Mātiu 19
19
Ko e Vete Mali
(Ma‘ake 10:1-12)
1Pea ʻi he ‘osi ʻa e faiako ‘a Sīsuú, naʻá ne ‘alu mei Kāleli ki Siutea ki he fonua he kauvai ‘o e vaitafe ko Soatani̇́. 2Pea naʻe muimui atu ki ai ha fu‘u kakai tokolahi, pea naʻe fakamo‘ui kinautolu ʻi he feituʻu koiā.
3Pea omi leva ha kau Fālesi ki ai, ‘o nau feinga ke ne leaʻaki ha me‘a ke ne ‘efihia ai he Laó. Na‘á nau fehu‘i ange, ‟‘Oku ngofua nai ki ha taha ‘i he‘etau Laó ke ne vete hono mali̇́ ‘i ha fa‘ahinga ʻuhinga pē?”
4Pea tali ‘e Si̇̄sū, ‟Kuo teʻeki koā te mou lau ʻa e potu Folofola ko eni̇́, ‘I he kamata‘angá na‘e fakatupu ‘e he ‘Otuá ‘a e tangata mo e fefine? 5Pea naʻe folofola, Ko hono ʻuhinga ia kuo pau ai ke tuku ange ‘e ha tangata ‘ene tamai̇́ mo ʻene fa‘eé, ka na hoko ‘o kakano taha mo hono uaifi̇́. 6‘Oku ‘ikai ke na kei ua, ka kuo na hoko ko e kakano pē ‘e taha. Pea ko kinaua kuo fakahoko ‘e he ‘Otuá ‘o tahá, ke ‘oua na‘á toe fakamāvae ‘e ha taha.”
7Pea toki pehē ange ‘e he kau Fālesi̇́, ‟Pea Ko e hā leva hono ʻuhinga na‘e pehē ai ‘e Mōsese he Laó ‘oku lava ke ‘oange ‘e ha tangata ha tohi vete ki hono uaifi̇́, pea fekau ke ‘alú?” 8Pea tali ‘e Si̇̄sū: ‟Naʻe fakangofua pē ‘e Mōsese ke mou tuku ange homou uaifi̇́ koeʻuhi̇̄ ko e fefeka homou lotó. Ka na‘e ‘ikai ke pehē ʻi he kamata‘angá. 9Pea ko hono mo‘oni̇́ ʻeni ‘oku ou tala atú, ka ‘ilonga ha tangata te ne vete mo hono uaifi̇́, ka na‘e ‘ikai ke fe‘auaki ia, kapau ‘e toe mali ʻa e tangatá, ko ʻene tono mali ia.”
10Pea pehē ange ‘e he kau akó kia Si̇̄sū, ‟Kapau ko e ‘ātunga ia ‘o e vā ‘o ha tangata mo hono mali̇́, pea tā ‘oku sai ange pē ‘a e nofo ta‘emali̇́ ia!”
11Pea talaange e Si̇̄sū kiate kinautolu, ‟‘Oku ‘ikai ʻuhinga ‘eku fakahinohino ko ʻeni̇́ ki he kakai kotoa pē. ‘Oku ʻuhinga pē ia ki he fa‘ahinga kuo teu‘i ‘e he ‘Otuá ke nau lava‘i ʻa e nofo ta‘e mali̇́. 12He ʻoku ʻi ai ʻa e ngaahi ʻuhinga kehekehe ‘oku fai ai ʻa e ta‘emali̇́. ‘Oku pehē ‘a e ni‘ihi naʻe fa‘u pehē pē honau sinó. Pea ko e ni‘ihi ko ha fa‘ahinga me‘a kuo fai ki honau sinó ʻe ha taha. Ka ko e ni‘ihi, ‘oku ‘ikai te nau mali koeʻuhi̇̄ ko e Pule‘anga ‘o Hēvani̇́. Ko koe ‘okú ke lava ‘o tali ʻa e fakahinohino ko eni̇́, peá ke tali ia ‘e koe.”
Ko e Tāpuaki‘i ‘e Si̇̄sū ha Longa ʻi Fānau
(Ma‘ake 10:13-16; Luke 18:15-17)
13Pea naʻe toki ‘omi kia Si̇̄sū ha fānaú ke ne hilifaki hono nimá kiate kinautolu ‘o tāpuaki‘i. Ka naʻe hanga ‘e heʻene kau akó ‘o valokiʻi kinautolu. 14Kae talaange ‘e Si̇̄sū, ‟Mou tuku e longa‘i fānaú ke omi kiate au. ‘Oua te mou ta‘ofi kinautolu, he ‘oku maʻae faʻahinga peheé, ʻa e Pule‘anga ‘o Hēvani̇́.” 15Pea naʻe hilifaki hono nimá kiate kinautolu, pea naʻe toki mavahe mei he feitu‘u ko iá.
