Luke 2
2
Ko e ʻAloʻi ʻo Si̇̄suú
(Mātiu 1:18-25)
1Pea naʻe hoko ʻi he kuonga ko iā, ha tuʻutuʻuni fakapuleʻanga ʻa Sisa ʻAkosito, ke fai ha tohi kakai, peá ke kau ki ai ʻa e kakai kotoa pē ʻo māmani. 2Ko e fuofua tohi kakai ia naʻe fakahoko, lolotonga ʻoku kei Kōvana ʻa Kilinio ʻi Si̇̄liá.
3Ko ia, na‘e takitaha foki ʻa e tangata mo e fefine ki hono kolo tupu‘anga ʻo tohi kakai ai. 4Pea ʻalu hake ai foki ʻa Siosifa mei Nāsaleti ʻi Kāleli̇́, ki Pētelihema ʻi Siuteá, ʻa e kolo tupu‘anga ʻo Tēvitá, he ko Siosifá, naʻá ne kau ki he hako ʻo Tēvitá.
5Pea naʻe fononga ʻa Siosifa mo Mele, ke na tohi kakai ai, he naʻe ʻosi fakapapauʻi ʻena mali̇́, pea kuo feitama ia.
6Pea lolotonga ʻena kei ʻi ai̇́, kuo hokosia ʻa e taimi fā‘ele ʻo Melé; 7Pea naʻe fā‘ele‘i ha tamasi‘i tangata, ko e ʻuluaki tama ia hono manavá, pea fakakofu ‘e Mele ʻa e tamasi‘i̇́, ʻo ne fakatokoto ia ʻi he ʻaiʻangakai ʻo e fanga manú, he naʻe ʻikai maʻu ha feituʻu ke nau nofo ai, ʻi ha fale talitaliʻanga kakai.
Ko e Kau Tauhi Sipí
8Pea na‘e ʻi ai ha kau tauhisipi naʻa nau le‘ohi ʻenau fanga sipi̇́ ʻi he ngaahi feituʻu ‘uta ʻo Pētelihemá, ʻi he pō ko iā.
9Pea fakafokifā naʻe tu‘u mai ha ʻāngelo mei he ʻEiki̇́ kiate kinautolu, pea na‘e malama atu kiate kinautolu ʻa e lāngilangi ʻo e ʻEiki̇́, pea naʻe manavahē lahi ʻaupito ai ʻa e kau tauhisipi̇́, 10Ka naʻe pehēange leva ‘e he ʻāngeló kiate kinautolu: ‟‘Oua te mou manavahē! He ko eni, ko ʻeku ha‘ú, ke fakahā atu ha ongoongolelei, ko e ongoongo ‘e fiefia ai ʻa e kakai kotoa pē. 11He na‘e ʻaloʻi he ʻahó ni ʻi he kolo ʻo Tēvitá ʻa homou Fakamo‘ui̇́, ʻa ia ko e Mi̇̄saia ʻa e ʻEiki̇́ ia. 12Pea ko e faka‘ilonga ʻeni kiate kimoutolu, ʻoka mou ka ʻilo ia: Kuo kofukofu‘i ia ʻaki ha ngaahi motuʻi kofu, pea ‘okú naʻe tokoto he ʻaiʻangakai ʻo e fanga manú.”
13Pea fakafokifā naʻe tutu‘u mai ha kau ʻāngelo tokolahi mei langi ʻo kau fakataha he fakafeta‘i ki he ‘Otuá, ʻo nau pehē:
14‟Ko e lāngilangi̇́, ke ʻo e ‘Otuá ʻo Langi Taupotú ia!
He kuo toka mai ʻene melinó ki māmani,
ki he kakai kotoa pē ʻokú ne finangalo lelei ki ai̇́.”
15Pea ʻi he foki hake ʻa e kau ʻāngeló, meiate kinautolu ki he langi̇́, naʻe fepehēʻaki ‘e he kau tauhisipi̇́: ‟Tau ō ā ki Pētelihema ke tau mamata he meʻa kuo hokó, ʻa ʻeni kuo fakahā mai kiate kitautolu ‘e he ʻEiki̇́.” 16Pea naʻa nau fakato‘oto‘o atu, ʻo nau ʻilo fakatouʻosi ʻa Mele mo Siosifa, pea mo e tamasiʻi̇ valevalé, ʻokú ne tokoto ʻi he ʻaiʻangakai ʻo e fanga manú.
17Pea ʻi he mamata leva ʻa e kau tauhisipi̇́ kia Sīsuú, naʻa nau talanoa ange ki heʻene ongo mātuá ʻa e lau ʻa e kau ʻāngeló ʻo kau ki he tamasiʻi̇́ ni. 18Pea naʻe ofo ʻaupito ʻa e kakai kotoa pē naʻa nau fanongo ki he talanoa ʻa e kau tauhisipi̇́ kiate kinautolu. 19Ka na‘e tānaki pē ʻe Mele ʻa e ‘ū meʻa kotoa ko ʻeni kuo hokó, ʻo ne fifili ki ai ʻi hono lotó.
