh suhbuk nâng chatjâwah chhah rãngrãng. Ere hehma Joban nginchohtat eka, 19Phumma mâmâ roandông rãng sekmah patrit, techhu dânghun, ngale lihân jatrup hungwah phôangthônghun pumma Joban nginpa tanghep eka, phumma thinma chhahri hongri mah. 20Rohkomin ahan mihnyan heh hahsen nâng chatjâte chhah rãngrãng. Thinma Joban nginpa chohtat lahma keplahma chhahri hoangri eka: Wawathe ma roakrem hongrieka, wawathe ma roak erok, ngale khaka ma châthe hongrieka.”
Khokkhennâng Wentit
(Luk 8.16-18)
21Eredikomin Jisu ma thinnâng thôkoh wah, “Henma komin wentit keplahma khokkhen nâng ba jupthin khennâng etoak a? erepa wentit toakthinko letoak minne? 22Chentô huhriem re eka heh phangtang loatsiet rêmin, ngale chentô huhthien reka heh phangtang laangphê rêmin. 23Tat en, nenâng nâ metong hènko!”
24Atema thinnâng ngatwah, “Nema chennitat eken a erepa senthemthem thongtat en! Nema mihnâng chenroh hôanjôan eken a erejunko Joban memin nenâng ehôan ejôan hèn - ere nomemin chhih ehôan ejôan hèn. 25Hennâng roanchhe tongeka ereko lêkoh rêmin, ngale hennâng chenjô aho dangeka, thinma amãnchha cheieka pemin toanchhoan rêmin.”
Chhah Phoak Dôngwâng Nginthakthô
26Jisu ma thinnâng choatthôkoh wah, “Joban Hahsông thepa arerãngrãng. Mihnyan wathema ate pitnâng chhahli wênkat eka. 27Rangwo rangnyek, ate ajup dangkolah, asat dangkolah, erepoatko chhahpa koatlahma rangwo roakweih dongeka. Erepa chenroh dongeka epa atema jetmah. 28Hah pumma chhahpa dongthuk lahma chhahri rieka; khebengko chhongnoap bengchhong eka, erediko apô, ngale khedithôan ko ari rieka. 29Chenthu chhahpa memun tahko, mihnyan pumma ate mitchha pumma ekhen a, chenrãngma ngako, chhahkhen sanpoat pa hûera.”
Jokangken Nginthakthô
(Mt 13.31,32,34; Luk 13.18,19)
30Jisu ma chhien wah, “Joban Hahsôngpa chenni nâng thakmîn ea?” “Chennâng thakthô lihma arepa thôkohmin a? 31Erepa arerãngrãng. Mihnyan wathema rangkhen kowah chentô nomemin kenrinthôan jokangken pa keplahma wênkat eka. 32Phumma erepa phoak lahma chentô noma bãngdong thôan dangeka. Bãngphak rangbîn hehnâng wo hehma arup lanruproh bãngpa dongeka.”
33Ererãngrãng ahan nginthakthô ajahthem thôko lahma Jisu ma mihnyan hehnâng Joban nginpa thôkoh wah; thinma chentô tajet eka ereto atema thôkoh wah. 34Atema thinnâng nginthakthô lethôkoh thangma chennimin thôkohho, phumma chenthu ate dijunte heh demnâng atelolo dângpoatko chentôpa thêsên thôkoh chîrewah.
Jisu ma Pông Apat Mesiet
(Mt 8.23-27; Luk 8.22-25)
35Erejâ sanhêmthah ko Jisu ma ate dijunte hehnâng, “Nãngkhu joranka nâng danwãnge,” ngama ngatwah. 36Ephumma thinma mihnyan heh phethien wakwah; ngale Jisu chhangeka khôankhoko dijunte heh chhangka lahma thindem ko Jisu sietchhoan wah. Ereko ahan khôankhomin dângwah. 37Lemlienma pông dôngmõang pônghokwah, ngale jowaak heh khôankhoko waakhû lahma khôankhoko jo mênchong dangnemnem dângwah. 38Jisu a khôankho thangko ate khopa khhelêngko lênglahma juplek dângwah. Dijunte hehma satsiet lahma atenâng ngatwah, “Hethôte, nanga sekmah mohne, nãng lâriieki dangmihne?”
39Jisu toansat lahma pôngko ngatwah, “jek o!” ngale atema jo komin, “Môngmông dango!” ngatwah. Phumma pôngpôngpa jeklahma kihrumrum dângwah. 40Erediko Jisu ma ate dijunte hehnâng ngatwah, “Ne aretô chenrãngma chei eken a? Nenâng athângheh min putedâlem ahone?”
41Phumma thin nyahrãng chei lahma wathema wathe nâng jabmînwah, “Are mihnyan pa hen a? pông apat le jodông memin ate nginkep eka!”
Избрани в момента:
MAK 4: NOKTBSI
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Nokte Naga NT - NIEMNYAN
© The Bible Society of India, 2014.
Used by permission. All rights reserved worldwide.