Matayu 15
15
Kaisale Wane Don Kine Tewekkei Wane, Yesuŋo Ra Qelaŋange
1Naso yewao Parisi so ra rokop don Kito ebo ebon natne, eŋe Yerusalem ŋine sariu paki, Yesu qesonka rakoi. 2“Kine onoka wane geŋane dokoŋone eŋe ŋenane aso ŋabokopze eŋane don numa ŋebongoi, eya mi tewekmami? Onoka wane eŋe numa maine mogare meteene mi saukeu paki, ŋara ma ne okanmami?”
3Yesuŋo mainge edane rake. “Pakimo ŋine onoka wane Kaisale wane ra rokop don eya ŋadekkau paki, ŋinŋine don numa eya mogare ma gemami? 4Kaisaleŋo iwa yale rake, ‘Ge magaŋone so nagaŋone eweetne kitokene,’ So rake, ‘Ŋei mane eŋe naga magaine erane don borikine rayake, eŋe siluŋ qeu seukeyake.’ 5Ŋo ŋido kito edanmami, yemo ŋei mane eŋe yeye mane mageyakeo, yemo eŋe magaine me nagaine ere maine eyaŋo qesiŋotki rap, ŋo eŋe siluŋ ramaike, ‘Iwa mo Kaisale wane biŋek qekole,’ yemo ere yaup isi-osiyake, ŋo yemo eŋine biŋek. 6Numa yaline eyamo eŋe magaine ewine mi kitomaike, ŋine yale okanbi paki, Kaisale wane don mapapkau paki, ŋinŋine don numa eya teweke mogare ari okanmami. 7Ŋine isi ŋei nau! Propet Isaiya eŋe don koboboine ŋinane iwa yale rake! 8‘Kaisaleŋo ramaike, ŋei ŋerep iwa eŋe pieneŋoka mawa nanmami, ŋo weteneŋo yemo kakaknane more eri abaran gemami. 9Onoka wane eŋe kepe ŋeiŋo don numa mot mole, eya tewekeu paki ra okanmami. Iwa Kaisale wane ra rokop don. Eŋe yalineŋo na mawa nanbi rap, yemo mi menaŋgi rap, onoka wane eŋe mi detluk-nanmami, eya wane.’ ”
Kine Kine Iwaŋo Maki Ŋei Mane Eŋe Wetine Sigile Okanmaike
10Yesu eŋe ŋei ŋerep magu edoraki, eŋano ariu edane rake, “Ketŋine motpi paki detlukeu, ŋine misuk ŋaŋaekei! 11Ŋei mane eŋe nene kine kine aŋainoka neki kotino wete okanmaike, eyaŋo maki kotine mi sigile okanmaike, midakaka! Kotino don kine kine qotkoine wetke mage more, koso aŋaineŋo raki saketmaike, eyaŋoka maki ŋei eya kotine sigile okanmaike.”
12Pakiso dokoine eŋe eyaka sari qesonka rakoi, “Ge don iwa ranom, Parisi eŋe dere worik okanmami, eya detmaine?”
13Yesuŋo edane rake, “Waet kine kine korop Magane qeliwo gemaike, oŋo mi ebotke, eyamo baŋ kinerop lokak-wareyake, 14eŋane ra more dere mezet mi okanbi, ŋetne magu eya eŋe deene pili pilikine, eŋe yalinane de pilik maneŋo de pilik mane iwenkaki, ari eret-narek lom maneo ketmamik.”
15Raki Petoroŋo rake, “Don naŋengo ramaine, eya wane kine ŋedannom detŋem.” 16Yesuŋo edane rake, “Ŋine yaleka wet dereretŋine manerop natne eŋane wet dereret mane mi yuwan-kamaike. 17Ŋine mi detmami me? Kine kine mane ŋei maneŋo aŋainoka neki, wete koba ŋino ketmaike, paki koso kainoka tetki saket arimaike, yewaŋo ŋei wetine maki mi sigileyake. 18Ŋo ŋei kotoo ŋine kine kine wakongi paki sari aŋao-ka saket okanmaike, eyaŋo maki ŋei mane wane wet kotine so dereret mali malip so asu oŋa oŋa eya mo korop-ka di kito more panamangi paki sigile okanmaike. 19Onoka wane eŋine kotino ŋine borikinane dereret eya wetkeki, paki okangi, eyaŋo tebaka ari birakaki kawali engu seuseu maratka okanmaike, so ŋerep mane ma qelige mane mama, so bailalaŋ okane, ŋerep yau yaup ebu ebu, so aboŋ kobu mama, isi don rara, so gube qesat don natne edanikei. 20Kine kine eya, edo mau ŋei mane wane wetine mo korop di kito okanmaike. Ŋo eŋe yale ramami, mete mi sau sauk so yaup ŋara ma nene, eyaŋo maki ŋei mane wane wetine mi sigileyake, eya yemo weneŋ midaka so mida togogole.”
