Sione 21
21
Ko e Hā ʻa Si̇̄sū ki He‘ene Kau Ako ‘e Toko Fitu
1Pea hili ʻa e ngaahi meʻa ko iā, na‘e toe hā ʻa Si̇̄sū ki he‘ene kau akó he matātahi ʻo e Tahi ʻo Taipilioó. 2Na‘e fakataha ki ai ʻa Saimone Pita, mo Tōmasi, naʻe ui ko ‟Titimasi̇́,” mo Natāniela ko e tangata mei Kena ʻi Kāleli̇́, mo Sēmisi mo Sione, ko e ongo foha ‘o Sēpeti̇́, mo e toko ua kehe he kau ako ʻa Sīsuú. 3Pea pehē ‘e Pita kiate kinautolu: ‟Te u ‘alu au ‘o toutai.”
Pea nau pehēange kātoa ki ai: ‟Tau ō pē muʻa.” Ko ia, naʻa nau heka vaka leva ‘o ʻalu. Ka na‘e ʻaho ʻa e pō ko iā mo ‘enau toutai, mo e hala pē ʻo ʻikai ha‘anau me‘a ‘e ma‘u. 4Pea ʻi he maama hake ʻa e ʻahó, tā ko Si̇̄sū ‘ena ‘oku tu‘u mai he matātahi̇́, ka na‘e ‘ikai ke ʻilo ‘e he kau akó ko Si̇̄sū ia. 5Pea ‘eke ange ʻe Si̇̄sū kiate kinautolu: ‟Tamaiki, naʻe ma‘u ha me‘a?”
Pea nau tali kiate ia: ‟Hala‘atā!”
6Pea naʻe folofola kiate kinautolu: ‟Li̇̄ ʻa e kupengá ki he to‘omata‘u ‘o e vaká, kae ma‘u ha‘amou ika.” Pea nau li̇̄ leva ki ai, pea naʻa nau fiu hono toho mai ʻa e kupengá koeʻuhi̇̄ ko e lahi ʻa e ika na‘e ma‘ú.
7Pea pehēange ‘e he toko taha ako na‘e ‘ofa ai ʻa Si̇̄sū, kia Pita: ‟Tā ko e ‘Eiki̇́ ia!” Pea ʻi he fanongo leva ʻa Pita ki he lau: ‟Ko e ‘Eiki̇́ iá,” naʻá ne toe haʻi hono kofu tuʻá, he naʻá ne vete ia kae fai ‘ene ngāué, pea hopo ia ki tahi. 8Kae nofo ai pē ʻa e kau ako ko eé ‘i vaka, he kuo fonu ʻa e kupengá he iká, ka naʻe ʻikai te nau mamaʻo mei ʻuta, ko ha mita pē nai ʻe hivangofulu mei ʻuta, naʻa nau toho atu ai ʻa e kupengá.
9Pea ʻi heʻenau hake atu ki ‘utá, tā kuo tafu ai ha afi malala, pea ‘oku tunu ai ʻa e ika mo ha foʻi mā. 10Pea folofola ʻa Si̇̄sū ki he kau akó: ‟‘Omai ha ika mei̇́ he me‘a na‘a mou ma‘ú.”
11Pea toe heka ʻa Pita ki he vaká ‘o toho mai ʻa e kupengá ki ‘uta, naʻe fonu ai ʻa e ika lalahi̇́, feʻunga mo ha mata‘i ika ‘e teau nimangofulu mā tolu, ka na‘e ‘ikai ke mahae ʻa e kupengá.
12Pea folofola ʻa Si̇̄sū kiate kinautolu: ‟Mou omi ‘o kai.”
Pea na‘e ‘ikai ha taha he kau akó te ne toe fakakaukau ke ‘eke ange pē ko hai ia, he na‘e mahino kiate kinautolu, ko e ‘Eiki̇́ pē ia. 13Pea haʻu ʻa Si̇̄sū ʻo to‘o mai ʻa e foʻi maá, ‘o naʻe tufotufa atu kiate kinautolu, pea pehē pē mo e iká.
14Ko hono tu‘o tolu ia, ʻa e hā ʻa Si̇̄sū ki he‘ene kau akó, ‘i he hili ‘ene toetu‘u mei he pekiá.
Ko Si̇̄sū mo Pita
15Pea ʻi he ‘osi ‘enau kai̇́, naʻe folofola ʻa Si̇̄sū kia Saimone Pita: ‟‘E Saimone, foha ‘o Sione, ‘oku lahi ange koā ho‘o ‘ofa kiate aú ‘i he ‘ofa ʻakinautolú ni?”
