San Marcos 5
5
Jesús‑ni bebeabie espíritu satsa yu'u lati ttu nubiyú
(Mt. 8:28-34; Lc. 8:26-39)
1Beteba Jesús‑ni lenie ka benne rudhetinieha lo indatooha nna bisinke daka lo yu ge ka benne Gadara. 2Tti ugwadie lo barcuha nna biria tteba ttu nubiyú yu'u ttu espíritu satsa latini, biriana ata se'e ka baa ge ka benne yattiha, nianna tti betetsána Jesús‑ni. 3Lhe'e ka baaha‑ba reya'an nubiyúha. Nurula ridaana uxxikana na, niruba len cadena. 4Ixe lidú chi bexxikake ka ni'a náni len cadena, ttaka richú ttebana ka cadenaha nna niruba ttu benne a ridee loni. 5Rela resába rekina iki ka i'iyaha lhe lagwi ge ka baaha ribesi'ana lhe ruingaba gwe latini len ka íyya lhe. 6Idittuli daa Jesús‑ni bilenne, nianna biresu ttebana gwatsáne nna bedú xibini arloe. 7Nianna tti unnena idisa, rane:
―¡Bittu etega'a gelu len neti, Jesús Xi'in Tata Do Yebaa benne ra xxeni leeha! ¡Rinnabaa lenlu, benchi lo ni'a ge Tata Do Yebáha bittu ugwelu neti elha disa!
8Aníha rana kumu Jesús‑ni chi unnebie, ree:
―¡Espíritu satsa, beria lati nubiyú‑ni!
9Nianna tti unnaba tise na nna ree na:
―¿Bí lálu?
Lana nna bekabina, rana:
―Legión‑ba lá neti, kumu ixe ri'itu raka.
10Nianna unnaba ditiba nubiyúha len Jesús‑ni kini abittu ebeabie ka espíritu satsaha latini nna odelhe kana attu ta subi. 11Gaxxaba kwe'e i'iya do niha yu'u ixeru ka kuchi, yu'ukana go. 12Laxkala ka espíritu satsaha nna unnaba ditibakana lenie, rákane:
―Bedhelha ri'itu ata yu'u ka kuchi‑na, kini eta'atu latikani.
13Jesús‑ni nna gwa begwelhabe kana. Nianna beria tteba ka espíritu satsaha lati nubiyúha nna gwata'akana lati ka kuchiha. Ttiba ttu chupa mili ka kuchiha raka. Ka nuha nna biria resu ttebakana gwatsettikana ro'o ttu íyya daa niha nna biginnikana lhe'e indatooha nna ugwapikana inda.
14Ka nu se'e gweyú ka kuchiha nna boxunni ttebakana deyyakana gwattixxi'akana nuha lhe'esiha lhe utixxi'akinna ka benne se'e lhe'exxi itúba ka niha. Ka benneha nna biria ttebake gwalannike bixa nuha chi uka. 15Tti bisinke ata du Jesús‑ni nna bilákanie nubiyú beria ka espíritu xxegwiha latini, tseba chi bedo ikini lhe chiba nuku xoni dona. Nianna yalhá usikanie. 16Ka benne bilákanie nu gwate nubiyú uyu'u espíritu xxegwi latiniha lhe nu gwate ka kuchiha lhe, ka benneha nna utixxi'agabakanie adí ka benne. 17Nianna tti unnaba ditibake len Jesús‑ni kini eriabie lo yu gekeha nna eyye attu ta subi.
18Atti beyapi Jesús‑ni lo barcuha nna nubiyú beria espíritu xxegwiha latini nna unnaba ditibana lenie kini ugwelhe na sanalhane. 19Ttaka lee nna labí uka lebie nna ralee na:
―Beyya lisiluha ata se'e ka benne geluha, nna utixxi'a kanie iyá nu chi ben Tata Xisiha lenlu lhe utixxi'a kanie gasina gwatua lebie lu.
20Nubiyúha nna bedá ttebana deyyana. Nianna udulo ttebana utixxi'ana itúba daka Decápolis ge iyá nu chi ben Jesús‑ni lenna, nna iyába ka benne binake nuha nna bebanabakanie.
Jesús‑ni beyonie ttu benne nuila lhe beyoingabe xi'iniunná Jairo‑ni lhe
(Mt. 9:18-26; Lc. 8:40-56)
21Iki de chi beyapi Jesús‑ni lo barcuha nna betebie lo indatooha, besine ro'oni daka nu reha. Nianna bedetupa tteba ixe juisiru ka benne kwe'ebie. Labie nna ro'o indaha‑liba udúe. 22Nianna tti bisin ttu ka nu baninna yo'o ata rudheti ka benne Israel‑ni ka tisa ge Tata Do Yebáha. Nubiyúha lána Jairo. Tti bilenna Jesús‑ni due niha, nianna biyachuna nna bedú xibini arloe, 23nna unnaba ditibana lenie, rane:
―Nuila to kiaha chi tteba gatti bi'iniha. Uyáchi nna ixxua nálu ikibi kini eyakabi nna abittu gattibi.