Kanan Qelaŋ Ŋerep Maneŋo Yesu Detlukka Malipkake
21Yesu eŋe mat eya qelige more, kepe sai mane Tire so Sidon mat osino pake, eya arike. 22Kanan qelaŋ ŋerep mane eŋe kepe eyao geke, oŋo Yesu wano sariki paki, ra arok okanka rake, “Suwaine, Dawit wane qerakine, Kaisaleŋo biragangi ketkone! Ge naŋane wetŋone borikep! Naŋane borasone eŋe asu qotkoineŋo kotino pa matalikaki, wikile zok detmaike.”
23Yale raki, Yesuŋo don mane mi olatke, eŋine dokoine eŋe eŋano sari raka rakoi, “Talekanom eŋe arikep! Eŋe ŋenane ŋadezo ra aroke sarimaike!”
24Yesuŋo mainge rake, “Na lama yeo me yeo ket ari gemami, Israel ŋei ŋerep magu eŋaneka weku talenangi ketkole.”
25Raki ŋerep eŋe eyaka sari osino wawet qe Yesu wane kino tamge more rake, “Suwaine, siluŋ mapik nannom!”
26Yesuŋo olatke, “Ŋerep ŋene maine Israel medep eŋane ŋara eya ma more, koso kasi eŋano qakŋem ariki nene, eyamo mi menaŋmaike.”
27Ŋerepŋo mainge rake, “Suwaine, eya welekatne, ŋo siluŋ kasimze eŋe welakopene eŋane zakeo ŋine ne yuwankau, sisinemde ketki eŋe weneŋ ne okanmami.”
28Eso Yesuŋo mainge ŋerep olale rake, “O ŋerep, ge mali malipŋone kakapa! Ge onokaka wane ganmaike, paki ramaine, yale baŋ okan-ganiyake. Eso naso eyaka borasine menaŋkake.”
Yesuŋo Ŋei Loutne Ma Menaŋonge
29Yesu eŋe mat eya qelige more, Galili doku namuŋ eya mogare arike, eŋe ari meŋo waki paki, pese ket metke. 30Metki, ŋei ŋerep magu suwaine eŋe eŋano sarikoi. Eŋe kiye pekinene qoiqoine, depilik, kiye meteene seuseune, don mi raraine, so zoma kine kine natne loutne weneŋ ebu sari, Yesu wane kino biraongoi, pakiso Yesuŋo ebuki menaŋ-warekoi. 31Ŋei ŋerep eŋe welelepkekoi, onoka wane eŋe onbi donene mi raraine edo don ramaŋkoi, kiye meteene seuseune eŋe menaŋmaŋkoi, kiye wawetene me pekinene qoiqoine eŋe numa gegeene wakonmaŋke, de pilik eŋe deene potmaŋkoi, eso eya wane eŋe Israel eŋane Kaisale mawakakoi.
Yesuŋo Ŋei Ŋerep 4,000 Ŋara Gumeonge
32Yesu eŋe dokoine edoraki ariu edane rake, “Na ŋei ŋerep iwa eŋane wetne borimaike, onoka wane eŋe narop kaiwe karewe gemami paki, ukude ŋara mane mi nemami. Na ŋara mi gumeon gumeon yaup taleonŋem arikei wane mi nanmaike, onoka wane eŋe mateno arikei wane, ari numao zonomene midayakane.”
33Dokoine eŋe olale rakoi, “Ŋene ŋara sai togolo iwa maratka more, ŋei ŋerep magu iwa gume-onŋem, maine rokop-oniyake?”
34Yesuŋo edane rake, “Ŋine ŋara darap magemami sikan-nanbi!” Eŋe olale rakoi, “Kasap sewen so zawon mide nigatne etkemde ma gemaine.”
35Eso Yesu eŋe mo eyaka ŋei ŋerep magu eya ra-ongi, kepo dara wuruk pese ket met warekoi. 36Pakiso, eŋe kasap sewen so zawon eya maki paki, Kaisale bakomine kito more, mapokki waki dokoine ebonge, eso dokoine eŋe ma more damo qe, ŋei ŋerep ebon-warekoi. 37Eŋe korop neu ŋatene qewareke, dokoine eŋe neu wokitne metke, eya mau ket rosa sewen watkeke. 38Ŋei ŋara nekoi, eŋane zaleene 4,000, ŋerep so medep nigatne yemo mi dapot-ongoi.
39Eso Yesu eŋe mo eya ŋei ŋerep taleongi, mateno ari wareu, eŋine seki koto waketki, pakiso Magadan kepe sai eya arike.
Избрани в момента:
Matayu 15: onsNT
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2012, Wycliffe Bible Translators, Inc. All rights reserved.