SOERA MOZE II. FAZA 22.
FAZA 22.
I. Amachoita ba wanagõ ba na tefaraʼoe hadia ia. II. Ba horõ bõʼõ ba ba wangeboea hare ganaʼa ba ba zalacha.
1I. Na so zanagõ saw̃i, ba ma biribiri, ba na itaba ba ma iʼamawa, ba lima ngaʼeoe saw̃i ibeʼe fangali zi sageoe ba õfa ngaʼeoe biribiri fangali zi sageoe, ogaoeta (Sam. II. 12, 6. Amaed. 6, 31. Loek. 19, 8). 2Na teraʼoe zanagõ ba wanõi jomo, ba na laboenoe, ba tenga nilaoe balõ daʼõ. 3Ba na ba zi no moloeo zi manõ ba nilaoe balõ. Sanagõ, ba isalahini zinagõnia, ba na lõ chõnia, ba niʼamawa ia salahi nitagõnia andrõ. 4Na tesõndra aoeri ba chõnia nitagõnia, he saw̃i, ba he kalide, ba he biribiri, ba sagesageoe tõ ifoeli, ogaoeta. 5Na so zi doedoe oerifõnia ba mbenoeania, ba ma ba kaboe nagoe chõnia, ba na lõ iʼõli, na laʼā zinanõ ba nowi bõʼõ, ba isalahini boea zinanõnia, balazi waʼabõlõ mboea; ba na ahori laʼā zinanõ ba nowi, ba fondrege zi sõchi mboea nowinia ba boea ba kaboe nagoe chõnia ibeʼe salahi. 6Na so galitõ, na achozi goʼo ba na iraʼi mbasitõ ba na achozi nowi, ba isalahini zachozi andrõ samobõrõ alitõ mege. 7Na so zameʼe ba nawõnia niʼirõʼõ, anaʼa, ba ma aja, ba na tetagõ ba nomo daʼõ, ba ifabali mbõlinia sanagõ andrõ, na tesõndra ia. 8Ba na lõ moesõndra zanagõ, ba jamõi fõna Lowalangi zochõ omo, jamõi ba hõloe, wa lõ nibabajania ochõta nawõnia andrõ. (F. 21, 6). 9Na so hadia ia zi taja, he saw̃i, ba he kalide, ba he biribiri, ba he baroe, ba he gofoe hadia ia zi taja, ba na so zangoemaʼõ: daʼõ ia! ba niʼohe fõna Lowalangi hoehoeora, ba niw̃aʼõ Lowalangi si so sala, ba ifabali wanalahini chõ nawõnia. 10Na so zameʼe nikoebaloi nawõnia kalide, ba ma saw̃i ba ma biribiri, ba ma hadia ia goerifõ, ba na mate daʼõ, ba ma na gõna hadia ia, ba ma na teʼoloiʼõ, si lõ iʼila niha bõʼõ, 11ba feʼamõi ba hõloe chõ Jehowa wangetoeʼõ hoehoeo, ma no noemalõ dangania ba gochõta nawõnia andrõ; ba na itehe daʼõ sochõ, ba alacha lõ iʼalī. 12Ba na no latagõ chõnia, ba iʼalī chõ zochõ. 13Ba na no tesasawi [ba goetoe ndroeʼoe], ba na iʼila iʼoromaʼõ ngamohi, ba alacha lõ iʼalī nisasawi andrõ. (Moz. I. 31, 39). 14Na so zombalõ oerifõ nawõnia ba na gõna hadia ia ba ma na mate, ba zi lõ sochõ jaʼia, ba iʼalī. 15Ba na ba zi so zochõ, ba alacha lõ ibeʼe wangali si samõsa; na niwawalõ ba no itema wombalõ.
16II. Na so zamowõhõ ono alawe, si lõ moefohoe na, na oroedoe ia chõnia, ba ibeʼe mbõwõ. (Moz. V. 22, 28). 17Ba na ha sambalõ lõ itehe amania, ibeʼe chõnia, ba jamoetoelõ wirõ, ndrohoendrohoe mbõwõ nono alawe. 18Ira alawe si fakelemoe, ba bõi orofi. (Moz. V. 18, 10). 19Dozi soroedoe ba goerifõ, ba niboenoe. 20Na so zamozoemange adoe, ba tenga ha Jehowa, ba nihori (Moz. V. 17, 3—5). 21Niha bõʼõ, ba bõi fakao ba bõi falangõgõ; noa sa niha bõʼõ gõi ami ba danõ Miseraiji mege. (Moz. III. 19, 34). 22Lacha mbanoea ba si lõ ama si lõ ina ba bõi manõ mifakao. (Jes. 1, 17). 23Na õfakao ia sa, ba na iʼangarõfi li ndraʼo, ba lõ zi lõ oefondrondrongo wangarõngarõnia, 24ba tesao dania wõnoegoe ba oefaboenoeʼõ ami siʼõli, ba tobali lacha mbanoea ngambatõmi ba si lõ ama ndraonomi. 25Na õbeʼe nifalali ganaʼa ba mbanoeagoe si noemana, si so ba ngaimõ, ba bõi sangeboea hare ndraʼoegõ chõnia; bõi mifohare chõnia. (Moz. V. 23, 19. Sin. 15, 5. Hez. 22, 12). 26Na õhalõ gade mbaroe nawõoe, ba irege aechoe loeo, ba õfoeli chõnia. (Moz. V. 24, 13). 27Awai sa gambala mbotonia, ha baroenia andrõ; hadia saʼae ibeʼe ambalania, na mõ rõ ia? Na iʼangarõfi li ndraʼo, ba oefondrondrongo chõnia, me no sahachõ tõdõ ndraʼodo. 28Bõi tandraw̃aisi Lowalangi ba bõi elifi zatoea mbanoeami (Hal. zin. 23, 5). 29Si no fahõna chõoe ba si sõchi nõsi mboea nagoe chõoe, ba bõi zi lõ õloeloe. Si aʼa nonooe matoea, ba õbeʼe chõgoe. 30Ba si manõ gõi ba zaw̃ioe ba ba mbiribirioe: fitoe bongi jaso chõ ninania, ba na aefa daʼõ, ba õʼohe chõgoe. (Moz. III. 23, 27). 31Ja niha niʼamoniʼõ ami chõgoe. Ba õsi nisasawi goetoe ndroeʼoe ba mbenoea, ba lõ tola miʼā, mibeʼe õ nasoe. (Moz. III. 19, 2. Fet. I. 1, 16).
Избрани в момента:
SOERA MOZE II. FAZA 22.: NIA
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.