Te Otinako 1
1
B'ainikirinaia Iteraera i Aikubita
1Ao aikai araia natin Iakob'a ake a iri nako Aikubita ma aia utu n tatabemaniia nako. 2Reuben, Timeon, Rewi, Iuta, 3Itakara, Teburun, Beniamin, 4Taan, Nabetari, Kata, ao Atera. 5Bootan te botannaomata aei ake a nako mairoun Iakob'a bon itingaun.#1.5: teuana te rairai ni kawai Itibwi ma nimaua (noora M'a 7.14). E a kaman roko natina are Ioteb'a i Aikubita. 6Ao i nanon waakin te tai, ao e a mate Ioteb'a ma tarina, ao nikiran te roro arei, 7ma a riki rake ni m'aiti aia kariki Iteraera, ao a karikiia natiia aika m'aiti ma ni korakora ni karib'aia kaain Aikubita, 8Ao akea b'a e a uea i aon Aikubita te aomata ae aki ataa Ioteb'a 9Ao e taku nako ia ana aomata, “A rangi ni m'aiti Iteraera ma ni korakora riki nako ira. 10Ao ane a na kaaina aia taanga ni buaka ara kairiribai n tain te buaka ma ni manga buakaniira ma ni biri nako mai abara. Ti riai ni kakaaea katokan rikirakeia.” 11Ma ngaia are, kaain Aikubita a manga riki b'a mataniwiia tooro, ao a kairiia n te kairiiri ae matoatoa. Ao a karaoa te kaawa ae buubura are Bitom ma Rameteti Iteraera aika kaawa i bukin kaawakinan kaub'aina. #1.11 Bitom ao Rameteti: Bon ti aio n te B'aib'ara ae taekinaki iai taekan Bitom; ao n aki ataaki raoi te tabo ae mena iai, ma iai te iango b'a e mena i meangin te kaawa ae Aikubita. Rameteti bon te kaawa ae rangi ni kakannato i bukina ngke riki b'a mwengan Rameteti te kauoman; e aki ataaki raoi nnen te tabo aio. 12Kakorakoraan karawawataaia Iteraera irouia kaain Aikubita ai aron ae boni kakorakoraan aia botannaomata n taona aon te aba, ao e a rikirake maakuia kaain Aikubita irouia Iteraera. 13A karawawataai maiuia ni kairoroia nakon te tautoronaki ae matoatoa. 14A kam'akuria n aia waaki ni kateitei, ao n ribanai abaia, ao bon akea aia nanoanga teutana nako ia. 15Ao e taetae uean Aikubita nako ia ana tia kabung i bukiia ainen Ebera ake Tibera ao Buua,#1.15 N Ebera: te taeka ae e a kaman kabonganaki n taai akekei 16“Ngkana kam kabungiia aine aika Ebera, ao kam na tiringa te tei ngkana te mm'aane, ma kam na kamaiua ngkana te aine.” 17Ma bon aomata aika mamaaka te Atua taani kabung akekei, ma ngaia are, a aki ira nanon te uea, ao a boni kamaiuia naba ataei aika mm'aane. 18Ma ngaia are e kananako weteaia taani kabung akekei te uea, ao e taku nako ia, “E aera ngkai kam karaoa aei? e aera ngkai kam kamaiuia ataei aika mm'aane?”
19Ao a taku aine akekei, “B'a a boni kaokoro ainen Iteraera ma ainen Aikubita; a bungiia natiia n akea aia kangaanga, ao a kaman bung i m'aain rokora i rouia.” 20Ao E kakab'aiaia taani kabung akekei te Atua i bukina ngke bon aomata ngaiia aika mamaaka te Atua, 21ma ngaia are, E karekea aia utu, ao a rikirake ni m'aiti Iteraera ma ni korakora. 22Ao n tokina ao e kanakoa ana katanoata te uea nakoia ana aomata ni kaangai, “Anaia naati mm'aane ni kabane aika a tib'a bungiaki, aika Ebera, ao karenakoia nako nanon te Naire, ma kam na kamaiuia aine.”
Избрани в момента:
Te Otinako 1: KNVB
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте