Karikani B'aai 43
43
Okiran Aikubita irouia tarin Ioteb'a ma Beniamin
1Ao e a rangi ni korakora te rongo i aon Kanaan, 2ao ngke a bane kanaia ana utu Iakob'a ake a kabooi i Aikubita, ao e a taku Iakob'a nako ia natina mm'aane, “Kam na manga nako n okira Aikubita ni kabooa karara teutana.”
3Ao e taku Iuta nako ina, “E matoa b'anaan te aomata arei b'a ti na bon aki manga roko i matana ngkana ti aki kaira tarira. 4Ngkana ko kukurei b'a ti na kaira tarira, ao ti a tib'a kona n nako ni kabooa te am'arake i bukim. 5Ao ngkana ko aki kukurei iai, ao ti na aki nako, b'a e taku te aomata arei b'a ti na bon aki kaoti i matana ngkana e aki iriira tarira.”
6Ao e taku Iakob'a, “E aera ngke kam a manga tuanga teuarei b'a iai riki tarimi temanna? Kam bon karekea te kangaanga ae ab'ab'aki nako iu.”
7Ao a taku, “B'a e rangi n titirakiniira te aomata arei i bukiia ara utu. E titirakiniira naba i bukin tamara b'a e maiu ke e aki, ao e titirakiniira naba b'a iai riki tarira ke akea, ao ti bon riai ni kaekai taian titiraki akanne, ao ti aki ataia b'a ngaia e nang tuangiira tarira b'a ti na kairiia.”
8Ao e taku Iuta nakon tamana, “Mwiokoai iroun te ataei, b'a ti aonga ni waekoa n nako, b'a ti a kaawa ni mate ni baki. 9I berita b'a N na bon kaokia raoi nako im, ao ngkana I aki, ao ko na bon karekea kaiu n taai nako. 10Ngkana tao arona b'a ko bon aki tuukira mai m'aaina, ao tao ai uaoki ngkai okira mai ikekei.”
11Ao e taku tamaia nako ia, “Ngkana ai ngaia anne arona, ao kam na uoti b'aai aika a rangi n raoiroi mai abara i nanon ami baeki b'a ami b'ai n tangira nakon te kowana, aia karewe manibeeru, renganan taian am'arake, taiani koraa aika kakanaki ake te naani bititakio, ao ai te naan amon. #43.11 aia karewe manibeeru... amon: Tabeua man am'arake aikai a kona n reke i aoni Kanaan, ma te boto n am'arake bon te kariki, ma akea uita aika a uarereke aika e na karaoaki iai te kariki. 12Bon uouoti naba ami m'ane aika rawata, b'a kam na kaoki taiani m'ane ake a mena i matan ami baeki ngkoa. E na mena ngkoa ao boni kaairuan te m'akuri. 13Kaira tarimi ao kawaekoai ngkami n nako. 14E bia karika te aomata arei te Atua ae m'aaka b'a e na nanoangaingkami, b'a e aonga ni kaoka tarimi ae Beniamin ma tarimi naba ake tabeman nako imi. Ngkana tao ai boni katauana b'a a nang akea natiu, ao kai are I a kataua naba.”
15Ma ngaia are, a uoti aia b'ai n tangira ma aia m'ane aika m'aiti riki nakon are mai m'aaina, ao a nako Aikubita, ao e a iri Beniamin. Ao a nako ni kawara Ioteb'a. 16Ao ngke e noora Beniamin Ioteb'a b'a raoia, ao e taku nakon ana toro are e tararua ana auti, “Kairiia aomata aikai nakon au auti, b'a N na katawanou ma ngaiia, ma ngaia are, ko na tiringa te man b'a karara.” 17Ao e karaoa are e tuangaki te toro arei, ao e kairiia tarin Ioteb'a nakon ana auti Ioteb'a.
18Ao ngke a uotaki nakon ana auti Ioteb'a, ao a maaku, ao a taku i nanoia, “Ti a uotaki nako ikai ngkai i bukin taiani m'ane ake a kaokaki nakon ara baeki ni moan rokora. Ane a na karinaira ni buakaniira ma n anai ara aati, ma ni karikiira b'a aia toro.” 19Ma ngaia are, ngke a roko n te mataroa, ao a taku nakon te toro are e tararua te auti, 20“Taiaoka Nao, ti roko ikai mai m'aaina ni kabooi karara. 21Ao ngke ti a katea ara auti n rianna i aon kawaira n okira mwengara, ao ti a kauki ara baeki, ao ti a bane n noori ara m'ane i matan nako ara baeki, ake ti bon anga ngkoa b'a booia. Ti a manga uoti ngkai nakoim. 22Ao ti uoti naba ara m'ane riki b'a ti na manga kabooi riki karara. Ti aki ataia b'a antai ae manga kaoki ara m'ane nako nanon ara baeki.”
23Ao e taku te toro arei, “Kam na aki raraoma, tai maaku. Bon Atuami are Atuan tamami ae kaoki nako imi taiani m'ane nako nanon ami baeki. B'a I bon bane ni karekei boon ami b'ai ni kabane n te tai arei.” Ao i mwiina, e a kaira Timeon nakoia.
24Ao e kairiia tarin Ioteb'a akekei te toro arei nakon te auti. E anganiia te ran b'a a na teboki waeia iai, ao e kamooi aia aati. 25Ao a katauraoi aia b'ai n tangira i m'ain rokon Ioteb'a n te tawanou, b'a a tia n tuangaki ae a na katawanou n am'arake ma ngaia. 26Ao ngke a okira ana auti Ioteb'a ngke e a tawanou, ao a uoti aia b'ai nako nanon ana auti ma ni bobaraaki nako aontano i matana. 27Ao e titirakiniia b'a a uara, ao i mwiina, e taku, “Kam kaongoai ngkoa tamami-e uara? e boni maiu naba ngkai ma ni marurung?”
28Ao a taku, “Eng, e boni maiu ma ni marurung naba am toro are tamara.” Ao a katorobubua ma ni bobaraaki i matana. 29Ao ngke e nooriia Ioteb'a, ao e taku, “Ngaia aio tarimi are te bina, are kam tuangai ngkoa. Te roronga, E na kakab'aiako te Atua.” 30Ao e kawaekoa n nako Ioteb'a, b'a e waerakeia te tang ngke e a tib'a noora tarina are Beniamin. E a roko i rouna ae kaanga e nang tang i mataia. Ma ngaia are, e nakon ana ru, ao e a karaua n tang iai. 31Ao e a manga otinako ngke e a tia ni kakaoi ranni matana, ngke e a bon toki nanona n tang, ao e a kanakoa ana taeka b'a a nang uotaki taian am'arake nakoia. 32Bon teuana ana taibora Ioteb'a, ao naake tarina bon teuana naba aia taibora, ao kaain Aikubita ake a am'arake naba ma ngaia n te tai arei, bon teuana naba aia taibora ae okoro, b'a a raarawa ni bootaki n am'arake ma Ebera. 33Ao naake tarina, e kaitaraa aia taibora ma Ioteb'a, ao a karinan raoi n tekateka man te ikawai ni karokoa te bina. Ao a itaramata ma te mimi ngke a noora aron katekatekakiia arei. 34Ao a uouotaki taian am'arake nako ia man ana taibora Ioteb'a, ao e rangi n raka riki uouotakin te am'arake nakon Beniamin b'a nimaua te tai rakana nakoia ake tabeman. Ma ngaia are, a am'arake ma ni mooi ma Ioteb'a ao n reke aia tai ae moan te raoiroi.
Избрани в момента:
Karikani B'aai 43: KNVB
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте