Karikani B'aai 32
32
Ana katauraoi Iakob'a i bukin kaitiboona ma Etau
1Ao ngke e tabe ni waaki Iakob'a i aon kawaina, ao e kaaitibo ma taian anera tabeman. 2Ao ngke e nooriia, ao e taku, “Bon aio ana maeka te Atua.” Ma ngaia are, e arana te tabo arei b'a Maanaim. #32.2 Maanaim N Ebera nanona “maeka aika uoua.” 3Ao e kanakoa ana tia uarongorongo Iakob'a ri moana nakon tarina are Etau n te aba are Etom. 4Ao e tuangnga ana taeka aika kaangai, “Bon Iakob'a ngai ae am toro are nako ni maeka ngkoa iroun Raab'an, ao e a tib'a oki n te tai aei. 5A m'aiti au nanai ni kao, ma au nanai n aati, ma au nanai n tiibu, ma au nanai ni kooti, ao au toro. I kanakoa au bubuti nakoim b'a ko na kab'ara au bure.”
6Ao ngke e a oki ana toro Iakob'a, ao e taku, “Ti kawara tarim are Etau, ao bon ae i aon kawaina ni kawariko. Ao bon iai abubua rorobuaka aika raonna.” 7Ao e maaku Iakob'a ma n raraoma. E bwenauaia ana aomata ake i rouna nakon uakoraki, ao ai uana naba ma ana nanai n tiibu, ma kooti, ma kaao, ao taian kamero.
8Ao e taku n ana iango, “Ngkana e roko Etau ni buakana te moani koraki, ao e na reke aia tai kaain te kauoua ni koraki ni birinako.”
9Ao e tataro Iakob'a ao e taku, “Atuan tibuu are Aberaam, ao Atuan tamau are Itaaka, ongora irou. Ko tuangai te UEA b'a N na nako n okira abau nakoia au koraki, ao Ko na kanakoraoi b'aai ni kabane i buku. 10Akea bonganan au m'akuri aika raoiroi ake I a tia ni karaoi ngai ae am toro. I ri aon ngkoa te Ioretan ti man te oko, ao ngkai I a oki ma au koraki aika uakoraki aikai, n ikotaki ma au nanai ni maan aika kawakawa. 11Kamaiuai, I tataro nakoim i bukin tariu are Etau. I a maaku b'a e nang roko ni buakanai ma n tiringiira ni kabane, n reitaki naba ma aine ao ataei. 12Uringnga are Ko berita ngkoa b'a Ko na kanakoraoi b'aai ni kabane i buku ma n anganai au kariki aika m'aiti aika akea ae kona ni warekia, kaanga ai aron m'aitin tanon mataniwiin taari.”
13Ao ngke e a ngaina arei ikekei, ao e a rineia tabeman ana man aika kawakawa mai buakoia ana nanai ni maan aika kawakawa b'a ana b'aintangira nakon tarina are Etau: 14E anai 200 taian kooti aine, ao uangaun kooti mm'aane, 200 taian tiibu aine, ao uangaun kooti mm'aane, 1530 kamero aine ma natiia, angaun kao aine, ao tengaun kao mm'aane, ao uangaun aati aine, ao tengaun aati mm'aane. 16E a manga tib'atib'a ana nanai nakon kurubu aika kakaokoro, ao e karekea temanna ana toro i aon teuana te nanai b'a te tia tararuaia, ao e taku nakoia, “Naako rimoau, ao tai ikoti ami nanai, ma karekea te marena i marenan ami nanai nako, te nanaina i mwiin te nanaina.” 17Ao e wetea ana toro are na moan kanakoa, ao e taku, “Ngkana ko kaaitibo ma tariu are Etau ao ngkana e kaangai nakoim, Antai am toka? Ao ko na nakea? Ao antai ana nanai ni maan aika kawakawa akana a rimoam akanne? 18Ao ko na riai ni kaangai, Bon ana nanai ni man aika kawakawa am toro are Iakob'a. E karimoai aikai b'a a na b'aintangira nakon ana toka ae Etau. Iakob'a ane rimwi.” 19Ao e tuanga naba ana toro are te kauoman n aron arei, ao ai uana naba ma te kateniman, ao nakoia naba ni kabane ake a kairiia taian nanai: Ao anne ami taeka nakon Etau ngkana kam kaitibo ma ngaia. 20Kam na kaangai, “Eng, bon ane rimwiira am toro are Iakob'a.” E iangoia Iakob'a b'a e na kamaraua nanon tarina n ana b'ai n tangira akekei, ao e na bae ni b'ara ana bure ngkana e kaaitibo ma ngaia. 21E karimoai ana b'ai n tangira akekei, ao e tiku ngaia ni kangainaa n te auti n rianna.
Kaunrab'atan Iakob'a i Beniera
22Ao e teirake Iakob'a n te tairiki naba anne, e anaia buuna ake uoman ma buuna ni kewe ake uoman, ao natina ake tengaun ma temanna, ao a ri aon te karaanga are Iaboka. 23Ao ngke e a tia ni kanakoia i aon te karaanga, ao e a manga kanakoi ana b'ai ni kabane ri aon naba te karaanga, 24ao ngaia e tiku n ti ngaia imwiia.
Ao e roko te mm'aane temanna ni kaunrab'ata ma ngaia ni karokoa e kan ngaina. 25Ao ngke e nooria te aomata arei b'a e aki tokanikai i aona, ao e orea rarikin Iakob'a, ao e tibanako riin bebeen Iakob'a. 26Ao e taku te mm'aane arei nakon Iakob'a, “Kanakoai b'a e a ngaina.”
Ao e taku Iakob'a, “N na bon aki kanakoko ni karokoa ko kakab'aiaai.” 27Ao e taku teuarei, “Antai aram?”
Ao e taku Iakob'a, “Bon Iakob'a arau.”
28E taku teuarei, “Ko na aki manga aranaki b'a Iakob'a. Ko a tia ni kaunrab'ata ma te Atua ao taiani mm'aane, ao ko tokanikai; ma ngaia are, ko na aranaki b'a Iteraera.” #32.28 Iteraera: N Ebera nanona te mm'aane ae borab'ata ma te Atua. 29Ao e taku Iakob'a, “Tuangai aram ngkai.”
Ma e taku teuarei, “E aera ngkai ko tangiria n ataa arau?” Ao i mwiina, e kakab'aia Iakob'a.
30Ao e taku Iakob'a, “I a bon tia n noora te Atua n itaramata raoi ma Ngaia, ao I boni maiu naba.” Ma ngaia are, e arana te tabo arei b'a Beniera. #32.30 Beniera: N Ebera nanona itaramata ma te Atua. 31Ao e a oti taai ngke e kiitana Beniera Iakob'a, ao e turatura i bukin tibanakon riin bebeena. 32Ni karokoa naba boong aikai, ao tibun Iteraera a bon aki kaakana te iriko are i aan toman te beebee, i bukina ngke e oreaki beebeen Iakob'a.
Избрани в момента:
Karikani B'aai 32: KNVB
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте