Ngāue 18
18
Ko Paula ‘i Kolinitō
1Na‘e mavahe atu ‘a Paula mei ‘Ātenisi ki Kolinitō, 2‘o ne fe‘iloaki ai mo ‘Akuila, ko e matāpule Siu mei Ponitō. Na‘e fe‘unga ia kuo fuoloa si‘i ‘a e fetukutuku mai ‘a ‘Akuila mei ‘Itali pea mo hono uaifí, ‘a Pīsila, koe‘uhí ko e tu‘utu‘uni ‘a Kalautiasi, ke kapusi kotoa ‘a e kakai Siú mei Lomá. Na‘e ‘alu ‘a Paula ‘o fe‘iloaki mo ‘Akuila mo Pīsila, 3peá ne nofo ‘i hona ‘apí ‘o kaungāngāue mo kinaua. He ko e ongo me‘a ngaohi tēniti, ‘o hangē pē ko iá.
4Na‘e ‘alu ai pē ‘a Paula he Sāpate kotoa ki he fai‘anga lotu ‘o e kakai Siú, ‘o talanoa mo kinautolu mo e kakai mulí ke fakaului kinautolu. 5Kae talu e foki mai ‘a Sailosi mo Tīmote mei Masitōnia mo ‘ene malanga‘i ‘a e Mīsaia ‘a Sīsuú ki he kakai Siú.
6Ka na‘e tafoki hake ‘a e kakai Siú ‘o ngaohikovi‘i ‘a Paula. Pea talu ai pē ‘ene tala ange kiate kinautolu, mo ‘ene tupe‘i e efu honau koló mei hono valá. “‘E ‘eke atu pē kiate kimoutolu ho‘omou heé. ‘Oku ma‘a hoku totó. Te u ‘alu ā au ki he kakai mulí.” 7Pea ‘alu ia ‘o nofo he ‘api ‘o e matapule ko Taitusi Siusitasi, ko e matapule tui ‘Otua, pea na‘e fetoumu‘a‘aki hono ‘apí mo e fai‘anga lotu ‘o e kakai Siú. 8Ko e taki ‘o e fai‘anga lotú ko Kalisipō, ko e tangata na‘e tui ki he ‘Eikí, pea pehē kātoa mo hono fāmilí. Na‘e fanongo ‘a e tokolahi kehe ‘i Kolinitō ki he Ongoongo Leleí, pea nau tui, pea papitaiso ai pē kinautolu.
9Na‘e hā mai ‘a e ‘Eikí kia Paula he pō ‘e taha ‘o ne folofola ange, “‘Oua ‘e manavahē. Fai pē ho‘o malangá, pea ‘oua ‘e tuku. 10‘Oku ou kau au mo koe, pea he‘ikai hoko ha kovi kiate koe. He ko e tokolahi he kolo ko ená ko e kakai ‘o‘oku.” 11Na‘e nofo ai pē ‘a Paula ‘i Kolinitō ‘o ‘osi e ta‘u ‘e taha mo e konga mo ne fakahinohino ki he kakaí e Folofola ‘a e ‘Otuá.
12Na‘e lolotonga ‘a e kōvana ‘a Kalio ‘i ‘ākeiá, kuo kau fakataha ha kakai Siu ‘o puke ‘a Paula ‘o taki mai ki he fale hopó 13‘o tukuaki‘i, “Ko e tangatá ni, ‘okú ne feinga‘i e kakaí ke nau lotu ki he ‘Otuá ‘aki e ngaahi founga ‘oku tapu he laó.”
14Pea te‘eki ai ke fai ‘e Paula ha‘ane tali, kuo lea ange ‘a Kalio ki he kakai Siú, “Ka ne ko ha hia, pe ko ha toe kovi kehe, ‘oku mou talatalaaki‘i mai ai e tangatá ni, pea te u fie tokanga atu kiate kimoutolu, kāinga Siu. 15Ka ko e fekīhiaki pē ena ia he ngaahi faka‘uhinga lea, mo e faka‘uhinga hingoa, mo ho‘omou laó. Mou fakamāu‘i pē ia ‘e kimoutolu. He‘ikai te u kau ai au.” 16Peá ne tuli kinautolu mei he fale hopó. 17Pea puke leva ‘e he kau taki ‘o e kakai Siú ‘a Sositene ‘o taa‘i ‘i he loto fale hopó. Ka na‘e ‘ikai ke momo‘i tokanga ki ai ‘a Kalio.
