Karikani B'aai 29
29
Rokon Iakob'a n ana auti Raab'an
1Ao e toua nako kawaina Iakob'a nakon aba ake i mainiku. 2Ao n te bong teuana, ao e a roko Iakob'a n te m'anib'a teuana ae mena i nukan te tawaana, ike a kakamooia iai aia nanai n tiibu taan kaawakin tiibu. Bon iai tenua taian nanai n tiibu aika wene i rarikin te m'anib'a arei, ao e rabunaki matan te m'anib'a arei n te atiibu ae buubura. 3Ngkana a bane n roko taian tiibu ikekei, ao a kam'ainga te atiibu are rabunan matan te m'anib'a taan kawakin tiibu ma ni kamooia aia nanai n tiibu, ao a manga kaoka matan te m'anib'a ngkana a tia.
4Ao e titirakiniia taan kaawakin tiibu Iakob'a, ao e taku, “Taiaoka naakai, kam nako ma ia?”
Ao a taku uakekei, “Mai Aran,”
5Ao e manga titirakiniia riki, ao e taku, “Ao kam kinaa Raab'an, are tibun Naora?”
Ao a taku, “Eng, ti kinaa.”
6Ao e taku Iakob'a, “Ao e uara?”
Ao a taku, “E marurung, ao ae e a roko natina te aine are Nei Rakera ma ana nanai n tiibu.”
7Ao e taku Iakob'a, “E bon tuai bo aia tai tiibu ni bootaki b'a e a bon tib'a tawanou, ao e aera ngkai kam aki kamooia ami nanai n tiibu b'a kam aonga ni m'ananga nako ni kam'arakeia?”
8Ao a taku uakekei, “Ti bon aki kona ni karaoa anne ni karokoa a bane n roko ikai nanai n tiibu, ao ngkana e a tia naba ni kaukaki matan te m'anib'a, ao ti a tib'a kona ngkanne ni kamooia ara nanai n tiibu.” 9Ao ngke e bon tabe n taetae Iakob'a ma ngaia, ao e roko Nei Rakera ma ana nanai n tiibu. 10Ao ngke e noora Nei Rakera Iakob'a ma ana nanai tarin tamana are Raab'an, ao e nako nakon te m'anib'a ni kauka matana, ao e kamooia ana tiibu neierei. 11Ao i mwina, e inga ma ngaia, ao e a tang i bukin kukureina. 12Ao e taku nakoina, “Bon ana koraki tamam ngai, ae natin Nei Rebeka te mm'aane.”
Ao e birinako neierei n tuanga tamana, 13ao ngke ongo rongorongon ai natina are Iakob'a, ao e biri nako ni kaitibo ma ngaia, e rab'atia, ao e kiiti ma ngaia ao e kairiia nakon ana auti. Ao ngke e a tia Iakob'a n tuanga Raab'an b'aai ni kabane ake a tia n riki, 14ao e taku Raab'an, “Eng, bon te koaua b'a bon irikou, ao raraau ngkoe.” Ao e tiku ikekei Iakob'a n te nam'akaina arei.
M'akurin Iakob'a iroun Raab'an i bukin Nei Rakera ao Nei Reea
15Ao e taku Raab'an nakon Iakob'a, “Ko bon riai ni m'akuri i rou n akea boom b'a are bon au koraki ngkoe. Tao iraua boom ae ko tangiria?” 16Ao iai natin Raab'an uoman ataei n aine. Aran te karimoa bon Nei Reea, ao te karimwi bon Nei Rakera. 17E bon botonaine Nei Reea, ma e bon rangi ni botonaine riki Nei Rakera.
18Ao e tangira Nei Rakera Iakob'a, ma ngaia are e taku, “N na m'akuri i bukim itiua te ririki, ngkana ko na anganai Nei Rakera.”
19Ao e taku Raab'an, “E raoiroi riki ngkana I anganiko, nakon ae N na angan temanna, ma ngaia ae ko na tiku ikai i rou.” 20Ao e m'akuri Iakob'a b'a e aonga n anganaki Nei Rakera, ao ti te bo ma ti tabebong i rouna i bukin tangiran Nei Rakera.
21Ao e taku Iakob'a nakon Raab'an, “E a koro au tai; ko nang anganai natim te aine b'a N nang mare ma ngaia.” 22Ma ngaia are, e a karaoa ana baka ni mare Raab'an, ao e kaoiia aomata nako. 23Ma n te tairiki anne, ao e a kaira Nei Reea Raab'an nakon Iakob'a, ao e a wene Iakob'a ma Nei Reea. 24(Ao e anga ana toro te aine Raab'an are Nei Tireba nakon natina te aine are Nei Reea b'a buokana.) 25E aki roko n te ataia Iakob'a ae Nei Reea are e wene ma ngaia ngke tairiki, ni karokoa e ingabong, ao e a tib'a ataia. E nako ni kawara Raab'an, ao e taku, “E aera ngkai ko karaoa aei nako iu? I bon m'akuri i bukin karekean Nei Rakera, ao e aera ngkai ko kam'aneai?” 26Ao e taku Raab'an, “Boni katein ara tabo aei b'a e aki kona moa ni iein te nati te aine te karimwi i m'aain ieinin te nati te aine te karimoa. 27Ko na tataninga ni karokoa banen bongin te baka,#29.27 bongin te baka: Bongin te baka ni mare bon 7 te bong. ao I a anganiko Nei Rakera ngkana ko a manga m'akuri i rou i nanon itiua riki te ririki.”
28Ao e kariaia Iakob'a, ao ngke a bane wiikin te baka ni kukurei i bukin te mare, ao e a anganna natina te aine are Nei Rakera b'a buuna. 29Ao e anga ana toro te aine are Nei Birea Raab'an nakon natina are Nei Rakera b'a buokana. 30Ao e wene Iakob'a ma Nei Rakera, ao e tangira riki Nei Rakera nakon Nei Reea. Ao e a manga m'akuri i bukin Raab'an itiua riki te ririki.
Bungiakin natin Iakob'a
31Ao ngke E nooria te UEA b'a e aki tangiraki riki Nei Reea nakon Nei Rakera, ao e karaoa Nei Reea b'a e na kakariki, ma e tiku n aki kakariki Nei Rakera. 32Ao e bikoukou Nei Reea, ao e bungia te nati te mm'aane. Ao e taku, “E a tia n noori au kaangaanga te UEA, ao ngkai e nang tangirai buu.” Ma ngaia are, e aranna b'a Reuben. #29.32 Reuben: N Ebera nanona noora te nati te mm'aane. 33Ao e a manga bikoukou riki, ao e a manga bungiia te nati te mm'aane. Ao e taku, “E a tia ni manga anganai riki te UEA te nati te mm'aane aei, i bukina ngke E ongo ae I aki tangiraki.” Ma ngaia are, e aranna b'a Timeon. #29.33 Timeon: N Ebera nanona iai ae e ongo. 34Ao e a manga bikoukou naba, ao e a manga bungiia riki te nati te mm'aane temanna. Ao e taku, “E nang nimtai riki buu, b'a I a tia ni bungiia natina mm'aane aika teniman.” Ma ngaia are, e aranna b'a Rewi. #29.34 Rewi: N Ebera nanona koona temanna ni kaaniia. 35Ao e a manga bikoukou naba, ao e a manga bungiia naba te nati te mm'aane. Ao e taku, “N nangi neboa te UEA n te tai aei.” Ma ngaia are, e aranna b'a Iuta.#29.35 Iuta: N Ebera nanona nebonebo. Ao e a toki ikanne kanoana.
Избрани в момента:
Karikani B'aai 29: KNVB
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте