Karikani B'aai 20
20
Aberaam ma Abimereka
1Ao e m'ananga Aberaam mai Mamre nako m'akoron Kanaan are mai maiaki, ao e maeka i marenan Kateti ma Tiura. Ngke e a boni maan teutana ni maeka i Kera, 2ao e taku teuare Aberaam b'a m'anena buuna are Nei Taara, ma ngaia are, e tuatua te uea are Abimereka b'a e na kawaekoaaki Nei Taara nako ina. 3Ao n te tairiki teuana, ao e kaoti te Atua nako ina n te mii ao E taku, “Ko nangi mate b'a ko a tia n anaa te aine ae iai buuna.”
4Ma e bon tuai ni kawara neierei Abimereka, ao e taku, “Te Uea, Ko nang tiringai ma au aomata, ao bon akea te b'ai ae I a tia ni bure iai? 5E bon taku Aberaam b'a m'anena, ao e bon taku naba neiei. Ao I karaoa aei ma nanou ae itiaki, ao bon akea te b'ai ae I a tia ni karaoia.”
6Ao E kaeka te Atua n te mii, “Eng, I ataia b'a ko karaoa anne ma te nano ae itiaki, ao bon anne bukina are I tuukiko iai b'a ko na aki nako iu, ao ko na aki riingnga naba Nei Taara. 7Ma ngkai, ko na kaoka te aine anne nakon buuna. Bon te burabeti teuarei, ao boni ngaia ae na tataro i bukim b'a ko na aki mate. Ma ngkana ko aki kaokia, ao I kauringko ngkai b'a ko na bon mate ma am aomata ni kabane.”
8Ao e weteia kaain ana bareti te uea ngke e a tib'a ingabong n te bong are i mwiina, ao e tuangiia te b'ai are riki, ao a bane ni maaku. 9Ao e wetea Aberaam Abimereka, ao e titirakinna ni kaangai, “Tera ngkai ae ko a tia ni karaoia nako ira? Tera au kaairua ae I a tia ni karaoia nako im, ngkai ko karokoa iai te kangaanga aei nako iu ma au tautaeka? Bon akea ae e a tia ni karaoa anne nako iu. 10E aera ngkai ko a karaoia ngkai?”
11Ao e kaeka Aberaam, “I taku ngai b'a akea ae karinea te Atua ikai, ao I maaku iai b'a kam rawa n tiringai, ao kam anaa buu. 12Bon m'aneu ngaia, b'a bon natin tamau, ma e kaokoro tinau ma ngaia, ao I a tia ni mare ma ngaia. 13Ma ngaia are, ngke E kanakoai te Atua man ana auti tamau nakon te aba ae I iruwa iai, ao I taku nakon neiei, ‘Ko na kaota am kakaonimaki nako iu n tuangiia aomata nako b'a m'aneu ngkoe.’ ” 14Ma ngaia are, e a kaoka Nei Taara Abimereka nakon Aberaam, ao e anganna naba n te tai arei ana tiibu, ao ana kao, ao ana taani m'akuri. 15Ao e taku nakon Aberaam, “Aio abau ni kabane, ko na maeka iai n aron ane ko bon taku.” 16Ao e taku nakon Nei Taara, “I angani m'anem tengaa te m'akoro n tirewa b'a te b'ai ni kakoaua nako ia aika raom n te tai aei b'a bon akea am bure; a na bane n ataia aomata b'a ko tuai bure.”
17Ao te UEA, E karaoia ainen ana bareti te uea b'a a na aki kakariki i bukin te b'ai are e riki nakon Nei Taara are buun Aberaam. 18Ao e tataro Aberaam i bukin Abimereka, ao E kamaiua Abimereka te Atua. E kamaiua naba buuna ma ana toro aine, b'a a na manga kona ni kariki.
Избрани в момента:
Karikani B'aai 20: KNVB
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте