Mateo 14
14
Xranchi kuenꞌen ndo Juan bikitée chujni
(Mr. 6:14-29; Lc. 9:7-9)
1Nchakon meꞌe xi ndatinꞌin Herodes Antipas, xi tituenꞌen nunte Galilea, kuinꞌen xa ti kuanichja chujni ngeꞌe jian kuancheꞌe ndo Jesús. 2Ko naa nchakon ndache xa ni nchexrée xa:
―Xi Jesús meꞌe xi Juan Bautista ko jai tsixechón xa. Méxin chónda xa ijié juachaxin nchexruenꞌen xa chujni.
3 #
Lc. 3:19, 20. *Xi Herodes tsixraxinꞌin xa ndo Juan, ngaxinꞌin ndoꞌa chjiso ko ntiꞌa tsikintee xa ndo ixi chika cadena kondeexin nchri Herodías, nchrinchriꞌe xi Felipe, xi kichuu xi Herodes 4ixi tsindache ndo xa:
―Ndakoꞌa juincheꞌe jaꞌa ixi kuantsjeꞌe xi kichuua, Felipe, nchrinchriꞌe xa, nchri Herodías, ko kutaꞌa nchra.
5Xi Herodes tjaun xa naaxrokóñaxón xa ndo Juan, ko juaꞌi ixi kuaxrakonꞌen xa chujni ixi kain ni tjajna meꞌe titikaon na̱ ixi jeꞌe ndo Juan meꞌe naa ngisen nduaxin tjako chijnie ndo Dio. 6Ko nchakon kuitja xa nano, juinchéña xa kiée xa, ko nchrixajoꞌen xa, nchrichjeꞌen nchri Herodías, chaxro ité nchrichan ko bikon kain ni ikjui kiée xa. Ko tsango juincheꞌe xa juaxruxin xranchi ité nchrichan, 7méxin ndache xa nchrichan ko nichjaxin xa ngatoxin ndo Dio ixi nduaxin tsajon xa ngajin nchrichan ngixeꞌi ngeꞌe xrojuanchia nchrichan.
8Ko nchri Herodías juinchekateya nchra nchrichjeꞌen nchra, méxin jaꞌin ndachro nchrichan:
―Chjána̱na ngaya naa laato jaa xi Juan tikitée chujni.
9Ko xi rey Herodes tsango koniꞌe aséen xa ixi ti juanchia nchrichan ixi jeꞌe xa tsindachro xa ixi nduaxin xrokuajon xa ti xrojuanchia nchrichan ko ixi kain ni ste ntiꞌa kuinꞌen na̱, méxin kuituanꞌan xa tsonꞌen xranchi ndachro nchrichan. 10Ko kuetuanꞌan xa ixi tsonchrijin na̱ jaa xi Juan ngaxinꞌin ndoꞌachjiso. 11Ko tjumeꞌe bikaꞌo na̱ jaa xi Juan ngaya naa laato ko kuayéꞌe nchrichan, ko jeꞌe nchrichan kuajon nchrichan jaa xa ngajin janée nchrichan.
12Ko kuinꞌen sen chrikao ndo Juan ixi jaña tsikonꞌen, meꞌe juirueꞌe sen ndo ko juabaa sen ndo, ko tjumeꞌe kuichronga sen ngajin ndo Jesús ngeꞌe konꞌen.
Ndo Jesús kuajon ndo juine naꞌó mil chujni
(Mr. 6:30-44; Lc. 9:10-17; Jn. 6:1-14)
13Ko hora kuinꞌen ndo Jesús ixi jaña tsikonꞌen ndo Juan, kuixinꞌin ndo ngaxinꞌin naa nta̱barco ko sakjui ndo ti xroꞌan chujni jii ixi jeꞌo ndo tjaun ndo tsakeꞌe ndo. Ko kain chujni kuinꞌen ixi sakjui ndo ko kueya na̱ kuachrjexin na̱ tjajnée na̱ ko tutée na̱ ruexin na̱ ndo. 14Ko hora kuachrjexin ndo Jesús nta̱barco, bikon ndo ixi tsango itsjé chujni jii ntiꞌa, bikonóeꞌe ndo na̱ ko juinchexruenꞌen ndo kain ni niꞌe tsikikaꞌo na̱. 15Ko ó jitondaya nunte ko sen teyuu chrikao ndo Jesús konchjiñeꞌe sen ngajin ndo, ko ndachro sen:
―Ó jitóndó ko ntiꞌi xroꞌan ngeꞌe jii sinena. Cháña ndachenta na̱ satsji na̱ naa tjajna tsijée na̱ naa ngeꞌe sine na̱.
16Ko jeꞌe ndo Jesús jaꞌin juatingíexin ndo:
―Naꞌi. Xrokondaꞌi satsji na̱. Jaꞌanta chje̱ꞌénta na̱ ngeꞌe sine na̱.
