Keriben 19
19
XIX
O Dešueñato Šero
1Avl’as auka, kaj kana o Apolos ehas andro Korintos, o Pavlos gēl’as maškar e uprūne phuva paš o pāñi, avl’as andro Efesos, he rakl’as varehave Sikl’ārden.
2He phend’as lenge, Tumen, kana tumen pat’anas, na l’il’an pales o devleskro Vōd’i?
3He phend’as lenge, Har sanas tumen bolde? He jon phende, Andro Janoskro bol’ipen.
4Pales phend’as o Pavlos, O Janos čāčes bolelas odole manušen, have pes laǧanas, he phend’as e manušenge, ta te pat’an odoleske, havo avela pala leste. Odova ehi o Kristos.
5Kana adava šunde, ehas bolde andra mre Rajeskro Ježišiskro Nav.
6He kana o Pavlos thode peskre vasta pre lende, o Devleskro Vōd’i avl’as upral lende, he vakerenas čhibentsa, he sikavenas so avela.
7He ehas auka dešuduj manuša jekhethāne.
8He gēl’as andri biboldengri kangeri, he vakerelas trin čhon bi‐e‐dar. Vakerelas mamuj lende pal odova, so perel ke mri Devleskri Phuv, he zorāl’il’as lengro jilo.
9Kana varehave terd’ile mamuj leste, he na pat’anas, he vakerenas bilāčes pal odova drom anglal o but manuša, gēl’as avri lendar, he ulad’as e Sikl’ārden, he vakerelas sako d’ives andre Tiranoskri škola.
10He auka ehas duj berš, he savore, have bešenas andri Azia šunde e Rajeskro Ježišiskro Lav, o bibolde h’o Junāne.
11He o Devel kerelas but biǧāndle būt’a e Pavloskre vastentsa.
12He lenas lestar poxtane vaj nakheskre poxtanōre, he anenas len ko nasvāle, he o nasvālipen he o bilāče vōd’a gēle avri lendar.
13Pales, varehave bibolde, have phiren pro drom, xoxāne Devleskre Manuša, l’ile te vakeren e Rajeskro Ježišiskro Nav upral odolende, have ehas e bilāče vōd’entsa, he phende, Amen vakeras tumenge a bāra sovl’aha prek’o Ježišis, pal havoneste vakerel o Pavlos.
14He ehas efta čhāve, he lengro dad ehas o Skeva, biboldo, najbāreder manuš maškar o rašaja, he jon auka kerde.
15He o bilāčo vōd’i phend’as pāle, E Ježišis prinǧārav, h’e Pavlos prinǧārav, uva tumen, ko san?
16He o manuš, so ikerelas o bilāčo vōd’i, xut’il’as pre lende, tsrdind’as len tēle, he ehas zorāleder lendar, auka kaj jon prastanas avri oda kherestar, nange, he mārde andro ǧido mas.
17He savore bibolde he savore Junāne have bešenas andro Efesos ǧānenas pal ada būt’i, he i dar pēl’as pre savorende, h’e Rajeskro Ježišiskro Nav avl’as bāreder.
18He but manuša, have pat’anas, avle, he laǧanas pes, he sikavenas peskre keribena.
19He but odolendar, have kerde biǧāndle būt’a, ande peskre l’ila, he thārde len anglal savore manuša, he ginde ketsi lōve ehas o l’ila. Ehas panǧ‐var‐deš deš‐šel rupūne lōve.
20Auka mre Devleskro Lav bāril’as but, he ehas zorāleder.
21Pales, kana ada būt’a ehas kerde, pēl’as o Pavlos pro vōd’i, kana ǧalas maškar i Makedonia h’i Axaja, te ǧal undri Jeruzalema; he phend’as, Kana avava odoj, me pales kamav te dikhav i Rima.
22Auka bičhad’as andri Makedonia duje manušen odolendar, have kerenas vaš leste, e Timoteos h’e Erastos, uva jov korkoro bešelas varehave čhon andri Azia.
23Akanate ehas odoj but xanǧārde viki.
24Jek manuš, so bučolas Demetrios, rupeskro, havo kerelas rupūne kherōre vaš i Diana, delas but lōve e būšengrenge.
25He kediñas len jekhethāne, he odole būt’engren, have kerenas auk’ada būt’i har jon, he phend’as, Raja, tumen ǧānen, kaj ada būt’atar amen sam barvāle.
26Tumen dikhen he šunen, har na korkoro andro Efesos, uva šaj phenes, maškar savori Azia, adava Pavlos zorāl’il’as but manušen andro jilo, he len parud’as, he phenel, Nāne devla, so ehi kerde e vastentsa.
27Nāne korkoro i dar, kaj ada amāri būt’i avela či; uva i bāri Dianakri Kangeri šaj avela ǧungal’i, he lakro bāro šukaripen šaj avela či. He savori Azia he savori phuv mangel pes ke late.
28He kana šunde akada lava, ehas pherde a xol’aha, he dine viki, he phende, Bāri ehi i Efesoskri Diana.
29He savoro foros ehas xanǧārdo upre, he kana l’ile e Gajos h’e Aristarxos, manušen kathar i Makedonia, have kerenas būt’i e Pavloha, prastanas jekhethāne andro teatros.
30He kana o Pavlos kamelas te ǧal andre ko manuša, o Sikl’ārde les na mukenas.
31He varehave najbāreder manuša andri Azia, havonen jov kamelas, bičhade ke leste jek l’il, he kamenas, kaj jov te na ǧal andro teatros.
32Varehave phende jek, varehave aver, he o manuša jekhethāne ehas xanǧārde, he buter lendar na ǧānenas, soske pēle ke peste.
33He tsrdinde e Aleksandros avri kathar o but manuša, he o bibolde trādinde les anglal. He o Aleksandros thod’as peskro vast upre, he kamelas pes te čačārel angal o manuša.
34A kana prinǧārde, kaj ehi biboldo, savore jekha gōd’aha dine viki duj ōri, he phende, Bāri ehi i Efezianskā Diana.
35He kana o foroskro čhinipnaskro lačārd’as e manušen, phend’as, Tumen, Efezianskā manuša! Ko na ǧānel, kaj o Efeziansko foros pes mangel ke bāri devl’ikāñi daj, ki Diana, he ko kaštūno manuš, bavo pēl’as kathar o Zeos?
36Te hi auka, kaj o manuš našt’i vakerel mamuj adala būt’a, ačhen! he ma vakeren! he ma keren diliñipen!
37Tumen liged’an adaj akadale manušen, have na čōren andre kangera, he jon pes na košen tumāra devl’ikāna daha.
38Odoleske o Demetrios he o būt’engre, have ehi leha, te kamen vareso e manušestar, o Bāro Lav ehi phrādo. Te hi bičhade, muk te vakeren o jek mamuj avreste.
39A te phučen pal āver būt’a, oda avena kerde maškar o čhibāle.
40Ehi amen i dar, kaj jon pes phučena amendar pal adad’iveskre bāre viki, he amen našt’i phenas, soske pēl’am ke peste jekhethāne.
41He kana auka vakerd’as, mukl’as e manušen te ǧan avri.
Избрани в момента:
Keriben 19: MOR1936
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
First published by the British and Foreign Bible Society in 1936.