HAOKAPHOK 8
8
Tara̱ Katheng
1Kha Varena marikhonglungli khalei Noah, kala sha̱kei eina sāyur saikorali phaningunga. Kala Varena okathuili masi phanngasakta tara̱ thengmamanhaowa. 2Kathuka ura̱la kala kazingramwui charfala saphinmihaida kazing maro ngasakthuwa, 3kala okathuili tara̱ ngahap mamānhaowa. Zimiksho shākha hangphangāthangwui thili tara̱ ngasunhaowa; 4kachāng kashinewui zimiksho tharāda kashinethang marikhong chi Ararat phungreili tāngasāma. 5Kachāng tharā makāshungranglakha eina tangda tara̱ ngahapmamānda kachāng katharāwui zimiksho kharethang phungreitonbing theiphokhaowa.
6Zimiksho hangmati thangwui thili Noahna ana sāsang kahai charfa chi shoyanga, 7kala hangkhāyur akha chihoi; kala vānao china okathuitungli tara̱ mathengranglakha eina tangda yongung yongvai. 8Chiwui thili tara̱ katheng makatheng yangkhavai nāsha̱ akha chihoi; 9kha nāsha̱ chi pa̱khavaipam maleithuda marikhong chili latungrāsai; kaja ngaleitungli tara̱ mathengchaorangsai. Chieina apāng tāngshokta vānao chi khuilaga marikhonglungli sangluihaowa. 10Ana shinithang ngarailaga nāsha̱ chi chiholuishita; 11kala nāsha̱ china chithang ngazin ali hanunga, kala yanglu, nganaozaonao eina olivenā akha khamorli ngatamsai; chieina tara̱ thenghaira da Noahna theihaowa. 12Chiwui thili ana shinithang shānglaga nāsha̱ chi chiholuishita; kha malatungluithuwa.
13Noahwui zingkum shātharuk apā akhawui kachāng khare kala zimiksho kharethang ngaleitungli tara̱ thengchenghaowa; kala Noahna marikhongwui akhum khuishokhailaga yanga, kala yanglu, ngaleitung thenghairasai. 14Kachāng kakhanewui zimiksho maga̱da kashinethang ngalei thenghaowa. 15Chieina Varena Noahli hānga, 16“Na, napreiva̱, nanaomayara ngarā kala athumwui preiva̱ ngarā marikhongwui eina tungserlu. 17Asā khavai kharing yur, vānaoyur, ngaleitungli ngarikazata yur, nali khangaso saikorala thānshokserlu, chieina okathuili athumna nao kachungkha pharāsangda okathuili athei matheida mayāsangra.” 18Chieina Noahna apreiva̱, naomayara ngarā kala athumwui preiva̱ ngarāli ngasoda shoka. 19Sāyur kachiva̱, ngarikazat yur kachiva̱, vānaoyur kachiva̱ kala okathuili kharinga yur saikora marikhongwui eina shoksera.
Noahna Hanphut Kasā
20Chieina Noahna Proholi hanphut akha sākhuida kathara sāyur kala vānaoyur kachiva̱ khuida rikkatā kachigat akha sai. 21Kala Prohona nganamkaphā anganam chi nganamlaga Prohowui ningli hānga, “Ara ina ngalei hi miwui vang eina makhonshiluilakmara, kaja miwui chukkhamaja nganuilakhawui eina thuida makaphā makhayāmānga; kala kharing yur kachiva̱ ina shimān khangasak chi ara ina masāluilakmara. 22Okathui leilakha eina tangda khayao eina kahāt, kasik eina kasā, si eina lum, ngashun eina ngayā mangasāmmara.”
Избрани в момента:
HAOKAPHOK 8: TANGBSI
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.