17Ko jeꞌe sen juatingíexin sen:
―Xroꞌan ngeꞌe chondana, jeꞌo naꞌó nutja ko yuu kuchee̱.
18Ko jeꞌe ndo Jesús ndachro ndo:
―Kuaxinta ntiꞌi ngeꞌe chondanta.
19Ko kuetuanꞌan ndo chujni tsjokéꞌe na̱ ngataꞌa kayua ko itsé ndo ti naꞌó nutja ko ti yuu kuchee̱ ko tsjeꞌe ndo ngajní ko kuajon ndo juasie ndo ngajin ndo Dio. Tjumeꞌe konchrinjin ndo nu ko kuajon ndo nu ngajin sen teyuu chrikao ndo ko kao kuchee̱ tsonchjeyeꞌe sen chujni. 20Ko kain na̱ juine na̱ jian, ko kaon na̱. Ko juexin juine kain chujni, sen teyuu chrikao ndo Jesús juejo sen ti xeꞌe, teyuu ntaxra. 21Ko ni juine xranchi naꞌó mil jeꞌo chujni xi, ko bekiꞌa sen sen nchri ko ichjan.
Ndo Jesús itji ndo ngataon inda
(Mr. 6:45-52; Jn. 6:16-21)
22Ko tjumeꞌe kuituenꞌen ndo Jesús sen teyuu chrikao ndo ko ndachro ndo:
―Tajiínta nta̱barco ko tatsingatoꞌenta ndachaon. Janꞌan tsituna ntiꞌi xrontatjan chujni satsji na̱ ko banchixon xroruaꞌanta.
23Ko juexin chjekeꞌe chujni, ndo Jesús sakjui ndo naa ijna̱ jeꞌo ndo ixi ntiꞌa xronichjeꞌe ndo ndo Dio. Ko ntiꞌa jeꞌo ndo bakeꞌe ndo ko ó tiie. 24Ko nta̱barco ó kuiji nta̱a̱ ngusine ndachaon ko kuaxi binga naa chrinto tsango soji ko inda jijamangitaon nda ko tjaun nda tsonjamangi nda nta̱barco, ko ícha jitosoji chrinto. 25Ko ndúyo xranaxixeꞌe ndo Jesús konchjiñeꞌe ndo ti jii nta̱barco ko jiti̱xi̱n tutée ndo ngataꞌa nda. 26Ko sen teyuu chrikao ndo bikon sen naa ngisen jiti̱xi̱n tutée ngataꞌa nda ko juatsuanꞌi sen ndo, méxin tsango xronka sen ko kuyako sen séen:
―¡Naa ntachaꞌan, naa ntachaꞌan!
27Ko ndo Jesús tuinxin nichjeꞌe ndo sen:
―Xrakonꞌanta ixi janꞌan juiꞌi.
28Ko ndo Pedro juatingíexin ndo ko ndachro ndo:
―Nchána, siá nduaxin jaꞌanta, tituanꞌannta ixi janꞌan kaxon tsjixin tutéena ngataꞌa inda ko tsjaso ti ritjennta.
29Ko ndo Jesús ndachro ndo:
―Xrokuia.
Ko tuinxin ndo Pedro xingajinxin ndo nta̱barco ko kuaxi juixin tutée ndo ngataꞌa nda ti no jii ndo Jesús. 30Ko chrinto soji juinchexronka ndo Pedro ko jitaxin jitenunte ndo chringi inda ko kuyako ndo:
―Nchána, ¡tingijnaninta!
31Ko ndo Jesús tuinxin koka itja ndo ko itsé ndo ndo Pedro ko ndachro ndo:
―Pedro, ¿sonda tsango nchion chuntiana ko sonda xronka?
32Ko tjumeꞌe yui sen kuajinꞌin sen nta̱barco ko tuinxin kuíxin chrinto. 33Ko sen stexinꞌin nta̱barco bakeꞌexin ntatuchiꞌin sen ngajin ndo Jesús ko ndachro sen:
―¡Nduaxin Chjenꞌen ndo Dio jaꞌanta!
Ndo Jesús juinchexruenꞌen chujni niꞌe nunte Genesaret
(Mr. 6:53-56)
34Tjumeꞌe juexin kuatsingatuꞌe sen ndachaon ko kuiji sen nunte Genesaret. 35Ko chujni tjajna meꞌe kuichúxin na̱ ndo Jesús, ko juinchenoꞌe na̱ kainxin tjajna ste nunte meꞌe ixi ndo Jesús ntiꞌa jii ndo ko chujni meꞌe bikaꞌo na̱ kain ni niꞌe. 36Ko kuinóatée ni niꞌe ixi maski ngandeꞌe mantée ndo xrotsé na̱, ko nduaxin kain ni itsé mantée ndo, koxruenꞌen na̱.
Избрани в момента:
Mateo 14: ppsNT
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2016, Wycliffe Bible Translators, Inc. All rights reserved.