Ma‘ake 9
9
1Pea toe folofola ʻa Si̇̄sū kiate kinautolu, ‟Ko hono mo‘oni̇́ ʻeni ‘oku ou tala atú, ‘oku ʻi ai ʻa e ni‘ihi ‘oku tutuʻu heni ‘e ‘ikai te nau mate kae‘oua kuo nau mamata ki he hoko mai ʻa e pule‘anga ‘o e ‘Otua mo hono māfimafi̇́.”
Ko e Lāngilangi Totonu ‘o Si̇̄sū
(Mātiu 17:1-13; Luke 9:28-36)
2Pea hili e ʻaho ‘e ono mei ai, pea vahe‘i ‘e Si̇̄sū ʻa Pita, mo Sēmisi, mo Sione, ‘o ne taki hake kinautolu ki ha funga moʻunga mā‘olunga fakaekinautolu pē. Pea naʻe liliu hono fōtungá ʻo fakakehe ʻi honau lotolotongá. 3He ko hono kofú naʻe hina ekiaki. ‘E ‘ikai lava ‘e ha taha fō vala ʻi māmani ‘o fō ha meʻa ke hinehina pehē. 4Pea toki ʻasi̇́ mai kiate kinautolu ʻa ‘Ilaisiā mo Mōsese ‘okú nau talanoa mo Si̇̄sū.
5Pea pehēange ‘e Pita kia Si̇̄sū, ‟Ko e toki me‘a lelei mo‘oni, Tangata‘eiki, ʻetau ʻi heni̇́, ka mau fokotu‘u ha palepale ‘e tolu, ko e taha mo‘ou, pea taha mo‘o Mōsese, pea taha mo‘o ‘Ilaisiā.” 6Ka ko e lea noaʻia pē ia ʻa Pita, he kuo nau mate he manavaheé.
7Pea ‘iloange kuo malu ʻaki mai kiate kinautolu ha konga ʻao. Pea ongo mai ha le‘o mei he loto ʻaó, ‟Ko hoku ʻAlo ‘ofaʻangá ena. mou talangofua kiate ia.” 8Fakafokifā, ʻi he vakavakai holo ʻa e kau akó, naʻe ʻikai te nau toe sio ki ha taha, tā ko Si̇̄sū toko taha pē ‘oku tuʻú.
9Pea lolotonga ʻenau hifo mei he moʻungá, naʻe fakatokanga ‘e Si̇̄sū kiate kinautolu, ‟ ʻOua te mou talanoa ki ha taha ʻa e me‘a kuo mou mamata ki ai̇́, kae‘oua kuo toetu‘u ʻa e Foha ‘o e Tangatá, mei he maté.” 10Pea na‘á nau talangofua ki heʻene tuʻutuʻuni ko iā, ka na‘á nau faʻa fifili, pē ko e hā koā hono ‘uhinga ‘o e ‟toetu‘u mei he maté.”
11Pea nau fehu‘i ange kiate ia, ‟Ko e hā ‘oku pehē ai ‘e he kau faiako Lao ʻa Mōsesé kuo pau ke tomu‘a ha‘u ʻa ‘Ilaisiaá?”
12Pea tali ‘e Si̇̄sū kiate kinautolu, ‟ʻOku mo‘oni pē ‘e tomu‘a ha‘u ʻa ‘Ilaisiā ‘o fokotuʻufoʻou ʻa e me‘a kotoa pē. Ka ko e hā ‘oku toe ʻasi̇ ai he Tohitapú ʻa e lau ko eni, ‛‘E moʻua ʻa e Foha ‘o e Tangatá ʻi ha ngaahi mamahi lahi, pea ‘e fakasi̇̄tuʻaʻi ia?’ 13Ko hono mo‘oni̇́ ʻeni ‘oku ou tala atú, kuo ‘osi ha‘u ʻa ‘Ilaisiā, pea naʻe fa‘iteliha pē ʻa e kakai̇́ ʻi he meʻa naʻa nau fie fai kiate iá, ‘o hangē ko e meʻa naʻe hikitohi ʻo kau kiate iá.”
Ko e Fakamo‘ui ‘e Si̇̄sū ha Tamasi‘i
(Mātiu 17:14-20; Luke 9:37-43a)
14Pea ʻi heʻenau a‘u mai ki he feitu‘u na‘e ʻi ai ʻa e toenga ‘o e kauakó, naʻa nau sio kuo tuʻu takai kiate kinautolu ha kakai tokolahi, pea ‘oku nau fakakikihi mo e kau faiako Lao ʻa Mōsese.
15Pea ʻi he mamata ʻa e kakai̇́ kia Si̇̄suú naʻa nau ‘ohovale ʻaupito, ‘o nau feleleʻi atu ‘o fakafeʻiloaki kiate ia. 16Pea fehu‘i ange ‘e Si̇̄sū ki he kau akó, ‟Ko e hā ʻa e meʻa ‘oku mou fakakikihi ai mo kinautolú?”