Ko e Talavou Koloa‘ia
(Ma‘ake 10:17-31; Luke 18:18-30)
16Pea ko eni, na‘e ‘i ai ha talavou na‘e ha‘u kia Si̇̄sū ‘o fehu‘i ange, ‟‘E tangata‘eiki, ko e hā ha me‘a lelei te u fai ka u ma‘u ai ʻa e mo‘ui ta‘engatá?”
17Pea tali ‘e Si̇̄sū, ‟Ko e hā ‘okú ke faka‘eke‘eke ai au ʻo kau ki he me‘a ‘oku lelei̇́? Ko e ‘Otuá pē ‘a e lelei̇́. Pea kapau ‘okú ke fiema‘u ʻa e mo‘ui ta‘engatá, peá ke tauhi ʻa e ngaahi fekau ‘a e ‘Otuá.”
18Pea ‘eke ange ‘e he talavoú kia Si̇̄sū, ‟‘A e fē fua?”
Pea folofola Si̇̄sū, ‟‘Oua te ke fakapō. ‘Oua te ke tono mali. ‘Oua te ke kaiha‘a. ‘Oua te ke fakamo‘oni loi. 19Faka‘apa‘apa ki ho‘o tamai̇́ mo ho‘o fa‘eé. Peá ke ‘ofa ki ho kaungā‘api̇́ ‘o hangē ko ho‘o ‘ofa kiate koé.”
20Pea pehē ange ‘e he talavoú kia Si̇̄sū, ‟Kuo fuoloa ‘eku tauhi kotoa e ngaahi fekau ko iá. ‘Oku kei toe nai ha fekau ke u fai?”
21Pea tali ‘e Si̇̄sū, ‟Kapau ‘okú ke loto ke haohaoa ho‘o moʻui̇́, peá ke ‘alu ‘o fakatau atu ho‘o me‘a kotoa ‘oku ma‘ú, pea tufa ʻa e pa‘angá ki he masivá, ka ke ma‘u koloa ‘i Hēvani. Peá ke ha‘u leva ‘o muimui kiate au.”
22Pea ʻi he fanongo ʻa e talavoú he tali ‘a Si̇̄suú pea ‘alu leva ia kuo lotomamahi ‘aupito. He ko e tama koloa‘ia ia.
23Pea talaange ‘e Si̇̄sū ki he‘ene kau akó, ‟Ko hono mo‘oni̇́ ʻeni ‘oku ou tala atú, ‘oku faingata‘a ‘aupito ke hū ha taha koloa‘ia ki he Pule‘anga ‘o Hēvani̇́. 24Ko hono mo‘oni̇́, ‘oku faingofua ange ke hū ha kāmeli ‘i ha ava‘i hui tuitui ‘i he hū ha taha koloa‘ia ki he Pule‘anga e ‘Otuá.”
25Pea na‘e mātuʻaki ofo ai ʻa e kau akó, ‘o nau pehē: ‟Pea ko hai leva ai ‘e ala mo‘ui?”
26Pea sio fakamama‘u ‘a Si̇̄sū kiate kinautolu, pea naʻe toki pehē: ‟‘Oku ‘i ai ʻa e ngaahi me‘a ‘e ‘ikai te mou lava ‘ekimoutolu. Ka ‘oku malava ‘e he ‘Otuá ‘a e me‘a kotoa pē.”
27Pea pehē ange ‘e Pita, ‟Kuo mau ‘osi liʻaki ‘emau me‘a kotoa ka mau muimui kiate koe. Ko e hā ha‘mau me‘a ‘e ma‘u ai̇́?”
28Pea folofola ‘a Si̇̄sū, ‟Ko hono mo‘oni̇́ ʻeni ‘oku ou tala atú, ka nofo ‘a e Foha ʻo e Tangatá ‘i hono taloni lāngilangi‘iá, pea ko kimoutolu ‘a e toko hongofulumāua kuo mou kau he muimui kiate aú, te mou taki taha nofo ‘i ha taloni. Peá te mou fakamāau‘i ʻa e matakali ‘e hongofulumāua ʻo ʻIsileli̇́. 29Pea ‘ilonga ha taha kuó ne liʻaki hano ‘api, pē ko hano tokoua, pē tuofāfine, pē tamai, pē fa‘ē, pē fānau, pē ngoue‘anga koeʻuhi̇̄ ko au, ‘e fakakoloa ia ‘o liuliunga. Pea ‘e ‘oange mo‘ona mo e mo‘ui ta‘engatá. 30Ka ko e tokolahi ‘oku nau lolotonga tu‘u ‘i he ‘otu mu‘á, te nau tu‘u he ‘otu mui̇́. Pea ko e tokolahi ‘oku nau lolotonga tu‘u he ‘otu mui̇́, te nau tu‘u he ‘otu mu‘á.”
Избрани в момента:
Mātiu 19: TCNT
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Tongan Contemporary New Testament © Bible Society of the South Pacific, 2011.