Ko e Foki ‘a Paula ki ‘Aniteoke ‘i Sīlia
18Na‘e nofo atu pē ‘a Paula mo e kakai ‘i Kolinitō na‘e tui kia Sīsuú, peá nau fakamāvae leva kae folau ‘a Paula ki Sīlia, fakataha mo Pīsila mo ‘Akuila. Kae te‘eki ai ke nau folaú, na‘e tele ‘e Paula hono ‘ulú ‘i Senikelea ko ‘ene fuakava. 19Na‘e tū‘uta ‘a e toko tolú ki ‘Efesō, ‘o māvae ai ‘a Paula mo Pīsila mo ‘Akuila, kae ‘alu ‘a Paula ki he fai‘anga lotu ‘o e kakai Siú ‘o talanoa mo e kāinga lotú.
20Na‘e kole ange ki ai e kakaí ke ne toe nofo atu mu‘a mo kinautolu, ka na‘e ‘ikai ke ne loto ki ai. 21Na‘á ne tala ange ‘e ia, “Te u toe foki mai pē, ‘o kapau ko e finangalo ia ‘o e ‘Otuá.” 22Pea tuku folau ia ki Sēsalia, ‘o fe‘iloaki ai mo e siasí, peá ne toki hoko atu ai ki ‘Anitioke.
23Na‘á ne nofo atu pē ‘i ‘Aniteoke, peá ne toki hiki atu ai ‘o fai ‘ene ‘a‘ahi ki he ngaahi feitu‘u ‘i Kalētia mo Filisia, ‘o fakalotolahi‘i e kakai ai na‘e tui kia Sīsuú.
Ko ‘Apolosi ‘i ‘Efesō
24Na‘e ha‘u ki ‘Efesō ha tangata Siu ko ‘Apolosi na‘e tupu ‘i he kolo ko ‘Alekisānitia. Ko e tangata pōto‘i lea ia pea ‘ilo lahi ki he Folofolá. 25Na‘á ne toe ‘ilo lahi ki he ‘Alunga ‘o e ‘Eikí, peá ne fakahinohino mo e loto māfana ‘aupito ‘a e ngaahi mo‘oni ‘o kau kia Sīsuú. Ka na‘e ngata pē ‘ene ‘ilo ki he papitaisó he papitaiso ‘a Sioné. 26Na‘á ne kamata malanga māfana ‘i he fale lotu ‘o e kakai Siú. Pea fanongo ki ai ‘a Pīsila mo ‘Akuilá, pea na fakaafe‘i ia ki hona ‘apí ‘o fakamatala fakaikiiki ange ki ai ‘a e ‘Alunga ‘o e ‘Otuá. 27Na‘e fakakaukau leva ‘a ‘Apolosi ke ‘alu ki ‘Ākaia. Pea na‘e tokoni‘i ia ‘e he kakai ‘Efesō na‘e tui kia Sīsuú ‘aki ‘enau tohi ki he fa‘ahinga ‘i ‘Ākaia na‘e tui kia Sīsuú ‘o kole ke nau talitali lelei mu‘a ia. Peá ne a‘u atu ki ai, ‘o tokoni‘i lahi ‘a kinautolu kuo tui kia Sīsū koe‘uhi ko e ‘ofa lahi ‘a e ‘Otuá. 28He na‘e lahi ‘ene fakakikihi mo kinautolu ‘i he ngaahi fakataha‘anga ‘o e kakai Siú. Pea na‘e ‘ikai ke lava‘i ‘e he kakai Siú ‘ene ngaahi ‘uhingá, ko ‘ene fa‘a fakamo‘oni‘i mei he Folofolá ko Sīsū ‘a e Mīsaiá.
Избрани в момента:
Ngāue 18: TCNT
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Tongan Contemporary New Testament © Bible Society of the South Pacific, 2011.