Karikani B'aai 22
22
Mwiokoan Aberaam iroun te Atua b'a e na anga Itaaka b'a ana karea
1Ao i mwiin te tai ae aki maan, ao E a kataa Aberaam te Atua; ao E weteia ni kaangai, “Aberaam!” Ao e kaeka Aberaam, “Aio ngai!” 2Ao E taku te Atua, “Ko na anaa natim te mm'aane ae te rikitemanna ae ko rangi n tangiria are Itaaka, ao naako nakon te aba are Moria. Ao ko na anga b'a am karea nako iu i aon te maunga ae N na kaotia nakoim.”
3Ao n te karangaina are i mwiina, ao e korokoroi ana aia Aberaam i bukin te karea, e katokai i aon te aati, ao e kaira Itaaka ma uoman ana toro. Ao a m'ananga nakon te tabo are E a tia n tuangnga te Atua. 4Ao n aia katenibong ni m'ananga, ao e a ria te tabo arei.
5Ao e a taku Aberaam nakoia ana toro, “Kam na tiku ikai ma te aati, ao Ngai ma natiu aei ti na nako ikekei b'a ti na taromauri, ao i mwiina ti a manga okiringkami.”
6Ao e angan Itaaka taian aia i bukin te karea b'a e na uoti, ao ngaia e uota te biti ma te m'aakaro n ai i bukin kauraan te ai. Ao ngke a kaai n nakonako,
7Ao e taku Itaaka, “Tamau!”
Ao e taku Aberaam, “Tera natiu?”
Ao e titiraki Itaaka ao e taku, “E aera ngkai ti uouoti taian aia ma te ai, ao e nga te tiibu te teei i bukin te karea?”
8Ao e taku Aberaam, “E na boni katauraoa temanna te Atua i bukira.” Ao a uaia n airi n nakonako.
9Ao ngke a roko n te tabo are E tuangnga te Atua, ao e a karaoa te baonikarea Aberaam iai, ao e baairei taian aia i aona. E kabaea natina are Itaaka, ao e katokaa i aon te baonikarea i aon taian aia. 10Ao e anaa te biti b'a e nang tiringa natina iai. 11Ma E weewete aneran te UEA mai karawa ao e taku, “Aberaam, Aberaam!”
Ao e kaeka Aberaam, “Aio ngai.”
12Ao E taku te anera, “Ko na tai kaikoaka te ataei, ke ni karaoa te b'ai teuana nakoina. I ataia ngkai b'a ko bon ongotaeka iroun te Atua, b'a ko aki taua natim te mm'aane ae te rikitemanna mai Rouna.”
13Ao e taratara nako Aberaam, ao e noora te tiibu te teei ae bae korona n taiani m'aanga ni kai. E nako n anaia, ao e anga b'a ana karea ni kabuokaki n onea mwiin natina te mm'aane. 14Ao e arana te tabo arei Aberaam b'a “E karekea te UEA.” Ao a kaangai aomata ni boong aikai, “E na karekeaki i aon ana Maunga te UEA.” 15Ao E a manga wetea Aberaam te anera mai karawa te kauoua n tai ni kaangai, 16“N na karaoa te berita i bon irou, bon Ana taeka te UEA, N na boni kabatia kakab'aiakim. I bukina ngkai ko a tia n aki taua natim te mm'aane ae am rikitemanna nako iu, 17I berita b'a N na anganiko am kariki ae ai aron m'aitin itoin karawa, ke tanon aon te bike i mataniwiin taari. A na totokanikai kanoam i aoia aia kairiribai. 18Ane a na bubutiai botannaomata b'a N na kakab'aiaia n aron kakab'aiakiia am kariki-a na riki baikai i bukina ngke ko ongotaeka irou.” 19Ao e oki rikaaki Aberaam nakoia ana toro, ao a uaia n nako Beerateb'a, te tabo are e katei ana auti n rianna iai ngkoa Aberaam.
Natin Naora
20Ao i mwiin te tai ae aki maan, ao e ongo Aberaam b'a a tia tarina are Naora ma buuna are Nei Mireka ni karekeia natiia aika waniman 21Ana karimoa te mm'aane bon Uti, ao tarina Buti, Kemuera are taman Aram, 22Keteta, Ato, Biretati, Iiteraba, ao Betuera, 23are taman Nei Rebeka. Aikai nati mm'aane aika waniman ake natin Nei Mireka ma Naora, are tarin Aberaam. 24E karikiia natina mm'aane Nei Reum'a are buun Naora ni kewe #22.24 buun... ni kewe: E tauaki taekana ni kabane iroun teuae te mm'aane, ma akea inaomatana ae e b'anin n aron ae bon te buu ni koaua.aika; Teba, Kaam, Taati, ao Maaka.
Избрани в момента:
Karikani B'aai 22: KNVB
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте