Ma‘ake 6
6
Ko hono Kapusi ‘o Si̇̄sū mei Nāsaleti
(Mātiu 13:53-58; Luke 4:16-30)
1Pea mavahe ʻa Si̇̄sū mei he feitu‘u ko iá ‘o naʻe ʻalu ki hono koló, pea muimui ai pē ʻene kau akó. 2Pea a‘u ki he Sāpaté ko iā, pea kamata faiako ʻa Si̇̄sū he falelotú. Pea fakatumutumu ai ʻa e tokolahi na‘e fanongo ki he‘ene faiakó, ‘o nau fe‘ekenaki, ‟Naʻe maʻu mei fē ʻe he tangatá ni ʻa e ngaahi me‘á ni? Na‘á ne ma‘u mei fē ʻa e fu‘u poto ko ʻeni ‘okú ne fai ʻaki ʻene ngaahi maná? 3‘Ikai ko e tufungá eni, ʻa e tama ʻa Melé, pea ko e tokoua ‘o Sēmisi mo Siosifa mo Siutasi mo Saimoné? ‘Ikai ‘oku nofo heni hono tuofāfiné?” Pea naʻe faingataʻa ke nau tali ʻa e ngaahi meʻa naʻá ne fai̇́.
4Pea pehē ange ‘e Si̇̄sū, ‟Ko e palōfita kotoa pē, ‘oku faka‘apa‘apa‘i ia ‘e he kakai̇́, ʻi he feitu‘u kotoa, tukukehe pē hono kakai totonu ‘o‘oná, ʻa hono kāingá, mo hono fāmili̇́.” 5Pea na‘e ‘ikai loko lava ‘e Si̇̄sū ‘o fai ha mana he koló. Ko e kiʻi ni‘ihi tokosi‘i pē na‘e puke, na‘á ne hilifaki hono nimá kiate kinautolu ‘o fakamo‘ui. 6Pea na‘e fakatumutumu ʻaupito ʻa Si̇̄sū ʻi he‘enau ta‘e tuí. Ko ia, naʻe ʻalu takaiʻa Si̇̄sū mei he kolo ki he kolo, ʻo faiako.
Ko e Fekau Atu ‘e Si̇̄sū ʻa e Toko hongofulu māuá
(Mātiu 10:5-15; Luke 9:1-6)
7Pea na‘e ui mai ‘e Si̇̄sū ʻa e toko hongofulu mā uá, ‘o fekau ke nau tautau toko ua atu ki he kakai̇́. Pea naʻe ‘oange kiate kinautolu ʻa e mafai ke pule‘i ʻa e ngaahi laumālie ʻuli̇́. 8Na‘á ne tuʻutuʻuni foki kiate kinautolu, ‟‘Oua te mou ō mo ha toe me‘a, ka ko homou tokotokó pē. ‘Oua te mou ō mo ha me‘akai, pē ko ha kato ‘oho, pē faʻo ha pa‘anga homou kató. 9Mou tui pē ha senitolo, kae ʻoua te mou ō mo ha vala fetongi.”
10Pea naʻe toe pehē kiate kinautolu, ‟‘Ilonga ha ʻapi ‘e talitali lelei ai kimoutolu, pea mou nofo ai, kae‘oua ke mou hiki mei he kolo ko iā. 11‘Ilonga ha kolo ‘e ‘ikai talitali lelei ai kimoutolu mo ho‘omou malangá, pea mou hiki mei ai, ʻo mou tūtuuʻi ʻa e efu honau koló mei homou ʻaofivaʻé, ke hoko ko e faka‘ilonga kiate kinautolu.”
12Pea ō atu ʻa e toko hongofulu mā uá ‘o malanga ki he kakai kotoa pē ke nau tafoki mei he‘enau ngaahi angahalá. 13Pea nau toe kapusi ʻa e fanga tēvolo tokolahi, mo tākai lolo ‘ōlive ʻa e tokolahi na‘e puke, ‘o fakamo‘ui kinautolu.
Ko e Fakapoongi ‘o Sione Papitaiso
(Mātiu 14:1-12; Luke 9:7-9)
14Pea fanongo ai ʻa e tuʻi ko Hēlotá, he kuo pavake atu ʻa e ongoongo ‘o Si̇̄suú ʻi he feitu‘u kotoa pē, he naʻe pehē ʻe he niʻihi, ko Sione Papitaiso ʻa Si̇̄sū kuo toetuʻu mei he maté, pea ko e ‘uhinga ia, tokua, ‘o ʻene faimaná. 15Ka naʻe pehē ‘e he ni‘ihi, ko ‘Ilaisiā ia. Kae pehē ‘e he ni‘ihi ko e palōfitá, ‘o hangē ko ha palōfita he kuohili̇́. 16Ka ʻi he fanongo ai ʻa Hēlota, naʻá ne pehē ‘e ia, ‟Ko Sione Papitaiso pē ia, ʻa ē na‘á ku tuʻutuʻuni ke tuʻusi hono ʻulú, ka ko ʻeni kuo toetuʻu!”
17He na‘e tuʻutuʻuni ‘e Hēlota ke puke ʻa Sione ‘o ha‘i pea li̇̄ ki he pilīsoné koeʻuhi̇̄ ko Hēlotiasi, ʻa ia na‘á ne mali mo iá, ka ko e uaifi ia ‘o hono tokouá, ko Filipe. 18He na‘e toutou tala pē ‘e Sione Papitaiso kia Hēlota, ‟‘Oku hala ho‘o nonofo mo e mali ho tokouá!”
19Pea nofo ai pē ʻa Hēlotiasi ‘o lotokovi kia Sione, mo faka‘amu ke tāmate‘i mai ia. Ka na‘e ‘ikai ke lava. 20He na‘e teteki ʻa Hēlota kia Sione, ko ʻene ‘ilo ko e tangata angatonu ia mo mā‘oni‘oni, pea naʻe malu‘i ia. Na‘e loto pē ia ke fanongo malanga ‘ia Sione, neongo na‘e fa‘a puputuʻu ai hono lotó.
21Pea faifai̇́ naʻe maʻu ha faingamālie ʻo Helōtiasi. He ʻi he hoko ʻa e ʻaho ‘o Hēlotá, na‘e teuteu ʻe ia ha kātoanga maʻa e kau maʻulakanga fakapule‘anga kotoa pē, mo e kau ʻEikitaú, mo e kau māʻolunga ‘o Kālelí. 22Pea hū mai ʻa e tama ʻa Hēlotiasi̇́ ‘o tau‘olunga, pea mālie‘ia ai ʻa Hēlota mo ʻene kau fakaafé. Pea tō ai ʻa e folofola ʻa e tuʻi̇́ ki he ta‘ahiné, ‟Kole mai ha me‘a pē, pea te u ‘oatu ia ma‘au.” 23Pea toki fuakava ange ʻa Hēlota ki ai, ‟Neongo pē ko e hā te ke kole mai̇́, te u ‘oatu ia ma‘au, ‘o a‘u pē ki he vaeuamālie hoku pule‘angá!”
24Pea hū atu leva ʻa e ta‘ahiné kitu‘a ‘o ʻeke ange ki heʻene fa‘eé, ‟Ko e hā ha me‘a te u kolé?” Pea tali ‘e heʻene fa‘eé, ‟Kole ʻa e ʻulu ‘o Sione Papitaisó!”
25Pea toe hū fakato‘oto‘o mai leva ʻa e ta‘ahiné ki he tuʻi̇́ ‘o talaange, ‟‘Oku ou loto ke ‘omi leva ma‘aku ʻa e ʻulu ‘o Sione Papitaisó ʻi ha laulau.” 26Pea loto mamahi ʻaupito ai ʻa e tuʻi̇́, ka na‘e ‘ikai te ne lava ke fakafisi mei ai, koeʻuhi̇̄ he naʻe meʻa‘i ‘e he hou‘eiki̇́, ʻi he taumafá, ʻene fuakava naʻe fai̇́. 27Ko ia, naʻá ne fekau atu leva ha ka‘ate ke ʻalu mo e tuʻutuʻuni, ke ‘omi ʻa e ʻulu ‘o Sioné. Pea ʻalu ʻa e ka‘até ki he pili̇̄soné, ‘o tuʻusi ʻa e ʻulu ‘o Sioné; 28Pea naʻe ‘omi ia ʻi ha laulau, ‘o ‘oange ki he ta‘ahiné, pea toki ‘oange ia ‘e he ta‘ahiné, ki heʻene fa‘eé.
29Pea fanongo ai ʻa e kau ako ʻa Sioné, pea nau omi leva ‘o ‘ave hono sinó ‘o tanu.
Ko e Fafanga ‘e Si̇̄sū e Toko Nima Afe
(Mātiu 14:13-21; Luke 9:10-17; Sione 6:1-14)
30Pea fakatahataha mai leva ʻa e kau ʻApositoló kia Si̇̄sū ‘o nau talanoa kiate ia ʻa e ngaahi me‘a kotoa naʻa nau fai̇́ mo e ngaahi me‘a na‘á nau malanga‘aki̇́.
31Ka koeʻuhi̇̄ naʻe kei fe‘alu‘aki ai ha kakai tokolahi, naʻe ‘ikai ai ha faingamālie ‘o Si̇̄sū mo ʻene kau akó ke ma‘u me‘atokoni. Pea pehē ange ‘e Si̇̄sū kiate kinautolu, ‟Tau ō mo au ki ha feitu‘u lōngonoá, ke tau ki‘i mālōlō ai.” 32Pea nau tukufolau atu ʻi ha vaka ki he feitu‘u na‘e ngaongao ke fakaekinautolu pē.
33Ka ko e tokolahi ʻo e kakai̇́, ʻi heʻenau fakatokanga‘i ʻenau mavahe atú, naʻa nau lele lalo hake kinautolu ʻi ʻuta, mei he kolo kotoa pē, ‘o nau fua a‘u atu ‘ia Si̇̄sū, ki he feitu‘u ko iā.
34Pea ʻi he hifo atu ʻa Si̇̄sū mei he vaká, kuo tali mai ha fuʻu kakai tokolahi. Pea ake ai ʻa e ‘ofá ʻi hono lotó kiate kinautolu, he na‘á nau hangē ha fanga sipi ‘oku ‘ikai hanau tauhi̇́, ko ia, naʻá ne ako‘i ange kiate kinautolu ha ngaahi me‘a lahi.
35Pea ʻi heʻene efiafi hifó, pea omi ʻa e kau akó ‘o talaange kia Si̇̄sū, ‟Kuo tāito ʻa e laʻaá, pea ko e feituʻu mamaʻo eni. 36Fekau atu mu‘a ʻa e kakai̇́ ke nau ō ki he ngaahi ngoue‘anga takatakai̇́, mo e fanga ki‘i kolo ofi mai̇́, ‘o fakatau mei ai ha me‘a ke nau kai.”
37Kae tali ‘e Si̇̄sū kiate kinautolu, ‟Mou ‘oange ʻekimoutolu ha me‘a ke nau kai.” Pea nau pehēange, ‟Ko ho loto koā ke mau ō ‘o fakatau ha mā feʻunga mo e pa‘anga siliva ‘e uangeau ʻo ʻange ke nau kai?”
38Pea fehu‘i ange ‘e Si̇̄sū kiate kinautolu, ‟Ko ho‘omou fo‘i mā ‘e fiha ‘oku maʻú? Mou ō ‘o vakai.” Pea nau vakai ʻo ʻilo, pea nau pehē: ‟Ko e fo‘i mā ‘e nima mo e mata‘iika ‘e ua.”
39Pea naʻe fekau ke nau fakanofonofo fakapupunga ʻa e kakai̇́ kotoa, he ko e feitu‘u musie ma‘ui‘ui ia. 40Ko ia naʻa nau tangutu ʻo tautau toko teau, mo tautau toko nimangofulu.
41Pea to‘o ‘e Si̇̄sū ʻa e fo‘i mā ‘e nimá mo e ongo mata‘iiká, pea naʻe hanga hake ki he langi̇́ ʻo fai ʻene fakafetaʻi, pea naʻe toki pakipaki ʻa e ngaahi foʻi mā ‘o ‘oange ki he‘ene kau akó, ke nau tufa ki he kakaí. Na‘á ne tufotufa foki mo e ongo mata‘iiká, ‘o ‘inasi ai ʻa e kakai kotoa pē.