24Nianna udá tteba Jesús‑ni die lenna.
Ixe juisiru ka benne danalhake bie nna rukí ya'anibake bie. 25Lagwi ge ka benne danalhaha sela ttu benne nuila chi anka tsi'inu (12) ida ridobie reni. 26Yalhá chi gwatebie ugíe lo ixeba ka nu runi ramedi nna chiba beyá iyába nu tee gebie betse'e loobie. Ttaka labí reyake; rutse'e loo nna adíla diana rudialhana gebie. 27Tti bine ge Jesús‑ni, nianna diabie sele lagwi ge ka benne danalhaha, nianna tti ubige daka kwe'e Jesús‑ni gwattáne ro'o lari nuku benneha, 28kumu rakanie: “Kwadiba ro'o xoe sattánaa nna gweyakabaa.” 29Laxkala atti gwattáne ro'o xo Jesús‑ni nna loora tteba udú sii reni ridoeha, nianna ute danie deki chiba beyake. 30Jesús‑ni nna tti ute danie deki nu tsitsi ra leeha chi beyoinna ttu benne, nianna tti bodeki loe rulannie lo ka benne danalhaha nna ree ka benneha:
―¿Núnni chi betettanna ro'o xoa‑ni?
31Ka benne rudhetinieha nna ráke bie:
―Sa ralu, ¿núnni betettanna ro'o xoa? Ki gwa yu xeabalu aníli rukí ya'a ka benne ri'i.
32Ttaka Jesús‑ni nna rulannibe abi'iba kwe'ebie kini ilánie nuxa nuha gwattána na ro'o xoeha. 33Benne nuilaha nna kumu yube nu chi ukaha, aníha uka nna itú rasibanie lhe itú rixidibe ubige nna bedú xibie arlo Jesús‑ni, nianna tti utixxi'anie bie iyá tte. 34Labie nna ree benne nuilaha:
―Xi'ini to, de ugía lelu deki gwadaabaa eyonia lu, de nuha nna gwa beyakabalu. Nnanna nna xen su lasi beyya. Chiba betúa nu ridakalu‑na.
35Sa dula Jesús‑ni rinnebie, ttiru chi bisia ka nu daa lisi Jairo‑ni, rákana Jairo‑ni:
―Chiba utti xi'iniunnáluha. Bitturu udo doelhalu maestru‑ni ki dhabie.
36Ttaka Jesús‑ni labí bedo nage ge nu ra ka nuha, nianna ree Jairo‑ni:
―Bittu gasinlu; sun tteba ugía lelu.
37Nianna udá ttebe die nna lanúru nu begwelhe tsia lenie. Sunruba Pedro‑ni lhe Jacobo‑ni lhe Juan betsi Jacobo‑ni chebie. 38Tti bisinke ro'o yo'o ge Jairo‑ni, nianna bilánie chi risatsa ka benne lhe bilánie ka benne ribesike lhe relen xxattakanie lhe. 39Atti chi ute'e lhe'e yo'oha nna ree ka benneha:
―¿Beaka análi ruinle lhe beaka ribesi xxattale lhe? Nuila to‑ni labí utti bi'in‑ni, te'adhiba bi'in‑ni.
40Ttaka ka benne se'e niha, nna ruxisilake gebie. Lee nna nu benlee nna bebealee iyábake, nianna tti ute'e ata tee nuila toha. Ute'e len ka tata nan gebiha lhe len a tsunna ka benne cheeha lhe. 41Nianna tti bedaxxue ná nuila toha nna unnebie, ree:
―Talita kumi. ―Talita kumi dienna innána: Nuila to, neti rulisaa lu, beyadha.
42Looraha tteba beyadha nuila toha nna bedá ttebabi, kumu chiba ankinbi tsi'inu (12) ida. Ka benne se'e niha nna uka tébakanie lhe yalhá bebanakanie lhe. 43Ttaka Jesús‑ni nna bodha'an tsitsibe ree ke anuttu nu kixxi'akanie ge nu chi ukaha lhe rágabe ke:
―Gwalugo nuila to‑ni yetta.
Избрани в момента:
San Marcos 5: zae
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2014, Wycliffe Bible Translators, Inc. All rights reserved.