17Pea lea mai ʻa e toko taha mei he kakai̇́, ‟Tangata‘eiki Faiako! Na‘á ku ‘omi hoku fohá kiate koe, he kuo ma‘u ia ‘e ha fa‘ahikehe, pea ‘oku noa ai. 18Peá ka ʻiloangé kuo ‘ohofi ia ‘e he fa‘ahikehé ʻi ha feituʻu, pea ‘okú ne ha ʻaki ia, pea koá hono ngutú, mo fengai‘itaki hono nifó, mo hamu hono sinó. Na‘á ku kole ange ki ho‘o kau akó ke nau kapusi ʻa e fa‘ahikehé, ka na‘e ‘ikai te nau lava.”
19Pea pehēange ‘e Si̇̄sū kiate kinautolu, ‟He toki kakai taʻe tui mo‘oni kimoutolu! Te tau nofo ai pē mo kimoutolu ke a‘u ki ʻafē? Te u kātaki‘i ai pē kimoutolu ke a‘u ki ʻafē? ‘Omi ʻa e tamasi‘i̇́ kiate au!”
20Pea nau ‘omi. Pea ʻi he sio atu pē ʻa e fa‘ahikehé kia Sīsuú, pea ʻai ʻene fuʻu fakatete ʻa e tamasi‘i̇́ ke hamu, ‘o ne tō ai ki lalo ‘o teketekefili holo he kelekelé mo koa hono ngutú.
21Pea fehu‘i ange ‘e Si̇̄sū ki he tamai ʻa e tamasi‘i̇́, ‟Ko e hā hono fuoloa ʻene puke peheé?” Pea naʻe tali, ‟Talu pē mei heʻene kei si‘i. 22Pea kuo tā tuʻo lahi ʻa e feinga ʻa e fa‘ahikehé ke tāmate‘i ia ʻaki ʻene li̇̄ ia ki he afi̇́ mo e vai̇́. ʻAloʻofa mu‘a ‘o tokoni mai, ‘okapau te ke lava.” 23Pea pehēange ‘e Si̇̄sū, ‟Ko e hā ʻa e ʻuhinga hoʻo pehē mai, ‘Okapau te ke lava! ‘Oku malava ʻa e me‘a kotoa pē ki ha taha ‘oku tui!”
24Pea kalanga leva ʻa e tamai ʻa e tamasi‘i̇́ mo ʻene tangi̇́, ‟‘Oku ou tui pē au ia! Ka ke tokoni mai mu‘a ke u ikunaʻi ʻeku ta‘e tuí!” 25Pea vakai atu ‘e Si̇̄sū kuo feta‘ota‘omi mai ʻa e kakai̇́, pea naʻe fekau leva ki he fa‘ahikehé, ‟ʻA e laumālie ʻo e noá mo e tuli̇́, ʻoku ou fekauʻi koe ke ke hū ki tuʻa, pea tapu ke ke toe hū kiate ia!”
26Pea ‘ai ʻa e fuʻu kaila ʻa e fa‘ahikehé, pea naʻe toki fakateteʻi ʻa e tamasi‘i̇́ ‘o mātu ʻaki hamu tetetete ai, pea naʻe toki mavahe mei ai. Pea naʻe hangē ʻa e tamasi‘i̇́ ha taha kuo maté, ʻo pehē ‘e he kakai kotoa na‘e tutuʻu ai̇́, ‟Kuo mate ʻa e tamasi‘i̇́!” 27Ka naʻe toki hanga ‘e Si̇̄sū ‘o puke hono nimá, ‘o ne fokotu‘u hake ia ki ‘olunga.
28Pea ʻi he hū ʻa Si̇̄sū ki falé, naʻe fehu‘i ange ki ai ‘e heʻene kau akó fakaekinautolu pē, ‟Ko e hā na‘e ‘ikai ai ke mau lava ‘o kapusi ʻa e fa‘ahikehé?” 29Pea tali ‘e Si̇̄sū, ‟Ko e fa‘ahinga fa‘ahikehe ko eni̇́, ʻe ʻikai lava ia ʻo kapusi, ka ʻi he lotu pē.”
Ko e Toe Fakahā ‘e Si̇̄sū ʻene Pekiá
(Mātiu 17:22,23; Luke 9:43e-45)
30Pea na‘á nau mavahe leva mei he feitu‘u ko iā ‘o nau fou atu ʻi Kāleli. Ka na‘e ‘ikai loto ʻa Si̇̄sū, ke ‘ilo ‘e ha taha ʻa e feitu‘u naʻa nau ʻi ai̇́. 31Koeʻuhi̇̄ he kuó ne toutou fakamahino ki heʻene kau akó, ʻo pehē: ‟‘E tukuange ʻa e Foha ‘o e Tangatá ki he kakai̇́, pea te nau tāmate‘i ia. Pea ʻi he ʻaho leva hono tolu mei ai̇́, te ne toetuʻu mei he maté.” 32Ka na‘e ‘ikai ke mahino kinautolu ʻene laú, pea naʻa nau manavahē hano toe ʻeke ange.
Ko hai ‘oku Lahi Tahá?
(Mātiu 18:1-5; Luke 9:46-48)
33Pea na‘e ʻalu ʻa Si̇̄sū mo ʻene kau akó ki Kāpaneume ki hono ʻapi̇́. Pea fehu‘i ange leva ‘e Si̇̄sū ki he‘ene kau akó, ‟Ko e hā ʻa e me‘a na‘á mou feki̇̄hiaki tuʻu mai ai he halá?” 34Ka na‘á nau fakalongolongo pē. He ko ʻenau feki̇̄hiaki̇́, pē ko hai ‘oku lahi̇́.
35Pea toki nofo hifo ʻa Si̇̄sū, ʻo ne ui mai ʻa e toko hongofulu mā uá. Pea naʻe pehēange kiate kinautolu, ‟Ka loto ha taha ke ne hoko ko e tuʻukimuʻa ʻiate kimoutolu, kuo pau ke ne toʻo ʻa e tuʻunga māʻulalo tahá, ʻo ne nofo ko e sevāniti ki he kakai kotoa pē.”
36Pea toʻo ‘e Si̇̄sū ha ki‘i tamasi‘i ʻi honau lotolotongá, ʻo ne fua hake ia, pea naʻe toki pehē ange kiate kinautolu, 37‟Ka ai ha taha te ne tali lelei ha taha he fānau iiki̇́ ni koeʻuhi̇̄ ko au, ko ʻene tali ai pē ia aú. Pea ko ia te ne tali lelei aú, ‘oku ‘ikai ngata pē he‘ene tali aú, ka ‘okú ne tali ai pē foki mo ia na‘á ne fekau‘i mai aú.”
Ko e Kau mo Si̇̄sū
(Luke 9:49-50)
38Pea pehēange ‘e Sione kia Si̇̄sū, ‟Tangata‘eiki Faiako, na‘a mau sio ki ha toko taha ‘okú ne kapusi tēvolo ʻaki ho huafá, pea mau ta‘ofi ia he ʻoku ʻikai te ne muimui holo ʻiate kitautolu.”
39Kae tali ‘e Si̇̄sū kiate kinautolu, ‟‘Oua te mou ta‘ofi iá. He ‘oku ‘ikai ha taha te ne fai ha mana ʻi hoku hingoá pea toe tafoki hake ‘o laukovi kiate au. 40Ko ia ‘oku ‘ikai te ne fakafepaki kiate kitautolú, ‘oku kau ia mo kitautolu. 41Pea ‘ilonga ha taha te ne ‘oatu ha ipu vai pē koeʻuhi̇̄ ko ho‘omou kau mo aú, kuo pau ke fakapale‘i ia.”
Ko e Ngaahi ʻAhi‘ahi ke Fai Angahala
(Mātiu 18:6-9; Luke 17:1-2)
42Ka ‘oka ai ha taha te ne ‘ai ke fai angahala ha ki‘i tamasi‘i pehē ni, ʻe sai ange ki ai hano haʻi ha fuʻu maka momosi uite ʻi hono kiá ‘o ne toki hopo ki he moaná. 43-44Ko ia ai, ka ‘iloange kuo fakaangahalaʻi koe ʻe ho nimá, pea tuʻusi ho nimá! He ‘e sai ange ho‘o ʻalu nima taha ki he moʻui̇́ ʻi ha‘o ʻalu nima ua ki Heli, ʻa ia ʻoku ʻi ai ʻa e afi ‘oku ‘ikai matāmate‘i̇́. 45-46Peá ka ‘iloange kuo fakaangahalaʻi koe ʻe ho va‘é, peá ke tuʻusi ia ʻo liʻaki. He ‘e sai ange ho‘o hū ve‘e taha ki he Pule‘anga ‘o e ‘Otuá ʻi ha‘o ʻalu ve‘e ua ki Heli. 47Peá ka ‘iloange kuo fakaangahalaʻi koe ʻe ho matá, peá ke kape‘i ia ʻo liʻaki. He ‘e sai ange ho‘o hū mata taha ki he Pule‘anga ‘o e ‘Otuá ʻi ha‘o ʻalu mata ua ki Heli. 48He ‘oku ‘ikai mate ʻa e ‘uangá he feitu‘u ko iā, pea ‘oku ‘ikai foki mate ai ʻa e afi̇́.
49Ko e toko taha kotoa pē ʻi ai ‘e fakamāsima ʻaki ʻa e afi.
50Ko e me‘a ʻaonga ʻa e māsimá. Ka ‘oka mole hono konokoná, pea ‘e toe fakakonokona ia ʻaki ʻa e hā? Mou ‘ai ke ʻi ai ha māsima ʻi ho‘omou moʻui̇́, pea mou nonofo melino.
Избрани в момента:
Ma‘ake 9: TCNT
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Tongan Contemporary New Testament © Bible Society of the South Pacific, 2011.