Pea talaange ‘e Pita: ‟‘Io, ‘Eiki, ‘okú ke ʻafioʻi pē ‘eku ‘ofa kiate koé.”
Pea naʻe folofola kiate ia: ‟Pe‘i fafanga ‘eku fanga lami̇́.” 16Pea toe ‘eke ange ‘e Si̇̄sū, ko hono tuʻo uá ia: ‟‘E Saimone, foha ‘o Sione, ‘okú ke ‘ofa koā ‘iate au?”
Pea naʻe pehē kiate ia: ‟‘Io ‘Eiki, ‘okú ke ʻafioʻi pē ‘eku ‘ofa kiate koé.”
Pea folofola ange ʻa Si̇̄sū: ‟Tauhi ‘eku fanga sipi̇́.” 17Pea toe ʻeke ange ‘e Si̇̄sū, ko hono tu‘o tolú ia: ‟‘E Saimone, foha ‘o Sione, ‘okú ke ‘ofa koā kiate au?”
Pea mamahi ai ʻa e loto ‘o Pitá ‘i he tu‘o tolu hono ʻeke ange ‘e Si̇̄sū pē ‘okú ne ‘ofa ai̇́, pea ne pehēange: ‟‘Eiki, ‘okú ke ʻafioʻi ‘ekoe ʻa e me‘a kotoa pē. ʻOkú ke ʻafioʻi pē ‘eku ‘ofa ‘iate koé.”
Pea folofola ʻa Si̇̄sū kiate ia: ‟Fafanga ‘eku fanga sipi̇́. 18‘Oku ou fakapapau atu, ʻi he taimi ʻokú ke kei talavou ai̇́, te ke tu‘u hake ‘o ʻalu atu ki ha feitu‘u pē ʻokú ke fie ʻalu ki ai. Ka ‘oka ke ka motu‘a, te ke hiki hake ho nimá ke puke ia ‘e ha taha kehe, ʻo ne toki taki atu koe ki ha feitu‘u ‘e ‘ikai te ke fie ʻalu ki ai.” 19Ko e lau ko ia ‘a Si̇̄suú ke mahino kia Pita ‘a e anga ‘o e mateʻanga te ne fai ai hono fakalāngilangi‘i ʻo e ‘Otuá. Pea toki folofola ange ‘e Si̇̄sū ki ai: ‟Muimui mai kiate au.”
Ko Si̇̄sū mo e Toko taha Naʻá ne ‘Ofa ai He‘ene Kau Akó
20Pea tafoki ai ‘a Pita ‘o sio atu ‘oku muimui mai ‘i hono tuʻá ‘a e tokotaha ako ko ē na‘e ‘ofa ai ‘a Sīsuú, ‘a ē na‘e taupotu kia Si̇̄sū he kai̇́, pea ko ia ē naʻá ne ‘eke ange: ‟Ko hai te ne lavaki‘i koé, ‘Eiki?” 21Pea ʻi he sio atu ‘a Pita ki ai̇́, naʻá ne ‘eke ange kia Si̇̄sū: ‟Fēfē ‘a e tangata ko ená, ‘Eiki?”
22Pea tali ‘e Si̇̄sū: ‟Kapau te u loto ke ne tolonga ‘o a‘u ki he‘eku toe foki mai̇́, he ko ha meʻa ia ‘okú ke kau ai? Muimui mai pē koe kiate au!”
23Ka na‘e mafola leva he kau ako ‘a Si̇̄suú ‘a e pehē: tokua, ‘e ‘ikai toe mate ‘a e toko taha ko iā. Ka na‘e ‘ikai ko e pehē ‘e Si̇̄sū, ‘e ‘ikai te ne toe mate, ka naʻá ne pehē pē ‘e ia: ‟Kapau te u loto au ke ne tolonga ‘o a‘u ki he‘eku toe foki mai̇́, he ko ha meʻa ia ‘okú ke kau ai?”
24Ko e toko taha ako ko iā, ko ia ia naʻá ne fakamatala ʻa e ngaahi meʻá ni mo hikitohi̇́. Pea ‘oku mau ‘ilopau ‘oku mo‘oni ʻene fakamatalá.
25Pea ko eni, na‘e lahi foki mo e ngaahi me‘a na‘e fai ‘e Si̇̄sū, ʻa ia kapau ‘e hikitohi kotoa, ‘oku ou tui, ‘e ‘ikai hao ‘i māmani kātoa ‘a e ngaahi tohi ‘e fa‘ú.
Избрани в момента:
Sione 21: TCNT
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Tongan Contemporary New Testament © Bible Society of the South Pacific, 2011.