20Pea foki atu leva ʻa e kau tauhisipi̇́ ‘oku nau fakahi̇̄kihikiʻi mo fakamālōʻia ʻa e ‘Otuá, koeʻuhi̇̄ ko e ngaahi meʻa kotoa naʻa nau mamata mo fanongo ki ai̇́, he na‘e hoko ʻo hangē tofu pē ko e meʻa naʻe lau ‘e he ʻāngeló.
Ko Hono Fakahingoa ʻo Si̇̄sū
21Pea hili ha ʻaho ‘e valu mei ai, pea fai leva ‘e Mele mo Siosifa kia Sīsū, ʻa e ouau faka-Siu, ko hono kaukauʻi ʻo e tamaiki tangatá, peá na fakahingoa ia ko Sīsū, ʻo hangē ko e tu‘utu‘uni ʻa e ʻāngeló kia Melé, ʻi heʻene fakahā ange ‘e feitamá.
Ko e Hiva ʻa Simioné
22Pea faifai pea aʻu ki he taimi na‘e kakato ai ʻa e ouau ‘oku tuʻutuʻuni ‘e he Lao ʻa Mōsesé ke fakamaʻaʻaki ha fefine, ‘oka hili ha‘ane fā‘ele, pea ‘ave ‘e Siosifa mo Mele ʻa Si̇̄sū ki Selusalema ki he Temipalé ʻo fakatāpui ia ai maʻa e ʻEiki̇́; 23Ko ʻena talangofua ia ki he tuʻutuʻuni ʻi he Lao ʻa e ʻEiki̇́‘oku pehē: ‟Ko e ʻinasi ʻo e ʻEiki̇́ ʻa e ʻuluaki tama tangata kotoa pē.” 24Pea naʻe fai ʻa e feilaulaú ʻo hangē ko ia ʻoku tuʻutuʻuni he Lao ʻa e ʻEiki̇́, ke fai ‘e he ongo mātuʻá, ʻa ia ko ha ongo fo‘i lupe pē ko ha ongo fo‘i kulukulu mui ʻe ua.
25Pea ko eni, naʻe nofo ʻi Selusalema ha tangata‘eiki ko Simione hono hingoá, ʻa ia ko e tangata‘eiki faitotonu mo ‘ofa mo‘oni ki he ‘Otuá. Pea na‘e kau ia ki he faʻahinga na‘e ʻamanaki kuo toe si‘i pea fakamoʻui ‘e he ‘Otuá ʻa ‘Isileli̇́. Pea naʻe nofoʻia ia ʻe he Laumālie Māʻoniʻoni̇́; 26Pea kuo fakahā ange kiate ia ʻe he Laumālie Māʻoniʻoni̇́, ʻe ʻikai te ne mate kae‘oua kuó ne mamata ki he Mi̇̄saia ʻa e ʻEiki̇́.
27Pea ʻi hono tataki ia ʻe he Laumālié, naʻá ne ʻalu atu ki he Temipalé, lolotonga ia mo hono ʻomi ʻa Si̇̄sū, ʻe he ongo mātuʻá ke fakahoko kiate ia ʻa e tu‘utu‘uni ʻa e Laó, ki he fānau toki fā‘ele‘i̇́. 28Pea toʻo ‘e Simione ʻa Si̇̄sū, ʻo ne fua hake mo ne fakamālōʻia ʻa e ‘Otuá, ʻo ne pehē:
29‟To‘o atu ā he taimi ni, ʻEiki,
ʻa ho‘o motuʻa fai fatongia ko aú.
He kuo fiemālie hoku lotó.
Koeʻuhi̇̄ kuó ke fakamoʻoni,
ki he folofola naʻá ke fai mai̇́.
30He ko ʻeni kuo mamata tonu hoku matá ni
ki he Fakamoʻui kuó ke tuku mai̇́.
31ʻA ia foki kuó ke tokonaki ke mamata ki ai ʻa e kakai kotoa pē.
32Ko e māama‘anga ia te ne fakahinohino ʻa e pule‘anga kotoa pē.
Pea ‘e lāngilangi‘ia ai ho kakai ‘Isileli̇́.”
33Pea na‘e ‘ohovale ‘aupito ʻa e ongo mātuʻa ʻa Sīsuú, he ngaahi meʻa na‘e lea ʻaki ‘e Simioné, ʻo kau ki he tamasiʻi̇́.
34Pea toki tāpuaki‘i ‘e Simione ʻa Siosifa mo Mele, ʻo ne pehēange kia Mele:
‟Ko e tamasiʻi̇́ ni,
ʻe iku ke holoki hifo ai ha tokolahi,
kae fokotu‘u hake ʻiate ia foki mo ha tokolahi, ʻi ʻIsileli̇́.
Pea ko e fakaʻilonga ʻeni kiate iá;
ko e pau ke leakoviʻi ia.
35Pea ko koe foki,
ʻe fakalaveaʻi hoʻo moʻui̇́ ʻe ha heletā,
koeʻuhi̇̄ kae fakaeʻa ai mei ha tokolahi,
ʻa e ngaahi meʻa kuo fufū ʻi honau lotó.”
Ko e Palōfita Fefine ko ʻAna
36Pea na‘e nofo foki ʻi he Temipalé mo ha palōfita fefine, ko ʻAna, ko e ‘ōfefine ia ʻo Fānueli, mei he haʻa ʻĀseli; pea kuo taʻu motuʻa ia. Naʻá ne mali ‘oku kei finemui, ʻo ne nofo mo hono mali̇́ ʻi ha ta‘u ‘e fitu pea toki mālōlō hono husepāniti̇́. 37Pea kuó ne nofo fakauitou ai pē ʻo aʻu mai ʻeni ki hono ta‘u valu ngofulu mā fā. Pea ko e ʻaho mo e pō, mo ʻene nofo ai pē ki he ‘Otuá he Temipalé, ʻo lotu mo ‘aukai.
38Pea tu‘u mai leva ʻa ʻAna, ʻi he taimi ko iā, ʻo fai ʻene fakamālō ki he ‘Otuá, pea naʻe lea ʻo kau ki he tamasi‘i̇́, ki he kakai kotoa naʻa nau nofo ʻo ʻamanaki ki hono fakatau‘atāina‘i ʻo Selusalemá.
Ko e Foki ʻa Si̇̄sū ki Nāsaletí
39Pea hili hono fakahoko ‘e Siosifa mo Mele ʻa e ngaahi ouau kotoa naʻe tuʻutuʻuni ʻe he Laó, naʻá na foki leva ki Kāleli̇́, ki honau ʻapi̇́ ʻi Nāsaleti.
40Pea naʻe fakautuutu ʻa e tupu ʻa e tamasiʻi̇́ ʻi he ivi, pea naʻe fakafonuʻaki ia ʻa e potó, pea nofoʻia foki ia ʻe he ʻofa ʻa e ʻOtuá.
Ko e Tamasi‘i ko Si̇̄sū ʻi he Temipalé
41Pea na‘e ō ʻa e ongo mātuʻa ʻa Si̇̄suú ki Selusalema ʻi he ta‘u kotoa, ʻo kau ki he kātoanga Pāsová. 42Pea ʻi he hoko ʻa e ta‘u hongofulumāua ʻo Sīsuú, naʻa nau ō hake mo ia, ʻo hangē ko e tuʻutuʻuni ʻo e kātoanga ko iā.
43Pea ʻi he hili ʻa e kātoangá, pea kuo fononga atu ʻa e ongo matuʻa ʻa Sīsuú, ke foki ki ʻapi, kae ʻikai ke na fakatokanga‘i naʻe kei nofo pē ʻa Si̇̄sū ʻi Selusalema. 44Ka naʻá na fakakaukau pē ‘oku ha‘u fakataha ia mo honau ngaahi kaungāfonongá. Pea hili ha ʻaho kakato ‘e taha peá na toki kamata ke kumi holo ia ʻi honau ngaahi kāingá mo honau kaungāfononga. 45Pea ʻi heʻena fiu kumi iá, naʻá na toe foki ki Selusalema ʻo kumi holo ia ai.
46Pea hili ha ʻaho ‘e tolu, naʻá na toki ma‘u atu ia, ʻi he Temipalé, ‘okú naʻe ʻi he lotolotonga ʻo e kau faiako Laó, ʻo fakafanongo mo ʻekeʻeke kiate kinautolu ha ngaahi meʻa. 47Pea ko kinautolu kotoa naʻe fanongo kiate iá, naʻa nau ofo kotoa pē he lahi ʻene ʻiló, pea mo e anga ʻo ʻene tali fehu‘i̇́.
48Ka ʻi he mamata kiate ia ʻene ongo mātuʻá, na‘e ‘osi ʻena tumú ‘iate ia. Pea lea ange ʻene fa‘eé: ‟Tamasi‘i, Ko e hā kuó ke pehe‘i ai kimauá? Ko au mo hoʻo tangataʻeiki̇́, kuo hohaʻa lahi homa lotó, heʻema kumi holo koé!”
49Pea pehēange ‘e Si̇̄sū kiate kinaua: ‟Ko e hā naʻá mo kumi ai aú? Na‘e ʻikai koā te mo ʻilo kuo pau ke u ʻi he fale ʻo ʻeku Tamai̇́?” 50Ka na‘e ʻikai ke mahino kiate kinaua ʻene laú.
51Ko ia, na‘e foki ai pē ʻa Si̇̄sū mo ʻene ongo mātuʻá ki Nāsaleti, ʻo ne nofo talangofua kiate kinaua. Ka na‘e tānaki pē ‘e Mele ʻa e ngaahi meʻa na‘e hokó ʻo ne faʻa fifili ki ai ʻi hono lotó.
52Pea tupu fakautuutu ai pē ʻa Si̇̄sū ʻi he potó mo ʻene mo‘ui fakasinó. Pea na‘e ʻofeina ʻene mo‘ui̇́ ʻi he ʻafio ʻa e ‘Otuá pea mo e ʻao ʻo e kakai̇́.
Избрани в момента:
Luke 2: TCNT
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Tongan Contemporary New Testament © Bible Society of the South Pacific, 2011.