42Pea na‘e kai kātoa pē ʻa e kakai̇́ ‘o mākona. 43Pea toki hanga ‘e heʻene kau akó ‘o tufi ʻa e toetoenga maá mo e iká, ‘o fonu ai ha ngaahi kato lalahi ‘e hongofulumāua.
44Pea ko e toko lahi ‘o e kakai na‘e kai he ngaahi fo‘i maá, ko e kakai tangata ‘e toko nima afe.
Ko e Hāʻele Atu ʻa Si̇̄sū he Fukahi Vai̇́
(Mātiu 14:22-33; Luke 6:15-21)
45Pea kouna leva ‘e Si̇̄sū ʻene kau akó ke nau heka ki he vaká ‘o mu‘omu‘a atu ki he kauvai ‘e tahá, ki Petesaita, ka naʻe tukuange ‘e ia ʻa e kakai̇́ ke nau mātuku. 46Pea hili ʻene tukuange ʻa e kakai̇́, pea naʻe toki ʻalu hake ki he moʻungá ke fai ʻene lotu.
47Pea ʻi heʻene efiafi poʻuli hifó kuo a‘u atu ʻa e vaká ki he loto mālie ‘o e tahi̇́, kae toe toko taha pē ʻa Si̇̄sū ʻi ʻuta. 48Pea fakatokanga‘i atu ‘e Si̇̄sū ‘oku faingata‘ā‘ia ʻa e kau akó ʻi hono ʻaloʻalo ‘o e vaká, he kuo angi mei mu‘a ʻa e matangi̇́. Pea ʻi he ngaahi houa ʻo e hengihengi̇́, naʻe toki ʻalu atu ʻa Si̇̄sū kiate kinautolu ‘okú ne hā‘ele atu he fukahi tahi̇́, ‘o ne faaiatu ke fakalaka he vaká. 49Ka ʻi he fakatokanga‘i atu ‘e he kau akó ʻene hāʻele he fukahi tahi̇́, naʻa nau mahalo ko ha tēvolo, ʻo nau fekālangaʻi. 50He na‘á nau mamata kotoa pē ki ai ʻo nau manavahē. Kae folofola mai leva ʻa Si̇̄sū kiate kinautolu, ‟Mou fiemālie pē! Ko au pē ia! ‘Oua ‘e manavahē!” 51Pea ʻi heʻene heka hake ki vaká, naʻe malū leva ʻa e matangi̇́. Pea toki fakatumutumu ai ʻa e kau akó. 52He na‘e ‘ikai ke mahino kiate kinautolu ʻa e ‘uhinga ‘o e ngaahi fo‘i maá, koeʻuhi̇̄ he kuo mafasia honau lotó.
Ko e Fakamo‘ui ‘e Si̇̄sū e Mahaki ʻi Kenesaleti
(Mātiu 14:34-36)
53Pea nau folau ai pē ki he kauvai̇́, ‘o tau ki he feitu‘u Kenesaleti̇́, ‘o no‘o ai honau vaká. 54Pea ʻi he‘enau hifo atu mei vaká, kuo ‘ilo ‘e he kakai̇́, ko Si̇̄sū eni. 55Pea nau feleleʻi mai mei he ngaahi feitu‘u fonua ko iā, ‘o fata mai ʻenau kau mahaki̇́ honau ngaahi mohengá, ki ha feitu‘u pē na‘á nau fanongo, ‘oku ʻi ai ʻa Si̇̄sū. 56‘Ilonga ha feituʻu naʻá ne ʻalu ki ai, ha kolo si‘i, pē kolo lahi, pē feituʻu tukuʻuta, na‘á nau ‘ave ʻenau kau mahaki̇́ ki he ngaahi feituʻu fefakatauʻaki̇́, ‘o kole kiate ia, ke tuku ke nau ki‘i ala muʻa he kapa hono pulupulú, pea ko kinautolu kotoa pē na‘e malave ki ai̇́, na‘e fakamo‘ui.
Избрани в момента:
Ma‘ake 6: TCNT
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Tongan Contemporary New Testament © Bible Society of the South Pacific, 2011.